Boux Ndawsim - 广西民族报网

Boux Ndawsim
来源：广西民族报网
作者：□ Yiz Ciz/余执
发布时间：2026-07-07
Sai:
Ndaejnyi sing roeg heuh,
Roeggeuq rox vameiz,
Sing heuh ndei heuh ndei,
Vameiz rox beghag.
Mbwk:
Ndaejnyi beix hai sing,
Sim mbin lumj loek baenq,
Nyi sing da mbouj raen,
Youq gaeklaenz ngve’ngve.
Sai:
Ngoenzgonq nuengx cix naeuz,
Mbouj vut raeuz baenz cienh,
Seizneix nuengx sim bienq,
Beix genxhoz yaek dai.
Mbwk:
Vah gou gangj ndaej ok,
Mbouj dwg nyog sim mwngz,
Ndaej bae caeuq beix gwn,
Ciuhvunz gou ndaej canh.
Sai:
Seiqcib bi laj din,
Sim fanz mbouj miz yah（baz）,
Ngoenzneix raeuz raennaj,
Caiq gangjvah baez ngeih.
Mbwk:
Lwg bouxsai miz naj,
Gangj vah gvai dwk raeuz,
Bakbak naeuz mbouj aeu,
Gwn caeuz hix doxheuh.
Sai:
Aeu baz mbouj deng seiz,
Raen gwnvei（vi）  liuxnauq,
Gangj bae caiq gangj dauq,
Baenzlawz cauh gyaranz.
Mbwk:
Gvanbaz dang lauxbanj,
Ndwenndwen canh ndaej ngaenz,
Gwnninz cungj doxgaen,
Da raen vunz mbouj yiuq(yawj).
Sai:
Gou vunz mingh mbouj ndei,
Ngeix daeuj cix gag ndaenq,
Vunz yiemz gou ndang daemq,
Ce(cuengq) lumj raemx gak vaengz.
Mbwk:
Mwngz gvai lumj lauxsae,
Rox coenz bae coenz dauq,
Doeg aen maz hagyauq,
Gou bauqmingz bae hag.
Sai:
Mwngz cam yienghneix vah,
Ajbak mbouj miz coenz,
Bouxvunz gou daiq moen(huk).
Ngoenzmaz ndaej mwngz coengh.
Mbwk:
Beix mwngz gangj yienghneix,
Gou hix ngeix ndaej raen,
Langh mwngz yawj gou baenz,
Gaen mwngz bae gvaq ciuh.
Sai:
Nuengx mwngz bwnda sang,
Gyang roen daeuj doxgoq,
Ce gou youq daihloh,
Ra boux goq mbouj miz.
Mbwk:
Baz gonq vut ce fwngz,
Mwngz miz gou ciuqgoq,
Raeuz caiq caux roen moq,
Cungj miz loh ndeu doeng.
Sai:
Gag gwn youh gag ganq,
Ra boux gangj mbouj raen,
Ndaej dahnuengx daeuj gaen,
Baezneix raen mbwn rongh.
Mbwk:
Mwngz dwg vunz ndawsingz,
Gwn nohcing guh donq,
Gou bouxmbanj noh fonx,
Fonj ndang hix bungz rin.
Sai:
Mbouj yiemz vunz lajmbanj,
Cijaeu gangj vah caen,
Mwngz nuengx da raen baenz,
Gaen gou daeuj guhdoih.
Mbwk:
Gou gangjhek mbouj rox,
Gou gangjdoj mbouj raeuz,
Bae guh yah lajlaeuz,
Lau vunz naeuz gou rungh.
Sai:
Gou dwg boux lauxbanj,
Ngoenz ganq haujlai hong,
Gou mbouj lau najmong,
Song raeuz guhdoih youq.
Mbwk:
Mwngz dwg boux lauxbanj,
Ngoenzngoenz ganq aeu ngaenz,
Bouxboux da yawjraen,
Baenzyouq mbouj miz yah.
Sai:
Gou dwg rox ra ngaenz,
Caen mbouj rox ra yah,
Banseiz ndaej seiqhaj,
Cij roxnaj daengz mwngz.
Mbwk:
Mwngz ndawdaeh miz ngaenz,
Baenzyouq rox dauzheiq,
Gou vunz mbouj lingzleih,
Lau mbouj eiq sim mwngz.
Sai:
Nienz yied bi yied laux,
Baedauq youq mbouj ndei,
Hoj boux baz mbouj meiz(miz),
Caen boihseiz boihnanh.
Mbwk:
Gou dwg lwg bouxmbanj,
Mbouj rox gangj vahndei,
Haq hawj boux ndaw hei(haw),
Lau vunz dawz bae lwnh.
Sai:
Boux ndaem reih ndaem naz,
Guh baz gou mbouj yienq,
Cijaeu sim mbouj bienq,
Doxlienh daengz gyaeujhau.
