Byasang Ndawsim - 广西民族报网

Byasang Ndawsim

来源：广西民族报网

作者：□ Yiz Ciz/余执

发布时间：2026-07-07

Lij iq youq hagdangz doegsaw seiz, gou couh deng aen goj 《Haj Boux Cangsw Byalangzyaz》 gamjdoengh dwk yaek gyanghwnz bae gizdieg haenx yawjyawj. Daxboh naeuz:“Hozbwz Swngj liz dieg raeuz cien leix fanh loh, baenzlawz bae, daengzcog mwngz majhung le caiq bae ba.”

Gou dingq vah daxboh, cijndaej cuengq aen goj neix youq ndawsim, gag naemj: Daengzcog baenzlawz hix aeu daengz gizhaenx bae yawj baez ndeu.

Gou doegsaw、guhhong、 baenzranz, saedceij ngoenz dem ngoenz gvaqbae, aen siengjmuengh lij iq haenx cungj mbouj caengz ndaej saedyienh.

Ngoenz ndeu, goengdaeuz doiq gou naeuz:“Yaek daengz ngoenzciet laebguek lo, raeuz aeu ndeindei senhconz gij saeh gaxgonq gyoengq hungzginh、gyoengq youzgizdui caeuq vunzdig doxhoenx haenx.”

Ciepdwk, goengdaeuz dawz mbaw ceij ndeu ndenq hawj gou, gwnz ceij raiz miz geij aen goj, heuh gou gag senj aen goj ndeu, vaiqdangq bae caijfangj guh senhconz.

Miz aen goj ndeu heuhguh 《Byacaetsing》, gou yawj gij neiyungz aen goj neix le, miz di doeksaet, gag naemj: Dieg gou baenzlawz hix miz aen goj caeuq 《Haj Boux Cangsw Byalangzyaz》 ca mbouj geijlai ni?

Geizheih、doeksaet gyaep gou vaiqdangq bae yawj aen goj 《Byacaetsing》, Gou doiq goengdaeuz naeuz:“Ngoenzcog gou couh bae Byacaetsing yawjyawj, caiq gaep geij mbaw siengq dem.”

Ngoenzlaeng haetromh, dou seiq boux daj yienhsingz daeuj daengz Bingzgoj Si Bangjhih Cin Lozhih Cunh, boux daiq roen heuhguh Luz Divaz, vunz Lozhih Cunh Mbanjgyanghhungz, de daiq dou daengz laj dinbya ndeu, naeuz:“Goengq bya neix dou heuh Byamax, gaxgonq caet boux Hungzcizginh cansw couh youq gwnz dingjbya neix diuq roengz dat bae.”

Byamax youq baihsaebaek Bangjhih Cin, goengq bya neix gyaeuj iet coh baih- namzbaek, raezrwgrwg, song gyaeuj bya faenbied miz song ndaek bo hung doed hwnjdaeuj, baihdaemq baihsang, lumj aen anmax nei daengj coh gwnzmbwn. Gyoengqvunz dangdieg couh heuh goengq bya neix guh Byamax.

Byamax daj baihnamz yawj bae dwg caeuq gij bya wnq doxrangh, dwg ranghbya raezredred ndeu, daengz baihbaek baez yawj cij rox goengq bya neix dwg goengq bya dog ndeu. Gwnz bya faex lai ndoeng ndaet, gaeugeq doxsan doxheux, geij cib bi mbouj miz vunz hwnj bya daeuj, ra mbouj raen roen, dou doq gaem cax fwet roen doq coh gwnz bya benz bae, mizseiz bin dat gvaq rin, mizseiz ndonj gvaq laj faex, ndaw ndoeng duznon raih, duznengz mbin, dou mizboux deng duznyungz haeb daengz gwnz fwngz gwnz gyaeuj cungj hwnj nwnj, mizboux gen ga deng gaeu gat、 deng oen coeg oklwed.

Aiq miz sam aen lai cung, dou cij daeuj daengz dingjbya Byamax, bouxboux hozhawq dwk conghhoz yaek dawz feiz, baeg dwk diemjcaw yaek mbouj hwnj, buhvaq ndaek hanh, daengx ndang haeuget haeumanh.

Luz Divaz naeuz, de dingq daxgoeng de naeuz, gaxgonq geij boux hungzginh cansw couh dwg daj gizneix diuq roengz dat bae lo.

Dingjbya Byamax, cungj dwg rinroujgaeq, youh soem youh raeh, vunz ndwn youq gwnz Byamax, rumz gveujfefe, ngiengx da yawj bae, doiqnaj couhdwg Mbanjgyanghhungz, ngaem gyaeuj yawj dauqlaj, laj dindat haumyagmyag geij ciengh sang, daraiz vivi, hawj vunz roxnyinh byoemgyaeuj mboeng bae.

