Ndiepgyaez Go Faexgeq Haenz Dahyinh

来源：广西民族报网

作者：□ Cuih Lanz raiz Vangz Gyanghmyauz hoiz

发布时间：2026-07-07

Baengzyoux dwk dienhvah naeuz:“Ngoenzcog ngoenzsinghgiz, raeuz doxcomz baez ndeu?” Gou hanbak lo. Diemj byaek seiz, gou cam de:“Gij saeh ranzcoj banh ndei la?” De riunyumnyum, han naeuz:“Banh ndei lo. Coihguh Dahyinh Bingzluz, aen mbanj dou cingqngamj youq henzsienq, lienz go faexcueng geq ndaw mbanj hix youq aen mbanj moq maj ndei lo.”

Baengzyoux gig miznaj naeuz:“Mbanj ranz Liengz ndoeng faexcueng dou, mingzcoh couh lumj aen mbanj, seiqhenz go faexcueng maj ndaej mwncup、heusausau, rangfwtfwt, mingzdaeuz riuz gyae.” De ciengzsaeq gejnaeuz, doengh go faexcueng neix ndawde, go ceiq geq haenx gaenq youq ndaw mbanj maj gyawj 220 bi, doengh go faex neix caeux couh yawj gvenq gwnz gofaex byonghmbwn haenx daengngoenz aenndwen ronghrongh laeplaep, dingq gvenq gij vahsug vunzmbanj laj gofaex, dingq gvenq duzroeg ndaw bya ciuzgitgit. Gyoengqde caemh dwg boux yawjraen aen mbanj, henhoh gyoengqvunz mbanj ranz Liengz daih dem daih, gij goekrag de senq youq benq diegdeih lajdin doxnangq doxlienz. 2023 nienz 7 nyied, cwngfuj ciubiu yaek senjndaem gij gofaex gwnz roenraemx dahyinh, dajsuenq youq song bi dauqndaw senjndaem baujhoh ndei 37 go faexgeq ndaw sienqhoengz diegcwng Dahyinh. Dingh ndei yawhbwh bi ndeu、senjndaem seiq bi、guenjhoh haj bi.

Daengx mbanj vunz cungj sij mbouj ndaej doengh go faexcueng buenx youq henz neix, gyoengq vunzmbanj youq ndaw ginz veizsin naeuz, doengh go faexcueng neix, mbouj doengz gofaex bingzciengz, dwg yawjbaenz aen suenranz, dwg gofaex lingzhoenz mbanj ranz Liengz…… 2024 nienz 4 nyied baez banhaemh ndeu, vunzlai cingq gwn caeuz, ndaw ginz veizsin miz diuz siusik ndeu: Aen singhgiz neix singhgiz roek 8 diemj, youq laj go faexgeq doxcomz, doxyaeng gij hongsaeh ndoeng faexcueng.

Banhaemh, daeng laj go faexgeq couh rongh lo, lij caengz daengz seiz haihoih, gyoengq vunzmbanj couh gonqlaeng daeuj daengz laj go faexgeq, mizmbangj naengh youq gwnz daengqrin raez henz goek go faexgeq, mizmbangj naengh youq gwnz eijcuk ranz swhgeij, mizmbangj gvanbaz daiq lwg daeuj lo, mizmbangj vunz youq ndaw hawsingz dajgoeng hix dauqma lo…… ganbu ndaw mbanj sing goksad gangj naeuz: “Coihguh Dahyinh Bingzluz dwg aen gunghcwngz hungnaek ndeu, dwg gienh saeh hung ndeu, raeuz yaek haenqrengz haeujcoengh. Doengh gij faexcueng ndaw mbanj, daihgya cungj miz gamjcingz, hoeng gawqyienz gietdingh senjndaem, raeuz yaek yawjbaenz saeh vunzlai, daihgya baenzlawz naemj cungj ndaej gangj okdaeuj.”

Ganbu ndaw mbanj ngamq gangj liux, Goeng’au Caet ndaw mbanj binienz bet goujcib bi haenx menhyetyet ndwn hwnjdaeuj naeuz: “Go faexcueng geq neix ndaej 200 lai bi lo, dwg gij geiqhauh aen mbanj raeuz. Baeznaengz yawjraen go faex neix, sim couh an’onj lo. Seizneix gou geq lo, ngoenzngoenz ragrag ngeihyienz, lij dwg haengj bae laj gofaex neix rag, sim sangjswt, caen sij mbouj ndaej go de bw.”

