“Canghgauq” Lajmbanj - 广西民族报网

“Canghgauq” Lajmbanj

来源：广西民族报网

作者：□ Cungh Hihcwngh/钟希增

发布时间：2026-07-07

Mbanjnden Mbanjnazbaiz miz diuz mieng gaeuq ndeu daj Dahyiengjsuij daengj raemx dauqma dwk naz. Mieng dwg miengnamh, raemx laeuh naez cwk gig youqgaenj, bibi cungj deng couz ngaenz baij vunz bae cingleix gvetdoeng, neix baenz le diuz rapnaek gyoengqvunz Mbanjnazbaiz. Fwtfwh ngoenz ndeu, Cin Nungzyez Fuzvu Cunghsinh Couh cujyin lwnhnaeuz: Baihgwnz bued ngaenz roengzdaeuj hawj gaij guh diuz mieng neix baenz mieng suijniz, ndawmbanj mbouj yungh ok saek faen ngaenz, boux bae bang guhhong lij fat cienzhong!

Gyoengq vunzmbanj angqfwngfwng, bouxboux cix haenh Couh cujyin dwg “cingqcaen vih lwgminz banh saedsaeh”. Gaenlaeng gij hong gaijcauh mieng youz nuengxbiuj Couh cujyin bau guh.

Hong sat doeng raemx ngoenzhaenx, caezgya cungj dadaengx lo: Diuz mieng suijniz lajdaej sangsang daemqdaemq, gizsang raemx lae iq, gizdaemq raemx roenx gwnz haenz. Daengj raemx roengz naz lij hoj guh gvaq doenghbaez. Doenghboux naz gyae daengj mbouj ndaej raemx haenx ndaej dungx heiq ndeu:“Neix coih gijmaz mieng! Mbouj coih lij lai ndei gvaq!”

“Raemx dwk naz cungj mbouj cukgaeuq, diuz mieng neix lij miz roet yungh ha?”

Miz vunz yaek ra Couh cujyin, cix miz vunz laengz naeuz: “Cujyin dwg simndei bang raeuz, raeuz mbouj ndaej bae vaeznanz de ha!”

Cingq youq mwh gyoengqvunz mbouj rox baenzlawz guh, Vangz Cwngginh lauh daeuj daengz lo. De ndij haenzmieng doq byaij doq sijsaeq yawj, doq bi gyaeuj danqheiq.

Banhaemh, de ndaemq haeuj ranz laujduicangj bae gangjgoj. Geij cenj caz roengz dungx le, bak couh lai lo. “Beixlaux ha.” De gangj vah ndawsim, “guekgya bued ngaenz roengzdaeuj, diuzmieng raeuz cix guh baenz gij gunghcwngz nyaqdaeuhfouh, mwngz naeuz byawz sieddaej? Guh baenz diuzmieng mbouj ndaej daengj raemx roengz naz, sou lau vaeznanz mbouj gamj gangj, vunz cix canh ngaenz rimdaeh lo!”

De baez diuz baez diuz lwnh: Gunghcwngz habdoengz、baihgwnz bued ngaenz、niemhsou byauhcunj、veizgenz banhfap…… Gangj ndaej miz diuz miz leix, sawj vunz hozdoengh mubmub.

Geij boux lwgcoz dingq ndaej lwed aeng daengx ndang, naemj sam naemj seiq le, doeklaeng lijdwg yungh soujgih dwk le 12345 siminz yiedsienq.

Saehcingz guh ndaej haemq swnhleih. Baihgwnz miz vunz daeuj yienhciengz cazyawj, Couh cujyin caeuq boux lauxbanj bau guh de caemh daeuj. Gaenlaeng, gezdujgih youh dauq hai daeuj, duenh mieng lawz mbouj habgek couh deng vet hwnjdaeuj dauqcungz guh.

Raemx cungjsuenq cukgaeuq lo, laecaca haeuj naz bae.

Gyoengqvunz Mbanjnazbaiz haenh Vangz Cwngginh baenz boux “canghgauq” lajmbanj miz cingqheiq ndeu, “gwnzloh raen mbouj bingz, simmbaeu bang mbat canj, doiq beixnuengx lajmbanj, yawj dangq vunz ndawranz.” De vadfwngz baez riu, gwih hwnj denceh deuz bae lo.

