Eu Coenz Fwencuengh Coux Cieng Moq

来源：广西民族报网
作者：□ Cinz Siengzcouh/覃祥周
发布时间：2026-07-07
Daengngoenz okdaeuj angj baenz gim,
Funghvuengz cix mbin daeuj doxcoh;
Ndwencieng mbwn raeuj haeuj bimoq,
Coenz fwen goenghoh guh ndeimaez(angq).

Cieng moq daeuj daengz eu Fwencuengh,
Seiqfueng beixnuengx doengz sim’angq;
Daengngoenz raeujrub youq mbwn sang,
Gyoengqraeuz angqyangz ciengq guhdoih.

Ngwzgim baet rieng liz bae gyae,
Rumzcin feifei ci gwnzlaj;
Duzmax haidin bongh baihnaj,
Fukheiq gwnzlaj cungj miz caez.

Haeuj daengz ndwencieng ngoenzneix moq,
Coenz fwen goenghoh guh ndeimaez(angq);
Haeuj gij moqnaj ngoenzneix bae,
Cienzcaiz hwnj lae cungj mbouj duenh.

Gaiq gyaeu gaiq leih hawj bouxgeq,
Gaiq fat gaiq geh(vuenyungz) hawj bouxcoz;
Vunz youq gwnzbiengz riuhoho,
Vuenyungz swnghhoz lumj dangzrwi.

Bi’gvaq bi’ngwz raeuz simmboeng,
Roq nyenz roq gyong nauh dangqmaz;
Maxbauj buet daeuj fwen goksa,
Mbanjgwnz mbanjlaj vunz sim hoengh.

2026 bi duzmax,
Daihdeih gwnzlaj va hai hoengz;
Gya’gya hohhoh cungj riu mboeng,
Ndwenngoenz vuenyungz hwnj mbaek sang.

Bimax daeuj daengz seiqdaeuz ndei,
Rumzraeuj ci bae youh ci daeuj;
Mbwn doek nae hung ndei lai raeuh,
Moqnaj guh haeux ndaej rim cang.

Ciengqgo diuqfoux coux bimoq,
Daeng hoengz daeng oq lengj fouzbeij;
Bingzan vaiqlag caen vuenheij,
Goenghoh bineix fuk engq daih.

Bimoq daeuj daengz caez sim van,
Caizsaenz haeuj ranz bouxboux maij;
Seng’eiq hoenghhwd doeng seiqhaij,
Seiqfueng betbaih ngaenz rim sieng(loengx).

Lwghag yunghrengz bae doegsaw,
Cingzcik monz lawz cungj maenhndei;
Bouxlaux ndang ndongj maij damz sei,
Cungqvunz doengzcaez hag sawmaeg.

Cien mbanj fanh rungh cungj gitsiengz,
Gaiq ndei rim biengz caen vuenyungz;
Baengzyoux beixnuengx daeuj doxbungz,
Bouxboux hai dungx doengz ndoet laeuj.

Bimax cieng moq caen angq lai,
Gwnzhaw gwnzgai angqfaengfaeng;
Mbawdoiq baez diep fukheiq daengz,
Sing bauq dek yiengj doengh daengz mbwn.

Gwn ngaiz gwn ceiz youh gwn faengx,
Daengx ranz vunz naengh gangj gojgaeq;
Bimax bouxboux miz fukheiq,
Mauxdan hoengzmaeq cienfanh ngoenz.

Cieng moq saeh’angq lai baenz roix,
Seiqcung Cienzhoih yaek yozsiz,
Daihhoih cingsaenz saedcaih ndi(ndei),
Gwnzlaj gizgiz aeu caez hag.

Seiqcung Cienzhoih rumzcin raeuj.
Doengzcaez fwndou ndit rongh oq;
Duzmax buet vaiq byaij fouqloh,
Fuk daengz fanh hoh caeuq cien gya.

Seiqcung Cienzhoih lumj daeng rongh,
Gyo de ciuq ndongq gwnz biengz caez;
Lajmbanj ndawsingz doengz simmaez(angq),
Ngoenzneix doengzcaez daeuj guh beij(fwen).

Seiqcung Cienzhoih vix fuengyiengq,
Caen lumj aen daeng ciuq rongh doh;
Hwnqguh giengz guek hai loh moq,
Vih minz guh doh gaiq vuenyungz.

Cidu baujcang dwg goekgaen,
Lumjbaenz faex hung cab roengz namh;
Ceihleix yauqnaengz ndaej daezsang,
Guekcoj onjdangq yienghyiengh hwng.

Dangj raeuz lingjdauj dwg haedsim,
Ndaundeiq ndongq gim vix coh rongh;
Doengzcaez roengzrengz yiengq naj bongh,
Fukhwng loh rongh vunz angqyangz.

Eifap ceih guek ok yiengh moq,
Couhlumj aenmboq ok raemx van;
Goengbingz cingqngeih ronghcancan,
Beksingq raen van gvaq dangzrwi.

Gohgi cauhmoq mbinfifa,
Couhlumj duzmax buet mbouj dingz;
Cung byoengq gaiq laengz itdingh hingz,
Guekgya caencingq miz maqmuengh.

Lajmbanj hwngvuengh guh ndei coek(lai),
Couhlumj fwn doek rwed gohaeux;
Canjyez hwngvuengh minz baenz fouq,
Ndaw mbanj dingh gyaeu ngoenz dem ngoenz.