Bouxcoz youq diegrog dajgoeng haenx naeuz: “Dwg ha, go faex neix caeuq daengx mbanj vunz caez gwn caemh youq raeujrubrub. Bibi ndwencieng ma ranz, daj gyae yawjraen go faex neix, couh rox gaenq ma daengz ranz lo. Ranz youq, gofaex youq, goekrag couh youq.”

Miz vunz naeuz: “Danghnaeuz mbouj miz go faexcueng neix, mbanj raeuz lij heuhguh mbanj ranz Liengz ndoeng faexcueng lwi?” Gyoengqvunz youq gizhaenx dingqdaengz coenz vah neix cungj simdoengh lo, dwg ha! Faexgeq couh dwg goekmeg…… Vunzmbanj gangj liux ganbu ndaw mbanj couh bauq hawj baihgwnz.

Mbanj ranz Liengz ndoeng faexcueng doeklaeng ndaej baecinj senjndaem caet go faexcueng, ndaej daj dieg mbanj gaeuq senj daengz Cunghyangh Gvangjcangz aen mbanj moq. 2024 nienz 5 nyied, ngoenz senjndaem go faexgeq, neix hix dwg Dahyinh Bingzluz go faexgeq bak bi senjndaem go daih’it. Ngoenzhaenx, mbwn raeujrub, hoeng couh lumj baez doxbiek yiemzrwd ndeu, haujlai vunzmbanj gag daeujdaengz seiqhenz go faexgeq, gyoengqde yaek caenda yawj “bouxlaux” neix senjdieg.

Gyoengq vunzhong sien guh giva ciengzsaeq, go faexcueng geq neix ganj hung 1.08 mij、sang 12.3 mij、faexmbaw hung gyawj 20 mij, ndaeknamh hung hen goekrag faex miz 5 mij gvangq. Vihliux hen ndei gij raemx goekrag faexgeq, raed mbawfaex bae, cij ce nyefaex ganjfaex daengjvidvid, lij yungh saicug daegbied、gvangqna haenx, lumj doxgot nei heux youq seiqhenz goek namh faexgeq, daengx gofaex diuqhwnj daihgaiq 50 dunh naek, yaekaeu song aen diuqci daeuj senjndaem, aen ci daehyinh youq gwnz roen hix yaek haeujsim hai. Ginggvaq song hwnz song ngoenz, mwh gofaex deng ndit ciuq fwn rwed rumz ci gyawj 220 bi neix, maenhdwddwd daengj youq congh gumz faex aen gvangjcangz mbanj moq, gyoengq vunzmbanj caez rwed raemxyw、vanq ywdokrag、moek namh ndei le, vunzlai cij haenqrengz cuengq gaemz heiq ndeu, lij bekfwngz roebroeb, mizmbangj vunzmbanj lij simnaiq dwk raemxda rih bae.

Ganbu ndaw mbanj daengq daihgya: “Gofaex senj baenz lo, ndaej mbouj ndaej sengmaj couh yawj baenzlawz ganq. Daihgya yaek gyaez doengh diuz dongh dangj ndit、aen muengx dangj ndit neix, gagrox ciuqsouj, dox gamduk, caez ganq faexcueng ndei bae!” Vunzmbanj caemh sing caez han ndei.

Faexcueng dwg cungj faex maij raeuj cumx、hab youq ndaw namhsa maj, de did nyez lai, ndaej coihraed, seng lix ndaej nanz, ndaej maj baenz go faexgeq sangvid geij bak bi. Senjndaem gizsaed dwg go faexcueng geq caeuq daihdeih dem seiqhenz vanzging lingh baez yungzhab ndeu, yaek aeu bauj hawj namh cumx habngamj, hix yaek aeu re raemx cimq goekrag naeuh bae. Gyoengq vunzmbanj gyawj song ndwen yunghsim ganqhoh, caet go faexcueng gwnz byai faex dauqdaej did ok buek mbaw moq daih’it, mbawfaex moq heuneuneu lumj nyawhheu nei, youq ndaw ndit ngauzngetnget, lwenqmyanzmyanz, lumjnaeuz cingq coh mbwnlamz caeuq fwjhau fat ok saenqhauh bingzan.