“‘Gauq’ geij mbat ndaej hingz, mingz- sing cienz ndaej gok, rox biengj fwj biengj mok, vunz rog caemh daeuj ra.”

Mbanjdakdien Ciz Yungjgyangz song gvanbaz ndaem miz geij cib moux faexnganqciq ngamq raemj sat, cingq yaek gyagiengz ganqguenj coi goekfaex ok ngaz aeu cauh daihngeih.

Hoeng cwngfuj sawqmwh miz vunz daeuj, apbik de “doiq faex dauq reih”! Daihdoih bingmax haeuj ndoi daeuj, miz gezdujgih, miz “vunzhong”, lij miz geij cib boux “baujanh yinzyenz” cenzfu vujcangh. Boux gunghcoz yinzyenz ndeu dawz mbaw dozceij swenj naeuz:“Benq dieg neix dwg youq ndaw hoengzsienq ‘doiq faex dauq reih’, itdingh aeu dauqfuk guh reih. Dou seizneix eifap caephengz gunghvu, byawz daeuj laengz couhdwg dingjfap!”

Ciz Yungjgyangz euq naeuz: “Gaxgonq gizneix cungjdwg ndoifwz, guhlawz gou baez ndaem geij bi faex le couh baenz ‘diegreih baujhoh’ lo ni?”

“Neix dwg veisingh ingj roengzdaeuj, gaiq dieg neix couhdwg youq ndaw hoengzsienq! ‘Doiq faex dauq reih’ dwg dangqnaj hangh hong youqgaenj guekgya baujcingq haeuxgwn ancienz ndeu, bouxboux cungj aeu boiqhab ndei!” Boux gunghcoz yinzyenz mbouj doiqnyiengh saek di.

Ciz Yungjgyangz gvanbaz yawj benq faex raemj gvaq ngamq cingleix seuq cingq caj goekfaex ok ngaz de, simget raixcaix, daej mbouj raemxda. Ceng hix ceng mbouj gvaq, dingj cix lau deng “gaemh bae naenghlauz”, cij ndei omjomj youq, mbouj gamj oksing.

Cwngfuj guhsaeh couhdwg vaiq. Vat goekfaex、hwnj luengx、doek haeuxyangz, “it diuz lungz fugsaeh”, lij ingj mbawdoz “guhcingq louzdangj”. Mbouj geij nanz, gomiuz haeuxyangz nem gorum doengzcaez hwnj gwnznamh, codaeuz lij “doxhuz caemh youq”, hoeng gig vaiq gorum sang gvaq go haeuxyangz, go haeuxyangz iet mbouj ndaej gyaeuj mbouj raen mbwn, seizseiz cix nyaetnyingj. Song ndwen gvaqbae, rumnya sang gvaq vunz, “dieg dauq reih” bienq baenz “dieg dauq fwz”.

Ciz Yungjgyangz yienznaeuz ndawsim mbouj fug, hoeng aenvih bonjfaenh nyieg lai, caiq gya hwnj neix dwg raq rumzhaenq cwngfuj gunghcoz yindung, saedcaih mbouj gamj dingj. Dingqnyi naeuz Vangz Cwngginh Mbanjluegyiemx vunz gvai banhfap lai, Ciz Yungjgyangz daegdaengq bae raen de, lij yinx de bae “yawjngonz” benq dieg deng giengzhengz “dauq reih” ce fwz haenx.

Vangz Cwngginh ndwn youq gwnz dingjndoi, muenghyawj benq “cingzcik hungloet” cwngfuj “bauj haeuxgwn ancienz” neix, nanznanz mbouj w saek coenz. De dawz soujgih okdaeuj ingj le geij mbaw doz: Gorum go’em sangsad nya’nyoem, go haeuxyangz reuqroz laj goek haz, aen goekfaex hung deng vat okdaeuj dauqcawq vit……

“Laujciz ha, benq faex neix mwngz sinsin hojhoj ndaemganq nyaenxlai bi, raemj cauh daih’it ngamq ndaej bingzbonj, caj cauh daihngeih cij canh ngaenz, gyoengqde yienghneix gauj, faenmingz dwg mbouj hawj mwngz guh gwn, dwg gaj vunz mbouj yungh cax. Gyoengqde neix gyawz dwg dauq reih, dwg luenh gauj, dwg sai guekgya swhyenz, dwg huxhaih beksingq! Gou coengh mwngz bae gauq gyoengqde!”

