Boux Ndawsim - 广西民族报网

Boux Ndawsim

来源：广西民族报网

作者：□ Yiz Ciz/余执

发布时间：2026-07-07

Sai：

Nuengx hai ginglaujyen,

Gaej genz ngaenz mbouj doh,

Miz gou daeuj bangcoh,

Loh gungz hix mbouj lau.

Mbwk：

Ndaej coenz vah beix gangj,

Sim gou angq lailai,

Mbouj naemj cienz naemj caiz,

Hawj vunzlai caux laeh.

Sai：

Duzroeg miz rongz youq,

Bouxgeq aeu miz ranz,

Mwngz raen gou baenz gvan,

Caiq nanz gou hix coengh.

Mbwk：

Seizneix gou miz beix,

Mboujcaiq heiq caiq you,

Song boux daeuj doxnaeuz,

Saeh mbaeu lumj naq mbin.

Sai：

Nuengx mwngz gangj yienghneix,

Gou mbouj heiq mbouj fanz,

Guh saeh ndaej gvaq gvan,

Ranz raeuz ak gvaq doih.

Mbwk：

Mbouj yiemz gou bouxmbanj,

Ganq caeuq mwngz caux gya,

Guhdoih byaij roenbya,

Laep da gaen mwngz guh.

Sai：

Dahnuengx caen coengmingz,

Sim ndei lumj daxmeh,

Mwngz mbouj yiemz gou geq,

Deq mwngz daeuj danggya.

Mbwk：

Mbouj yiemz gou bouxmbanj,

Ganq caeuq mwngz caux ranz,

Ndaej aeu mwngz guh gvan,

Caiq mbouj fanz mbouj heiq.

Sai：

Vah gangj mbouj rox caez(liux),

Doxnaeuz bae daenggeiq,

Bak gangj mbouj baenz leix,

Daenggeiq caiq gaem fwngz.

Mbwk：

Roeggeuq caeuq vameiz,

Lienh bae caiq lienh dauq,

Gangj cien fanh coenz hauq,

Daenggeiq daeuj cauxgya.

Sai：

Soujsuz banh daengz fwngz,

Banhwnz ninz hix loq,

Miz nuengx daeuj ciuqgoq,

Gij hoj gou lumz caez.

Mbwk：

Soujsuz banh daengz fwngz,

Hwnzngoenz sim hix angq,

Miz goj guhdoih gangj,

Langhsim haising riu.

Sai：

Soujsuz banh daengz fwngz,

Doengz gwn caiq doengz daenj,

Song boux daeuj doxgaenh,

Vunz haenh raeuz mbouj dingz.

Mbwk：

Soujsuz banh daengz fwngz,

Doengz gwn caiq doengz naengh,

Gvaq gizlawz doxdaengq,

Naengh gizlawz doxdwen.

Sai：

Soujsuz banh daengz fwngz,

Raeuz gaem fwngz gangjgoj,

Guhdoih daeuj ciuqgoq,

Byaij daihloh vuenyungz.

Mbwk：

Soujsuz banh daengz fwngz,

Gyanghwnz ninz hix angq,

Mboujngeix gou bouxmbanj,

Haq lauxbanj caemh gwn.

Sai：

Nuengx mwngz haq hawj gou,

Mbouj ciengx mou ciengx gaeq,

Yaek guh gijmaz saeh,

Miz gou mwngz gaej you.

Mbwk：

Ok baezneix doxbae,

Mbouj gaem cae fuz rauq,

Gwndaenj miz beix gauq(baengh),

Bae dauq cungj vuenyungz.

Sai：

Nuengx haq daeuj ranz gou,

Mbouj doxceng doxndaq,

Naemj cawx buh cawx vaq,

Miz maz vah doxnaeuz.

Mbwk：

Baezneix byaij roen moq,

Gou lumz hoj lumz haemz,

Reihnaz mbouj yungh ndaem,

Gaem ngaenz sawj gvaq ciuh.

Sai：

Mwngz haq daeuj ranz gou,

Ok bakdou naengh ceq(ci),

Ngoenzlawz mwngz bae meh,

Aeu ceq soengq daengz ranz.

Mbwk：

Gou haq daeuj hawj mwngz,

Song fwngz mbouj lingzleih,

Gaen mwngz guh seng’eiq,

Lauheiq mwngz mbouj son.

Sai：

Ndaej caeuq mwngz caemh ranz,

Sim mbouj fanz mbouj heiq,

Miz mwngz dang gyadaej,

Yaek heiq gijmaz dem.

Mbwk：

Naeuz mbouj heiq mbouj heiq,

Gou cix ngeix lailai,

Miz saek boux lwgsai,

Cij ciep raiz ciep ciuh.

Sai：

Ngeix yienghneix hix deng,

Seng boux song hix ndaej,

Saek ngoenz raeuz ok saeh,

Lwg ndaej bae bangfwngz.