Baengzyoux angqvauvau naeuz: “Mboengqneix gou ma ranz seiz, raen caet go faexcueng haenx maj ok mbawfaex moq engq hung、engq lai lo, gaenq cwgoemq gij ganjfaex gaxgonq coihraed haenx, baenz gofaex iq caezcingj ndeu.” De sim’angq dwk gangj, daegbied dwg roek go faexcueng haemq oiq de, gofaex yienghceij engq ndeiyawj, go dem go caezcingj baenz baiz ndeu, daengj youq henz roen Cunghyangh Gvangjcangz mbanj moq, lumjnaeuz bouxbing lieddoih nei, go faex “bouxlaux” haenx, cix goenggingq dwk an youq baihnaj roek go faex neix, ndwn youq gizgyae muengh bae, gig lumj boux laux banhcangj daudwz sang mingzdaeuz naek ndeu, cingq daiq dwk gyoengq bouxbing de, youq benq diegdeih moqsak neix cingsaenz gvaekgvaek dwk “lienh gienz”. Doengh go faexcueng neix senj daengz, hawj gij gingj mbanj moq bienq ndaej engq daegbied engq miz rengzhoengh. Seizneix vunzmbanj ngoenznaengz menhmenh bienq dauq lumj doenghbaez, daihgya cungj haengj comz youq laj go faexcueng guh hozdung.

Dingq baengzyoux gangj sat, gou ngeix daengz haujlai: Dahyinh Bingzluz, mboujdanh dwg gij lwedmeg ginghci doeng coh aenhaij, engq dwg caen bae guh ok gij saeh ciepswnj goekgaen vwnzva、gohyoz hwngfat. Senjndaem faexgeq seiz, cwngfuj aeueiq gij sim’eiq vunzmbanj, ciuq aen fueng’anq “go faex ndeu aen geiq ndeu” bae guh, ginggvaq song bi, guh liux gij hong senjndaem, gungh ancienz senjndaem le 37 go faexgeq, gofaex binienz 86 bi daengz 230 bi, ndawde senj daengz mbanj ranz Liengz caet go, senj daengz Ginhcouh Yenzbozyenz cibgouj go, gizyawz cungj youq dieggyawj senjndaem, baudaengz go faexcueng、go laehcei、go’nganx、goraeu caeuq gorungz, seizneix doengh go faexgeq neix gaenq senglix、maj ndei lumj gaeuq.

Doengh go faexgeq neix buensenj、lix youq、sengmaj, gyoengqde mboujdanh dakdawz gij saenqsik cwngci、ginghci caeuq vwnzva, miz gij gyaciz lizsij、swnghdai、vwnzva caeuq gingjgvanh gig sang, engq dwg yienghceij minzcuz ndaejgeiq yawj ndaej raen haenx. De hawj raeuz yawjraen hwnqguh dahyinh caeuq baujhoh faexgeq ndaej caez guh mbouj doxdingj, hwngfat caeuq henhoh doxyungz caez seng. Vunzloih mboujduenh baenaj, hix dwg vihliux baujhoh ndei gij doxgaiq ceiq insik……Aeu miz gij siengjmuengh hunggyae ndawsim naemj daengz coglaeng, hix aeu ce ndei gij lizsij dijbauj doenghbaez.

Doengh go faexgeq neix, youq ndaw bi- gvaengz gyoengqde, caeux couh souyo gij saehgonq ndaw mbanj gaeuq, gij nga faex moq mbehai haenx, cix yaek caeuq seizdaih moq caez dingq gij singdig aenruz gwnz dahyinh yiengjbotbot, de rengzrwd giengzak, lienzciep diegdeih ngoenzlwenz、ngoenzneix caeuq ngoenzcog, gyoengqde mboujdanh dwg gij yizcanj mbwndeih, engq dwg gij siengjniemh ranzmbanj youq ndaw sim raeuz ciengxlwenx mbouj doiqsaek.

编辑：实习生蒙宁霜复审：黄慧华终审：蒙树起