Benzbya - 广西民族报网

Benzbya

来源：广西民族报网

作者：□ Cinz Lisinh/覃丽新

发布时间：2026-07-07

Haetromh ngoenzsinghgiz, gou cungjsuenq ndaej daj gij saeh nyapnyuk ndawde baetduet okdaeuj lo. Gaem dwk song fwngz oiqetet daeglwg byaij youq gwnz loh ndaw siujgih, gij rumz liengzsisi dangqnaj ci daeuj, dingq dwk gij sing roeg gwnz faex goksadsad, ndawsim sawqmwh gig siengj ok rog bae byaijbyaij. Mbouj dwg siengj bae lauh haw cawx doxgaiq, hix mbouj dwg siengj bae ndaw gunghyenz youzbyaij, cij dwg siengj bae yawjyawj gij gingjsaek gyaeundei daswyenz. Dauqngeix bouxgvan song ngoenz gonq gangj gou “fatfuk”, gou nyeux gyaeuj yawjyawj aen ngaeuz ndaw ndit cihgeij: Aen ndang deng nditrongh beng ndaej raezreng, hoeng aen yiengh song ga song fwngz youh coek youh dinj lij yawj ndaej cingcing cujcuj, ngauzngauz aen ndang cienqdauq, aen caekhaex caen dwg mbouj miz da yawj lo…… Ndawsim sikhaek gietdingh: Bae benzbya gemjbiz ba!

Simdoengh couh hengzdoengh, song mehlwg sikhaek dauq ranz vuenh buh vuenh haiz, bwh ndei gij doenghyiengh benzbya, gwih hwnj aen denceh, couh coh singzdoeng Byacuibingz hai bae. Caeux couh dingqgangj benz gvaq song goengq Byacuibingz, couh ndaej byoengq daengz aen Yinzminz Gunghyenz, hoeng cihgeij cungj mboujcaengz ndaej caenndang bae benz gvaq. Mboujguenj caen naeuz gyaj, ngoenzneix couh dangq daeuj damq roen, caeuq daeglwg guh baez mauhyiemj ndeu ba.

Song goengq bya neix mboujsuenq sang, hoeng doiq gou bouxvunz mbouj gingciengz ndaej duenhlienh daeuj gangj, caen dwg beij benz hwnj mbwn lij nanz ne! Ngamq byaij ndaej caet bet faen cung, song ga gou couh unqnemnem mbouj dingq aen uk cijveih lo. Yawj dwk daeglwg youh byaij youh diuq, miz riu miz gangj, gou heiq baegfefe hix mbouj gamj guhsing, riunyumnyum gaen dwk daeglwg, youh laebdaeb benz hwnjbae.

Diuz lohbya yied byaij yied lingq, caeklaiq daeglwg mienh byaij mienh ra gij doenghduz geizheih ndaw ndoeng ndaw caz guhlah, dou cix ndaej byaijbyaij dingzdingz. Caeklaiq dou ei lohbya benz hwnjbae hix nyangzraen di vunz daeuj benzbya, mboujnex aen sim hix cungj miz di sukyat. Gyoengqvunz itheij benzbya miz bouxlaux miz bouxcoz, miz bouxhung miz bouxiq, miz bouxdog hix miz baenzgyoengq baenz- bang…… Gyoengqde cangboiq caezcienz, dinbyaij riengjret, gangjgangj riuriu, yawj hwnjdaeuj wnggai caeuq dou song mehlwg baez daih’it daeuj mbouj doengz. Yawj dwk gyoengqde byaij ndaej baenzneix soengyungz, gou roengzsim byoengq gvaq song goengq bya neix youh dem ndaej geij faen saenqsim lo.

Dang benz ndaej hanh cumxdumz buh baihlaeng, dou couh byaij daengz giz dieg bingz ndeu. Ndaek rin daengj youq laj din song go faexcoengz mwncup gaek miz:“Ndaw bya ndoengfaex gyaeu, ndaw ndoeng duzroeg heuh.” Gangj ndaej caen ndei, da yawj gvaqbae, gizgiz dwg saekheu, cawqcawq nyi roeg heuh, rumz daj ndaw ndoeng ci daeuj, liengzsisi, sangjswtswt. Caiq byaij baenaj, raen aen ciengzdeih gvangqlangh, baihndaw boiq miz doenghgij gicaiz lienhndang gig caezcienz: Song aen daiz dwk binghbanghgiuz、gaiq muengx dwk yijmauzgiuz、cieng daiz dwk geiz caeuq seiq cieng daengqrin、lijmiz aen gumzsa hawj gyoengq lwgnyez lahguh cwngzbauj…… Gij bouxlaux miz boux cingq naengh gwnz eij gangjgoj, miz boux cingq naemxsim dwk geiz; doenghgij lwgnyez mizmbangj cingq doxgyaep guh’angq, mizmbangj cingq dwk giuz hanh lae hanh roenx, lij mizmbangj cingq youq ndaw gumzsa guh cwngzbauj caep cien nyaengqnyatnyat…… Youq aen “yangjbah” gag baenz neix lienhndang, caen beij gwn gijmaz baujgenbinj ndei lai lo.