Mbwk:
Gou naeuz mwngz lauxbanj,
Lajmbanj dwg roenbya,
Gvaq ndaw ndoeng ndaw nya,
Lau genga mwngz manh.
Sai:
Ok baenzneix baenaj,
Caj mwngz daeuj caemh ranz,
Miz boux baz bien ndang,
Saedceij van lumj doih.
Mbwk:
Raeuz miz sim doxgyau,
Mbouj lau nienzgeij geq,
Raeuz song boux gag leh(senj),
Bohmeh cungj ngamqsim.
Sai:
Gofaex youq gwnzdat,
Baenz mak nanz ndaej gwn,
Ok neix gou baengh mwngz,
Gwndaenj ywngh gvaq ciuh.
Mbwk:
Mwngz mbouj yiemz gou rungh,
Yungh sim caeuq mwngz bae,
Mwngz mbouj yiemz gou gyae,
Bae caeuq mwngz gvaq ciuh.
Sai:
Nuengx naeuz daeuj gaen gou,
Sim you cix gag ngeix,
Nuengx coz gou cix beix,
Lauheiq mwngz simliengz.
Mbwk:
Boux ndaej gyaeu bak bi,
De lij naemj aeu yah,
Mwngz cijndaej seiqhaj,
Saeknaj yungz doxdoengz.
Sai:
Boux ndaej gyaeu bak bi,
Miz lan caiq miz laenj,
Goet mingh gou mbouj saenh(swnh),
Ndaenq ndaw dungx ndaw caw.
Mbwk:
Lab bae ndwencieng daeuj,
Maksigloux diusienq(haiva),
Beix mwngz ndaej naih lienh,
Raeuz senj gya guhdoih.
Sai:
Haemhhaemh miz laeuj gwn,
Mbouj mwn lumj goeng’yah,
Bouxdog caen nanz gvaq,
Miz baz cij baenz vunz.
Mbwk:
Gou naeuz mwngz coenz soh,
Miz noh ndei gag gwn,
Naemj lai ciengx boux vunz,
Siengj gag gwn mbouj heih.
Sai:
Ngoenz gwn geij donq laeuj,
Vunz naeuz gou gwn lai,
Mbouj gwn ngah yaek dai,
Gwn lai vunz naeuz coengh（ngah）.
Mbwk:
Ngoenzngoenz geij donq laeuj,
Cix noix haeux mbouj gwn,
Vunz caiq lwnh daemj mbwn,
Mwngz ciuq gwn ciuq guh.
Sai:
Gwn laeuj mbouj gwn caeuz,
Vunz cix naeuz gwn lanh,
Caeuq vunzlai caemh mbanj,
Deng gangj naj hix mong.
Mbwk:
Gwn laeuj mbouj gwn ngaiz,
Vunzlai naeuz gaej heiq,
Miz ngaenz youq ndaw daeh,
Saedceij raeuz gag gvaq.
Sai:
Gwn laeuj mbouj gwn caeuz,
Vunz cix naeuz gou yoq(yak),
Hajcib mbouj baenz boh,
Miz loh maz vuenyungz.
Mbwk:
Gwn laeuj mbouj gwn haeux,
Raeuz gag souj gag gwn,
Doengzdoih youq lajmbwn,
Gwn laeuj ndei banhsaeh.
Sai:
Ok seizneix baenaj,
Duzmbaj mbin daengz ranz,
Nuengx ndaej gou guh gvan,
Mbouj yungh fanz yungh heiq.
Mbwk:
Ok seizneix baenaj,
Mbouj miz maz dauzheiq,
Miz nuengx daeuj gap beix,
Gij heiq raeuz gag lumz.
Sai:
Ngaenzcienz youq ndaw daeh,
Ra boux saej(sawj) mbouj raen,
Ndwen sou geij cien maenz,
Mbouj raen miz boux yungh.
Mbwk:
Mwngz beix miz ngaenz lai,
Wnggai gouq bouxhoj,
Guhdoih ra monzloh,
Doxnaeuz bae bang vunz.
Sai:
Mwngz ra ndaej monzloh,
Gou goq sim mbouj in,
Mwngz guh saeh miz sim,
Cien gim gou hix soengq.
Mbwk:
Go faexgeq rox naeuh,
Vunz mbouj gyaeu cien nienz,
Naemj hai ginglaujyen,
Nienz geq miz giz baengh,
Sai:
Nuengx mwngz siengj ndaej deng,
Lau mwngz rengz mbouj daih,
Gingqlaux ndaej vunz maij,
Daihdaih miz goengrengz.
Mbwk:
Raeuz hai ginglaujyen,
Nienz laux miz bouxciengx,
Sim dwg baenzneix siengj,
Yienghyiengh aeu mwngz bang.
（1）
编辑：实习生蒙宁霜复审：黄慧华终审：蒙树起