Doengzcaez baenzfouq dwg moegbiu,
Dahhung diuzdiuz yiengq baihdoeng;
Boujcaez benjdinj coi baenzgoeng,
Bouxminz simmboeng coh daengngoenz.

Swnghdai vwnzmingz yaek guh oek(hoengh),
Ndoeng miz faexloeg fuk mbouj duenh;
Byaheu raemxloeg gim mbouj vuenh,
Lwglan cungj gyuenj(caez) ndaej fuk caez.

Vwnzva gagsaenq laeb giekdaej,
Cien duj va maeq baengh namh biz;
Cienzswnj cauhmoq bae fanh bi,
Biengz raeuz gizgiz vwnzmingz doh.

Minzswngh baujcang ceiq habsim,
Couhlumj rumzcin raeujfufw;
Nyez miz saw doeg bingh ndaej yw,
Lij miz ngaenz lw yo coq daeh.

Gaijgwz hailangh caiq hwnjdin,
Daihhaij ruz mbin buq fanh nanz;
Gamj nyoengx gamj sawq maeuz fazcanj,
Mbwn engq lamzlamz raemx engq saw.

Minzcuz doxgiet ndaet youh ndaet,
Sigloux giet naed mbouj faen hai;
Doengzsim doengzdaek riengz dangj byaij,
Rex fwngz hamj haij mbouj doxcuengq.

Guekgya ancienz sim doxlienz,
Ciengzsingz cien nienz ndaej onjdingh;
Henhoh guekcoj dawz sawjmingh,
Guekgya onjdingh yienghyiengh baenz.

Coengz yiemz ceih dangj mbouj mbitmbeuj,
Couhlumj rumz seuq ci mbouj dingz;
Ganbu singjseuq cozfungh cingq,
Gaiq raeuz beksingq ceiq cix maij.

Yungh gauhcizlieng daeuj yinx loh,
Lumj ndaem naz bo ndaej haeuxlaux;
Cienjhingz swnggaep daez cizyau,
Ginghci mbouj lau mbouj ndaej hwnj.

Gihcwngz ceihleix yaek ca ndei,
Guh ranz giekdaej yaek aeu maenh;
Doengz guh doengz ceih huzndei haenq,
Bouxgyae bouxgaenh(gyawj) cungj sim caez.

Doiq rog hailangh dou engq hung,
Couhlumj maedfung(duzrwi) aeu va dangz;
Doengz leih doengz hingz maeuz fazcanj,
Youjyiz va angj gizgiz rang.

Gocoengz daengj ndwn youq bakgemh,
Lijsiengj saenqniemh mbouj doenghngauz;
Riengz dangj byaij roen mbouj loek nauq,
Fukhwng yied gauj yied baenz gwn.

Dingj hoj fwndou ceiq youqgaenj,
Couhlumj feiz haenq coemh gim roix;
Gung geng gaek nanz cungj mbouj doiq,
Doengzcaez guhdoih bae buekguh.

Cienzhoih cingsaenz dawz haeuj sim,
Couhlumj vat gim ndaej fanh liengx;
Cungqvunz haenqguh byaij doxriengz,
Giengzguek loqsiengj baenz dahraix.

Miz aen daeng rongh youq baihnaj,
Gwnzgwnz lajlaj miz maqmuengh;
Daengq gaiq vunzlai gyoengq beixnuengx,
Biengz engq miz muengh youq ngoenzlaeng.

Seiqcung Cienzhoih raeuz doengz hag,
Bouxboux rengz ak daeuj gwn cieng;
Dingq dangj gangj vah haenqsim riengz,
Bineix gwn cieng ceiq daegbied.

Seiqcung Cienzhoih cingsaenz ndei,
Hawj raeuz doxbae miz maqmuengh;
Vah daengq mbanjranz gyoengq beixnuengx,
Doengzcaez maqmuengh bae lozsiz.

Angqcoux bimax daeuj daengz moq,
Dujva hai oq gwnzbiengz mwn;
Doengzcaez roengzrengz hag lijlun,
Dingh guh baenz gwn do(gvaq) ngoenzgonq.

Doenghnaz gizgiz gomiuz maj,
Ndwenngoenz yied gvaq yied habsim;
Gaenx guh namhhenj bienq baenz gim,
Gwndaenj lwgminz ngoenzngoenz hoengh.

Bimax cieng moq heiqsiengq moq,
Gwnzbiengz miz doh saek heu loeg;
Fwn raeuj rumzcin nyumx faexndoek,
Guekcoj mboekmboek(mbaek) hwnj bae sang.

Cieng moq bimoq miz maqmuengh,
Ndawsim loqsiengj cingq ndongqrongh;
Swnh rumz buq langh yiengq naj bongh,
Swnghhoz vuenyungz gvaq saenzsien.

Duzngwz vaiqvaiq deuz haeuj ndoeng,
Duzmax riu mboeng buet daeuj daengz;
Cungqvunz haenq guh mbouj doeklaeng,
Ndit rongh lumj daeng ciuq biengzdeih.

Guekcoj vuenyungz youh anningz,
Gwnzbiengz lwgminz angq eu fwen;
Bimax gitsiengz miz ciengxlwenx,
Sim vunz hai swenz cienfanh daih.

Beijfwen ciengq lai bak hix naet,
Gij foux saet lai ga hix naiq;
Danghnaeuz beixnuengx sou lij maij,
Caj gou yietnaiq youh lingh(caiq) damz.
编辑：实习生蒙宁霜复审：黄慧华终审：蒙树起