Diuz lohbya raezrangh mboujsuenq gvangq, hoeng aeu rin aeu cien caep ndaej bingzbwd mbouj miz saek aen gumz, gizlingq youh guh baenz mbaek lae dieb hwnj. Din byaij youq gwnz loh, mwngz mbouj roxnyinh ndawsim couh gag boiqfug boux coih lohbya. Aenvih baez daih’it daeuj neix benzbya, gou couh miz cungj maqmuengh ndeu yaek damqdingq gij cingzgvang diuz lohbya neix. Doeklaeng cix dingq bouxgoenglaux benzbya gangj, diuz lohbya raezrangrang neix dwg gyoengqvunz ndatsim ndawbiengz gag iu gag couz coih baenz. Gij rincien bu loh gak cungj gak yiengh: Mizmbangj dwg cienmeng fanj daeuj sieng, mizmbangj dwg ciennding, mizmbangj youh dwg rinbenj seiqfueng bingzbwd, neix cungj dwg gyoengqvunz baenz ndaek baenz ndaek yinh hwnj bya, caiq menhmenh bu ndei. Ei loh hwnjdaeuj gek geij bak mij youh guh aen diengzliengz genjdanh, caiq cuengq geij cieng daengqrin, hawj gyoengq vunz benzbya yietbaeg. Aen gunghcwngz baenzneix hung, mbouj rox yungh geijlai goengrengz caeuq seizgan gyoengqvunz ndatsim ha!

Yied byaij doxhwnj, vunzbyaij yied noix, gij loh hix yied lingq, ga gou hix yied byaij yied neuz…… Seiqcawq cijmiz gij singheuh duzroeg caeuq sing dinbyaij menhmenh diem dou. Hoeng da yawj faexheu, ndaeng mup heiqcingh, ndawsim hix bienq ndaej seuqcingh fouzyou. Youq aen lohnga, gou raen gwnz loh aeu rinmaxluenz veiz baenz aen nduen, baihndaw sij seiq cih “Dieg Gyaeu Ciengx Sim”. Dwg ha, byaij haeuj ndaw rungj aen bya faex heu ndoeng mwn neix, mwngz gamjdaengz cihgeij couhdwg cingq youz youq ndaw “Sivai Dauzyenz” laj bit Dauz Yenhmingz lo.

Byaijbyaij dingzdingz, benz le aen lai cung, dou dauqdaej benz daengz daihngeih aen dingjbya lo. Daeglwg byaij baihnaj lijdwg diuqyetyet, gou gaenlaeng baeg dwk heiq gwnz mbouj diem heiq laj. Saedcaih dingj mbouj ndaej, gou couh genyi naengh roengzdaeuj yietbaeg. Ndoet geij gaemz raemx, dou couh naengh gwnz daengq yietbaeg. Mbouj geij nanz, dou mumjgyumq dingqnyi sing gyoengqvunz guh’angq hoenghhwd daj baihlaj cienz hwnjdaeuj, dou yaek daengz Yinzminz Gunghyenz luba?

Cungj naeuz “hwnj bya yungzheih roengz bya nanz”, seizneix gou cix gamjsouh daengz coenz vah neix ndaej laegdaeuq. Gij mbaek roengz bya caen lingq ha, song ga yied yamq yied saenz, caemhcaiq song gyaeujhoq miz di innumnum, gou cijnaengz rex dwk diuz lanzganh baez yamq baez yamq nod ga doxroengz.

Dauqdaej yawjraen aen raengzheu Yinzminz Gunghyenz lo. Daj byongh bya yawj roengzbae, aen raengz luenzli daiq diuzrieng dinjded, daeglwg singhung naeuz caen lumj aen fouzhauh saekheu hung ndaw yijvwnz govwnz de. Gij raemxraengz heusausau lumj aen gingq, ingj dwk mbwn lamz bya heu, caen lumj fuk veh bouxsien veh nei. Byaij daengz dinbya henz raengz, vunz lai vunz daih, hoengh baenz aen haw. Henz raengz daengj ndaek sigbei, baihgwnz gaek miz: “Raengzlungz Gyaeu Diegsien Raeuz”, gyoengq bya haj saek youq ndaw raengz baenz gyoengq baenz bang gyaep bae gyaep dauq, cwxcaih dangqmaz. Gyoengq lwgnyez henz raengz seiz mbouj seiz vanq gaem liuhbya roengzbae, gij bya haj saek couh daengxgyoengq daengxgyoengq coemj daeuj ciengj gwn, ndaw raengz raemx sinzbyanbyan, gwnz hamq singriu singhemq lienz baenz benq.

Mbouj rox mbouj nyinh, daengngoenz couh byaij daengz byonghmbwn baihsae lo. Aenvih aeu caiq hai denceh ma ranz, dou gietdingh ei lohgaeuq doxdauq. Caen dwg “aen sim ma ranz lumj diuz naq”, naeuz ndaej ma ranz, daeglwg angq ndaej “sam ga diuq baez yat”, diem din engq vaiq lo. Dou giz lingq hoih byaij, giz bingz din couh lai diem vaiq di. Dauq byaij daengz dinbya henz denceh, gou yawj aen soujgih, cij yungh le 50 faen cung.

Soengz youq henz denceh, gou song ga naekgywg, aen dungx hoengqhang, hoeng cingsaenz dauq cibcuk. Gou roxnyinh, baez benzbya neix, mboujdan duenhlienh le ndangdaej, lij ndaej cingh aen sim cihgeij. Cienq gyaeuj denceh ndei, gou youh nyeux gyaeuj yawjyawj diuz loh hwnj bya raezrangrang haenx, ndawsim mbouj rox mbouj nyinh youh yienh ok gyoengqvunz ndatsim coih loh fouzsei; gyoengqvunz daengx ranz daengx gyoengq byaij haeuj daswyenz sim’angq; gyoengq bouxlaux doxiu benzbya dem rengzhoengh…… Gijneix hawj gou yawjraen seiqvunz ndangcangq, ciuhvunz vuenyungz.

Hai aen denceh doxdauq, gou youh caeuq daeglwg iu ndei: Aen singhgiz laeng, cijaeu mbwn ndei, raeuz lij aeu daeuj neix benzbya.

编辑：实习生蒙宁霜复审：黄慧华终审：蒙树起