Ciz Yungjgyangz ngaekgyaeuj dwddwd, de song da soh yawj Vangz Cwngginh, seizneix de gaenq yawj Vangz Cwngginh baenz boux “gouqsing hung” ndeu……

Geij ngoenz neix, Vangz Cwngginh cungj mbouj yamq ok bakdou, boemzdaiz yawjsaw, seiz mbouj seiz dwk denva, saekseiz gikdoengh, saekseiz doeknaiq. De fan bonj《Cunghvaz Yinzminz Gunghozgoz Dujdi Gvanjlijfaz》《Cunghvaz Yinzminz Gunghozgoz Nungzcunh Dujdi Cwngzbauhfaz》, baez cih baez cih saw bae haeb; cam boux lanbiuj de youq ndawsingz guh lizswh haenx; leixcing cwngcwz gyaiqhanh. Ciemhciemh guh baenz doi caizliuh diuzleix cingcuj、baengzgawq caezcienz ndeu.

Yawj doi caizliuh nanoeknoek Vangz Cwngginh cingjleix de, Ciz Yungjgyangz miz saenqsim lo, gaem fwngz Vangz Cwngginh naeuz:“Beix, gyo’mbaiq mwngz lai lo, caj gauq ndaej hingz le, gou itdingh mbouj vei mwngz!”

Caizliuh gyau hwnj gwnz bae lo. Baezneix caj haemq nanz, hoeng gezgoj sawj vunz sim- angq: Cin cwngfuj deng doengbauq bihbingz, mizgven yinzyenz deng gyaepcaz cwzyin, Ciz Yungjgyangz caemh ndaej ngaenz boizbouj.

Daengngoenz roengz baihsae, Vangz Cwngginh naengh youq daizhongh ciensim yawj bonj saw faplwd faenh de. Rumzhaemh ci gvaq, bonj saw fansedsed, lumj cingq geqnaeuz gijmaz. Yah de heuh gwn caeuz lo, lij nambedbed naeuz:“Ngoenzngoenz yawj bonj saw neix, ndaej dangq haeux gwn?”

Vangz Cwngginh haep saw hwnjdaeuj, yawj coh gizgyae, gizgyae miz ndoi miz reihnaz, miz mbanj miz ranz, lij miz hoenzfeiz dajcawj hwnjngeungeu. De riu naeuz:

“Saw mbouj dangq haeux gwn,

Cix son vunz fapleix,

Doegsaw doeg ok feih,

Ndaej an’onj gvaq ngoenz.”

Fwjhaemh ronghnding, ingj ndaej fouq lwgda de ronghyabyab. Couhdwg fouq lwgda de neix, ndaej ciuq rongh doengh gwnz doengh laj raeuz mbanj dem mbanj, hawj vunz miz saenqsim、miz maqmuengh.

Ginggvaq fwnfwn rumzrumz, Vangz Cwngginh lijdwg Vangz Cwngginh, daemq、o、giengh. Hoeng de byaij gvaq aen mbanj lawz, aen mbanj lawz ukgyaeuj vunz couh vaehvaeh ndaej gaijbienq. Caiq bungz daengz gij saeh mbouj goengbingz, ciemhciemh miz vunz haeujrwz baenzlawz “veizgienz” “douzsu” “gauq” lo; gij gihcwngz ganbu guhsaeh, ndawsim hix lai ngeix daengz “cwngzsi deng mbouj deng”“habfap mbouj habfap” lo.

De lumj duz byahaux ndonj roengz dingh bae, rieng baez gyauz, boengz lajraemx hoemzloedloed. De boux vunz euq, cix euq ndaej dwggyaez, gangj vah coeg rwz, cix coenzcoenz dwg leix.

Banhaemh Vangz Cwngginh gwih denceh mbanj gvaq mbanj lauhgaeugaeu, baihnaj de dwg diuzroen lajmbanj ngutngut ngeujngeuj, baihlaeng de dwg cien gya fanh ranz ciemhciemh hai daeng ronghsag.

(2 sat)

编辑：实习生蒙宁霜复审：黄慧华终审：蒙树起