Mbwk：

Loegit cij diu seuq,

Va reuq nanz caiq hoengz,

Daeuj gap mwngz guh goeng,

Doeng sae caih mwngz dingh.

Sai：

Loegit da lij seuq(rongh),

Va reuq saek lij hoengz,

Nuengx gangj hix mbouj loeng,

Raeuz doengzsim gvaq ciuh.

Mbwk：

Daj baezneix doxbae,

Raemxrij lae coh dah,

Gwndaenj caeuq beix gvaq,

Maz saeh cungj mbouj you.

Sai：

Docih mwngz mehmbwn,

Youq gwnz cix rox boiq,

Loegit gap bouxnoix,

Boiq hawj gou baenzgya.

Mbwk：

Gwnzmbwn miz lwgda,

Hawj mwngz ra yahnoix,

Gou nienzgeij yienz oiq,

Nyienh boiq mwngz baenzgya.

Sai：

Bouxvunz yaek miz gwn,

Mehmbwn hix rox yiuq,

Yaek hawj vunz baenz ciuh,

Mbwn rox yiuq daengz raeuz.

Mbwk：

Mwngz rox gwn rox suenq,

Guhbuenq conz ndaej ngaenz,

Guh yienghyiengh cungj baenz,

Sau lawz raen mbouj lienh.

Sai：

Boux vunz youq lajmbwn,

Yaek gwn couh aeu gaenx,

Ngaenzcienz sawj rox caenh,

Mbouj haenq guh mbouj ndei.

Mbwk：

Raeuz goeng’yah caemhsim,

Yamqdin doengzdoih byaij,

Seizneix raeuz caengz dai,

Aeu lai guh saehndei.

Sai：

Ngoenzcog gou dai gonq,

Mwngz onj gaen lwg gwn,

Mwngz gag youq mbouj mwn,

Gaen lwg gwn fuengbienh.

Mbwk：

Mwngz ak lumj gukbeuq,

Baenzyouq heuh naeuz dai,

Mwngz cangq lumj duzvaiz,

Gangj dai mbouj baenz vah.

Sai：

Gou nienzgeij lai hung,

Cuengq fwngz ce mwngz gonq,

Nienzgeij lai baenz donh,

Dai gonq dwg cingqciengz.

Mbwk：

Mwngz naeuz yienghneix go,

Mo simdaeuz doeknaiq,

Mwngz caen dai dahraix,

Gou guhmaiq gyangranz.

Sai：

Caiq yienghlawz yienghde,

Mbouj ce mwngz nuengxgyaez,

Ga loh raeuz lij raez,

Bae caeuq mwngz cauxgya.

Mbwk：

Bakbak cungj gangj dai,

Gyaez lai vunz mbouj rox,

Gou gyaez haemz gyaez hoj,

Mbouj rox yienghlawz naeuz.

Sai：

Gou gyaez mwngz lailai,

Caengz dai gou cix daengq,

Gou bae nuengx youq laeng,

Baengh lwg raeuz cix baenz.

Mbwk：

Mwngz naeuz gyaez gou lai,

Yaek dwen dai guhmaz,

Raeuz gaemfwngz baenaj,

Gvaqdah hix mbouj lau.

Sai：

Gyaez dwg gou gyaez lai,

Dai dwg gou dai gonq,

Daengq coenz hau coenz fonx,

Gou cij onj cuengq fwngz.

Mbwk：

Banseiz gohyoz ak,

Bak bi hix mbouj dai,

Mwngz lauxsaed lumj vaiz,

Gangj dai mbouj yungzheih.

Sai：

Raeuz dox gyaezyenyen,

Cingz genq guhdoih byaij,

Raeuz doxgyaez doxmaij,

Guhdoih vaij hwnjroengz.

Mbwk：

Naeuz gak boux vunzlai,

Lix wnggai doxndiep,

Saek ngoenz baez doxbiek,

Yaek ndiep hix mbouj raen.

Sai：

Naeuz gak boux vunzlai,

Lix wnggai doxdaengq,

Boux caemh ninz caemh naengh,

Mbouj daengq sim hix genx.

Mbwk：

Naeuz gak boux vunzlai,

Lix wnggai vuenyungz,

Ngoenzcog dai bae mbwn,

Baelawz yungz baez ngeih.

Sai：

Naeuz gak boux vunzlai,

Wnggai rox guh’angq,

Vunz caengz dai roengz namh,

Guh’angq ndei gvaqngoenz.

Mbwk：

Raeuz seng daeuj deng seiz,

Bungz gij ndei gij angq,

Daengngoenz ronghrangrang,

Langhsing daeuj eu fwen.

（2 sat）

编辑：实习生蒙宁霜复审：黄慧华终审：蒙树起