Dingqnaeuz, 1929 nienz 12 nyied 11 hauh, Baksaek hwnjbing gvaq le, vihliux hohmaenh aen gienz Suhveizaih Dahyougyangh, Yougyangh Suhveizaih Cwngfuj gietdingh gyoeb gij cizveiginh Gyanghcouh、 Lizhih、 Bangjhih、 Lozhih seiq aen mbanj Bingzci Yen(seizneix dwg Bingzgoj Si) baenz Yougyangh Cizveiginh Duzlizyingz. 1930 nienz 5 nyied 13 hauh, Hungzcizginh Daihsam Cungdui Daihsam Yingz yingzcangj Gauh Cauz deng heuh daiq 200 lai boux bing daj Bahmaj Yen ganj daengz Gyanghcouh, dajsuenq caeuq Yougyangh Cizveiginh Duzlizyingz guhdoih roemx haeuj Nazmaj bae, hoenx aeu Vujmingz, yaek youq Byacwz laeb guh gwnhgidi. Ngoenzhaenx lajbyonghngoenz, budui daeuj daengz Lozhih seiz, deng Vangz Gveicauz、Veiz Yungjyen、 Vangz Minz- buj daengj gyoengq caeggeq dangdieg 800 lai vunz daeuj dangj roen. Aenvih vunzdig lai vunzraeuz noix, daihbet lienz lenzcangj Senj Cauzwnh daiq roek boux bing youq baihlaeng hoenx dangj vunzdig, hoh gyoengq vunzlai doiqdauq.

Ciep daengz yinvu le, caet boux bing bouxboux vid gen daj ga mbouj lau saek di, gyoengqde ndoj gungx rin gvaq laj faex buet bae con dauq caeuq vunzdig doxhoenx, vunzdig yied daeuj yied lai, sing cungq “bwngbwng bumbum” yied daeuj yied deih, yied daeuj yied gaenh, lenzcangj Senj Cauzwnh yawj cingzgvang mbouj ndei, muengz daiq roek boux bing bin hwnj Byamax bae, naemj daengz gwnz bya le caiq ra roen deuz mingh. Caet boux bing daeuj daengz gwnz dingjbya le, cij rox goengq Byamax neix dwg goengq byadog ndeu.

Baihbaek Byamax cungjdwg dathau sangvidvid, ra roen gvaqbae mbouj miz, vunzdig youq laj dinbya baiz baenz rangh ndeu, lumj aen roi nei daj laj dinbya “roi” hwnj bya daeuj, yawjraen vunzdig yied daeuj yied gaenh, caet boux Hungzcizginh couh hai cungq sawq vunzdig, hoenx daengz mbouj miz saek naed lwgyienz le, gyoengqde couh daj gwnz bya gingj rin roengzdaeuj, hoenx ndaej gyoengq vunzdig daej boh daej meh, ienq mbwn ienq ndaen. Gij rin gwnzbya cungj yungh liux lo, vunzdig couh yaek daeuj daengz gwnz dingjbya lo, caet boux cansw doxnaeuz, baenzlawz hix mbouj hawj vunzdig gaemh bae, gyoengqde fad cungq swhgeij raek liux, guhdoih ndwn youq dingjbya, daihsing heuh:“Hungzginh fanhbi, gungcanjdangj fanhbi.” Heuh sat, doengzcaez diuq roengz dat bae, dai caez lo, gyoengqde dwg: Senj Cauzwnh、 Yangz Gojcangh、 Sung Laujdwz、 Lij Givwnz、 Loz Dingdwz、 Bangz Yozngwnh、 Vangz Hizci.

Bangjhih Cin Lozhih Cunh Mbanjgyanghhungz naihlaux Veiz Yilenz dauqngeix naeuz, bihaenx de cib bi, ngoenzde banringz miz sing cungq caeuq sing hemq daj mbanj nden cienz daeuj, vunzmbanj rox doxhoenx lo, bouxgeq lwgnyez muengzfoedfoed deuz haeuj ndaw gamj gwnz byalaeng bae ndoj, mwh gyoengq Hungzginh diuq roengz dat daeuj, gyoengqde couh yawj ndaej gig cingcuj, miz roek boux doek daengz laj dat, boux ndeu gak youq gyangdat.

Ngoenz daihngeih, daxgoeng Veiz Yilenz caeuq vunzmbanj guhdoih hwnjbya bae, moek geij boux doek daengz laj haenx youq lajdat, vunzmbanj mbouj miz banhfap bin hwnj dat bae, couh noix boux gak gyangdat haenx mbouj ndaej moek. Bi 2006 vunzmbanj bin daengz gyangdat, cij raen gij goet bouxdai haenx, gyoengq vunzmbanj couh cang gij goet de roengz ndaw gimdanz bae, caeuq roek boux ndaej moek haenx cuengq youq giz ndeu.

Gvaqlaeng, gyoengqvunz ranghdieg haenx vihliux geiqniemh caet boux bing neix, couh heuh Byamax guh Byacaetsing, doeklaeng miz saw naeuz:“Baek miz Byalangzyaz, namz miz Byacaetsing.” Couhdwg gizneix lo.

2006 nienz 4 nyied 5 hauh, gyoengqvunz Mbanjgyanghhungz ranzranz ok ngaenz, guh baenz aen moh ndeu, cangq caet boux Hungzginh diuq dat vutmingh haenx youq giz ndeu, lij youq ngoenzhaenx doengzdoih sauqmoh. Yaek sauqmoh gaxgonq, gyoengq vunzmbanj gag bae ra gyoengq beixnuengx caencik gyoengq bouxbing vutmingh haenx, heuh gyoengqde daeuj itheij sauqmoh.

Bi 2013, Bingzgoj Si Yinzminz Cwngfuj haihij doenghhong guh Byacaetsing Lezsw Lingzyenz, bi 2014 guh baenz. Seizneix, Byacaetsing gaenq baenz aen dieg son’gyauq hagseng baenzlawz bae ndiepgyaez guekcoj, dwg aen dieg dangjyenz ganbu ciepsouh gwzming cienzdoengj son’gyauq, dwg yo miz aen gojgaeq beij gim lij bengz hawj gyoengq lwgminz mbouj lumz ndeu.

编辑：实习生蒙宁霜复审：黄慧华终审：蒙树起