Heiq Ciengmoq - 广西民族报网

Heiq Ciengmoq

来源：广西民族报网

作者：□ Vangz Civeij/黄志伟

发布时间：2026-07-07

Mwh gou lij iq, gij Heiqcuengh lajmbanj gig mizmingz. Mwhhaenx, gij gwndaenj gig genjdanh, hozdung guh’angq noix dangqmaz, moix daengz cieng, cienz mbanj vunz cungj iethoz muengh ciengz Heiqcuengh ndeu.

Ndaejgeiq aen daizheiq laemzseiz dap youq dieghoengq gvangqlangh gyangmbanj, geij gaiq benj doxgyoeb, geij mbaw manh baexdangj, aen daizheiq couh dap baenz lo. Moix baez dingqnyi sing gyonglaz yiengjhumhum, dou couh lumj duzfangz hwnj ndang nei, daj ndawmbanj gak aen goxlox buet daengz dangqnaj daizheiq. Gou iqet, ngiengx gyaeuj yawj raen boux canghheiq bak maeq naj sau youq gwnzdaiz loengh heiq haenx, ndawsim gou cungj dwg cibfaen boiqfug. Gyoengqde ciengqciengq diuqdiuq, youq ndaw lwgda gou cungj dwg baenzlai miz yinxdaeuz, lumjnaeuz daiq gou byaij haeuj aen seiqgyaiq geizmiuq linghvaih bae. Gou maez youq ndaw goj gaeuqgeq haenx, vih yinghyungz hoenx hingz angqfofo, vih hoenx saw siengsim. Ciemhciemh, naedceh ndiepgyaez Heiqcuengh ndeu, youq ndawsim gou, doek rag fat ngad.

Riengz nienzgeij demmaj, naed ceh neix yied majsang.

Gou haihij ciuqei gij yienghceij boux canghheiq loengh hwnjdaeuj, youq ndaw ranz yungh geu gaen daxmeh doiq gingq beijveh gak cungj dungcoz, ndaw bak nam daizswz. Aen loqsiengj gou hix ciemhciemh cingcuj hwnjdaeuj. Gou siengj dang boux canghheiq ndeu, ndwn youq gwnz daizheiq cungqgyang, yienj aen goj gamjdoengh vunz ndeu. Hoeng, diuz roenloh minghyinh gou youq mwh gou doeg cuhcungh sawqmwh gaijbienq lo. Haenx dwg aen nienzdaih ngaiziek caeuq gungzhoj ndeu, saedceij ngoenz beij ngoenz hoj. Caenhguenj daxboh itcig yaemzyaemz daemxcengj, hoeng gij rapnaek gwndaenj, doeksat vanzlij dwg hawj de diemheiq mbouj ndaej. Gou da yawj daxboh caiq mbouj miz banhfap cengq roengzbae, gij loqsiengj ndawsim gou hix yaek doek roengzdaeuj. Doeklaeng, youq cuhcungh bizyez le, gou mbouj ndaej mbouj biek hagdangz, ma ranz, gwed faggvak, riengz rizdin daxboh bae, naj coh namhhenj hwet dingj gwnzmbwn bae “gaijcauh digiuz”.

Gij saedceij haenx, ndawsim gou mbouj gamsim lumj raemxrongz nei mboujduenh nyoengx baenaj, hoeng gij doegsieb yienhsaed hawj gou mbouj miz rengz cukcak. Gou cijndaej youq mwh guhhong, mbouj ok sing, mbouj dingz mbouj duenh dwk dauqngeix doenghgij gingjsaek gyaeundei gaenq youq laj daizheiq haenx, yienghhaenx bienqbaenz naetnaiq gou.

Gvaqlaeng, aen ndangdaej daxboh yied daeuj yied yaez, youq mwh de yaek laepda gvaqbae, de rag fwngz gou, ndawda de cungj miz cungj hojsik ndeu. De naeuz, de ciuhvunz neix mbouj miz maz siengjmuengh, couh siengj caiq yawj ciengz heiq ndeu, yawjraen gij heiq lajmbanj bienq fouqmiz, yaepyet raemxda gou couh lae mbouj dingz. Gou rox, aen nyienhmuengh genjdanh neix, youq seizhaenx, cix lumj gij fangzhwnzloq baenz gyae gaeb mbouj dawz. Saedceij ciuqgaeuq sinhoj, swnghcanj fuengsik doeklaeng, gwn imq daenj raeuj cungj caengz ndaej cienzbouh gaijgez, baenzlawz youh miz ciengz heiq baenzneix ne? Ndigah aen loqsiengj bae doeg yienjheiq yozyen、 dang canghheiq gou, youq ndwenngoenz gungzhoj neix cienzbouh feiz ndaep lo, gienh saeh neix youq ndawsim gou ciengxlwenx in mbouj dingz.

Seizgan lae lumj raemxmboq, hix lumj aen loekci baenq bae hoho, gij bienqvaq Cungguek mbwn fan deih boek. Gohgi hwngfat riengjvaiq hawj vunz da yawj mbouj gib, Q Q、veizsin daengj doenghgij hongdawz doengsaenq neix hawj vunz caeuq vunz doxliz engq gyawj, doujyinh daengj bingzdaiz sibinz dinj engq hawj gyoengq vunzlai bingzciengz miz aen daizheiq mbebaij bonjfaenh.

