Daeglunz Dajgai - 广西民族报网

Daeglunz Dajgai

来源：广西民族报网

作者：□ Cungh Hihcwngh /钟希增

发布时间：2026-07-07

Seiz haeuj cawzcou, aen mbwn lij hwngq. Daeglunz mwh cingjleix doxgaiq, sawqmwh geiq ndaej gunghsanghsoj gangj gvaq, moix buenq bi aeu bauqsoengq gijmaz nienzdoh baugau. De sim baez anj, fan ok mbaw yingzyez cizcau daeuj yawj, baihgwnz caen miz coij saw iqetet ndeu yienghneix gangj dahraix. De mbouj gamj mbouj leixlangh, guhmuengz sousib mizgven cwnggen buet bae gunghsanghsoj.

Lijdwg boux gunghcoz yinzyenz baezgonq haenx ciepdaih de, hoeng baezneix bouxde naj laepfwd lumj vunz famh ndok de nei.

“Gvaq geizhanh bauqsoengq nienzdoh baugau lo, ciuq gvidingh, fad cien maenz ngaenz.” Boux gunghcoz yinzyenz gangj vah citcangcang, lumj- naeuz gienhsaeh caeuq de mbouj miz saek di nanaengq. Gangj sat dajyaenq mbaw dan fadcienz ndeu ndenq ok conghcueng daeuj.

Daeglunz doeksaet yat, lumj deng baeuh bat raemxgyoet ndeu gvaq gwnzgyaeuj daeuj. De heiq hwnj lo, ndat daengz byai’byoem bae, de nyaenx laux caengz ndaej caeuq boxwnq doxceng gvaq, seizneix roxnyinh deng vunz hangz daengz dingjgyaeuj daeuj lo, hozgaek raixcaix. Gangj vah hix miz di mbaj mbouj baenz coenz lo.

“Guhlawz……guhlawz baenz yienghneix? Nyaenxlai vunz lienz yingz……yingzyez cizcau cungj……cungj mbouj banh, cix mbouj……mbouj saek yiengh saeh! Gou laux……lauxsaed banh lo, couh vih bauqsoengq aen……aen gijmaz baugau neix nguh di, deng fad……fad cien maenz ngaenz? Doenghgij vunz gai huqgyaj, gai iensei, gai luzhozcaij swhliu haenx, mbouj raen sou bae……bae guenj? Gyoengqde youq gwnzhaw veizfap luenhgij, sou cix canggyaj yawj mbouj raen. Guekgya ok ngaenz ciengx, couhdwg hawj sou cienmonz daeuj haep daeuj hangz dou gij vunz lauxsaed neix ha?”

De gangj daengz coenz vah doeksat haenx, rongx ndaej sing sang raixcaix, nyinzhoz haenqbongq hwnjdaeuj yienhsag.

Boux gunghcoz yinzyenz ndaw conghcueng haenx gingz gyaeuj hwnjdaeuj yawj de mbat ndeu, lwgda de lumj miz di mazmwnh, gaengqgwt dwk naeuz: “Dou caenh rox guenj boux dajgai miz yingzyez cizcau haenx. Gij vunz mbouj daeuj banh yingzyez cizcau haenx, dou guenj mbouj daengz gyoengqde. Mwngz gangj miz vunz gai gij huq mbouj cinj gai haenx……” De daengx yaep he, vuenh lingh coenz vah naeuz: “Gij de gvi aen caepfap bouhmonz wnq guenj, dou mbouj ndaej hamjgienz guhsaeh.”

“Mbouj ndaej hamjgienz guh- saeh?” Daeglunz fanfoek ngeix coenz vah neix, daengx ndang naiqnuek, roxnyinh lumj aen gyaeuj bungq haeuj bangxciengz yaek ngunh gvaqbae. De aj bak lij yaek siengj gangj gijmaz, cix ok mbouj ndaej sing.

De ngunhngaungau, ciuq gwnz mbaw dunghcih fadcienz ceijdingh bae nungzyez yinzhangz gyau ngaenz, gaem mbaw feifadngaenz haused haenx, dangq dawz bej diet ngamq coemh feiz, mboujdanh log fwngz, lij log daengz ndawsim bae.

Dauq daengz ranz, Daeglunz dungx heiq caengz siu, mehyah youh mboen haeuj mboen ok, hoj youq raixcaix. De sawqmwh ngeix hwnj ngoenznaengz vunzlai ciengzseiz lwnh daengz aen yiedsienq denva “12345” haenx. Caen lumj “din byad doek roengz dat, deng gaeugat geuj ga”, de dwk denva “12345”, lauxsaed gangjlwnh gij saeh de deng fadcienz caeuq gij saeh mbouj goengbingz gwnzhaw.

Deq siusik baihgwnz, doengx- hwnz ninz mbouj ndaek. Geij ngoenz gvaqbae, baihgwnz miz dapfuk lo: Ginggvaq diucaz haedsaed, gij gunghcoz yinzyenz gunghsanghsoj dwg ei fap hengzsaeh, ceihfad miz baengzgawq, bouhcaeuq habfap, mbouj dwg luenh fadcienz.