Haj bi gonq, daxmeh gaenq betcib roek bi lauxsouh. Youq baez cieng ndeu, de naeuz de siengj yawj ciengz Heiqcuengh ndeu, gij muengh de daj lwgda loh okdaeuj, hawj gou siengj hwnj gij simnyienh daxboh, siengj daengz gij vah de mboujcaengz dai seiz gangj haenx, hix doengh gij roenloh ndawsim gou caem daengz giz laeg bae. Yienghneix, gou caeuq geij boux cejnuengx doxyaeng, gietdingh swhgeij doenghfwngz, vih daxmeh yienj ciengz Heiqcuengh ndeu.

Dou mbouj miz bonj sawheiq, couh gag cauh ok aen siujbinj ndeu, mingzcoh heuh guh 《Bang Gungz Duicangj Haeuj Mbanj Daeuj》. Aen siujbinj iq neix gangj aen mbanj gungzhoj ndeu, bang gungz duicangj daiqlingx vunzmbanj ranzranz ciengx mou ciengx gaeq, ciengx cwz ciengx vaiz; ndaem mak ndaem gva, hai roen cawx ci daengj, vunzlai byaij hwnj diuz roen fouqmiz. Dou leihyungh daxhongh ndaw ranz dangguh daizheiq, genjdanh baijbouh di hongdawz ndeu, yienznaeuz genjdanh miz di rwix, hoeng cungj raen ndei lai lo.

Ngoenz yienjheiq, dou geij boux cejnuengx daegbied roengzsim, caenhrengz bae yienj ndei hawj daxmeh yawj. Daxmeh doq yawj doq riu, doq riu doq daej, “geij lwg fangz sou, yienj baenzlai ndei, hawj gou gamjdoengh raemxda lae lo.” De doq vuet raemxda doq naeuz.

Ngoenzhaenx, daxmeh caencingq angq raixcaix, mbouj raen mwhlawz lumj ngoenzhaenx baenzlai simhai, dou geij boux cejnuengx got bae coh daxmeh, raen raeujrubrub lumj gong feiz nei.

Yienjheiq sat le, gij sibinz dou couh fat hwnj doujyinh bae. Haidaeuz, dou mbouj miz maz maqmuengh baenzlai, cijdwg siengj geiqloeg gienh saehcingz hawj vunz unqswnh neix, caeuq gyoengq baengzyoux ndei faenyiengj. Hoeng, gij hawj dou siengj mbouj daengz haenx dwg, aen sibinz neix gig vaiq “byaij hoengz”, ndaej daengz geij fanh danqhaenh caeuq bingzlwnh.

Haujlai vangjyoux yawj liux gig gamjdoengh, hix aenvih aen siujbinj biujyienh lajmbanj moq neix engq angqyangz vaiqvued.

Daxmeh raen gij diemjhaenh caeuq bingzlwnh gwnz doujyinh le, gwnz naj de riunyumj hwnjdaeuj. De bungz vunz couh naeuz:“Ranz gou ok canghheiq lo, ok canghheiq lo.” Mbat haenx, ndawsim gou faenh vuenheij caeuq muenxcuk nanz gangj ok bak. Aen loqsiengj gaenq mied gvaq haenx, youq seizneix lumjnaeuz youh miz rengz moq. Yienznaeuz gou mbouj baenz boux canghheiq conhyez ndeu, hoeng doenggvaq ciengz yienjheiq daegbied neix, gou cix saedyienh lingh cungj yiyi loqsiengj——vih vunz ndaw ranz daiq daeuj angqyangz, hix cwngmingz gij saedceij lajmbanj bienqvaq hungloet.

Nyeuxyawj doenghbaez, doenghgij lwgnyez yawj heiq haenx gaenq baenzranz baenzgya. Seizgan rongh lumj ndaundeiq, ciuq rongh gij roen sengmingh gou. Ciengz heiq vih daxmeh yienj neix, cixdwg geiqhauh yamq daih’it garoen ciuhvunz gou, hix hawj gou roxyiuj, gij hingzsik loqsiengj aiq dwg aenvih gwndaenj muzlienh cix gaijbienq, hoeng faenh siengjmuengh caeuq gyaepgouz saedceij gyaeundei, ciengxlwenx cungj mbouj siusaet. Youq gwnz daizheiq hung aen seizdaih neix, raeuz moix boux vunz cungj ndaej cujdung, yungh gij fuengsik bonjfaenh yienj ciuhvunz swhgeij engq ndei.

Seizneix, moix baez gou yawjraen aen vwnzva gvangjcangz ndawmbanj ngamq guh moq haenx, doenghgij lwgnyez youq gwnz daizheiq yienj cezmuz gak cungj gak yiengh, gou cungj siengj daengz mwh lwgnyez swhgeij, siengj hwnj gij loqsiengj doenghbaez. Gou gig roxyiuj, gyoengq lwgnyez de dwg caijsoq ndei, gwndaenj youq aen seizdaih gig miz maqmuengh caeuq gihvei he, gij loqsiengj gyoengqde ndaej youq ndaw diendeih gvangqlangh neix swyouz mbinfwfw. Hoeng gou hix yaek daiq faenh yienjheiq neix ndiepgyaez caeuq docih swnghhoz, laebdaeb byaij baenaj, guhcingq engq lai gyaeundei caeuq saeh mbouj bingzciengz youq benq dieg neix fatseng.

Yamqdin ndwenngoenz byaij mbouj dingz, yawj gij gojheiq caeuq yienjheiq, youq ndaw sengmingh gou doxsan baenz souj go ndeu, de ciengxlwenx boq yiengj youq ndawsim gou.

编辑：实习生蒙宁霜复审：黄慧华终审：蒙树起