“Ei fap hengzsaeh……bouhcaeuq habfap……” Daeglunz cuenq, gag damzbwdbwd, riu mbouj ndaej, daej mbouj baenz. Couh dwg coenz “ei fap hengzsaeh, bouhcaeuq habfap” neix, sawj de caencingq rox daengz, youq aen biengz neix, gvigawj lumj cieng muengx caxcadcad ndeu, miz di vunz cix ndaej seizbienh daj gij congh ndonj haeujok, hoeng doengh boux lauxsaed lumj de yienghneix, baez doengh di ndeu couh deng laengz.

Youh dwg ngoenz haw ndeu, de ciuqyiengh dauqbae gwnzhaw baij dan. Gij luenh gwnz hawciengz lijdwg lumj yiengh gaeuq, saekseiz lij lai youqgaenj gvaqbae. Boux gai huqyaez cuengq gvangjgau yinhyangj sing engq gok engq laeglaeh nukrwz, boux gai iensei seng’eiq engq hoengh, boux gai swhliu luzhozcaij caeuq gyoengq “caijminz” doxyaeng engqgya angqfwngfwng. Baihnaj aen dan de, ciuqyiengh cingxyiu, nengznyaen mbouj lai duz.

De dinghdingh cim gaiq yingzyez cizcau de, gaiq “fouz henndang” de neix, seizneix cix lumj gaiq gingq ndeu, ciuq ndaej raen gij hukngawz caeuq gujbanj de cingcing cujcuj. Gaiq ceijsaw neix, mbouj ndaej daiq saek di baujcang daeuj hawj de, dauqfanj baenz aen gabgaz geb youq gwnzhoz de, sawj de baenz boux vunzbamz deng gij gvigawj haenx cug ndaetndwt ndeu.

Daeglunz ndawsim doeknaiq dangqmaz, de mbouj caiq saenq baihgwnz, mbouj caiq saenq gunghsanghsoj. Doenghbaez de saenq gaenx guh ndaej baenzmiz, hengij soujfap baenz vunzndei, cingqheiq coengh boux lauxsaed, hoeng seizneix cungj mbouj saenq lo.

Banhaemh, daengz mwh soudan lo. Ndithaemh ciemhciemh doiq lo, lij caenhliengh ciuq haeuj ndaw hawciengz luenhyakyak neix daeuj, lumj sij mbouj ndaej aen hawciengz bienq laep、bienq gyoet.

Daeglunz caengz lumj baez- naengz gaenj sousib doxgaiq. De dinghdingh ndwn youq henz dan, lumj ndaek moegyou nei, ngumhngaeuz de deng ndithaemh rag bae raezri. Lwgda de loq senj gvaq gaiq yingzyez cizcau, gaiq ceij geng de yungh geujceij bozmoz cingsim duk gvaq haenx. De iet fwngz bae dawz gaiqde roengz- daeuj, aeu byai lwgfwngz yaengyaeng lumh aen dozanq gozveih, lumh aen mingzcoh bonjfaenh……

Doeklaeng, de song fwngz gaem song gok cizcau, laep da laep rwz yungh rengz baez sik.

“Cet——”

Aen sing sik ceij vaih ndeu, yienznaeuz mbouj gok, cix lumj byajmyeb myigyap. Daeglunz sawqmwh dinfwngz riengjret hwnjdaeuj, fili fwdlwd, gaiq ceij geng haenx sikhaek deng sik ndaej soiqsub, sanqyag doek youq gwnzdieg.

Gij ceijsoiq haenx, miz di sinz daengz gwnz mbawbyaek naeuh ndawhaw, miz di mbin daengz gwnz nyapnyaj gwnz diegdeih bae.

De mbouj caiq lai yawj saek da, gipgak gij doxgaiq de baij daengx ngoenz mbouj miz vunz cam haenx roengz geij aen daehnaengngwz, vutvak hwnj gwnz cisamloek. De naengh hwnj gwnzci, gyaeuj mbouj nyeux dauq, fwngz couh baenq dienhmonz hai ci, loekci gyanx gvaq gij ceijsoiq haenx yiengj “sedsedsed”.

Mbwn ciemhciemh laepfuemx, Daeglunz hai cisamloek coh aen mbanj de dauqbae fwdfwd. Aen mbanj de yienznaeuz naz byom reih ndok, hoeng cix ndaej seng de ciengx de.

Gwnzhaw, lij lumj ngoenznaengz mbouj daih baenz haw, hoeng cix lij miz vunz dajgai, nanz mbouj nanz raen miz geij boux vunz lauh haw, lumj mbouj ok gijmaz saeh gvaq. Gij ceijsoiq hausak sanqyag haenx, mbouj rox seizlawz gaenq deng boux baet nyapnyaj baet deuz lo.

(2 sat)

编辑：实习生蒙宁霜复审：黄慧华终审：蒙树起