来源：广西民族报网
发布时间：2025-03-05
Yangzliux caengz heu roegenq mbin,
Bauq cin madaengz mbanjrungh raeuz;
Daengngoenz hwnj sang diegdieg raeuj,
Gyaeujmbanj henzloh valeux hoengz.
Rumz baet mok sanq bobya cingx,
Ndoengfaex ndiusingj riuvauvau;
Cieng daengz bauqsa yiengjyauyau,
Gomaenj hausak goreiz hoengh.
Duzroeg mbin’gyae maeh suenfaex,
Bae rog guhhong gaej niemh ranz;
Gwnzmbaq rapnaek songgyaeuj hanz,
Ganj ban foedfoed cungj mbouj nguh.
Nazbyaek henjgim ingj fwjhau,
Dinbya cauzndwet gihgai gok;
Doenghreih vunzlai boenq haeujok,
Hai sok daeh bwnh ndaem haeuxyangz.
Duzrwi seizseiz gaenx gip va,
Gyangnaz ganj sou byaek seizcengx;
Makyungz makmanh rim lozcengh,
Lauxbanj doxnengh gai gwnz fwngz.
Dah’iq raemxsaw lae mbouj dingz,
Gwnzraiq va’nding nywj mbaw moq;
Gyoengqvunz diu mieng youh bog loh,
Doxgap guh ndei bienh hong naz.
Miz raemx guenq daengz bwh rauq ndai,
Geij boux haep fai mbouj lau hoj;
Raemj faex dokdongh caemh doxhox,
Caezhoz doxbang sim cungj van.
Yahliuz vat gumz ndaem dungxgva,
Mehbaj bazsek doek faen gyaj;
Doenghnaz lumj baengz gvangqgvaxgvax,
Caezsim dajndaem siuq fukman.
Vadauz nding’oiq iu roegcak,
Eng doih haihag caen angqyangz;
Doxcing baenaj yamqdin sang,
Lumj rangz caemx fwn hwngfwdfwd.
Raqfwn yaek doek vunz ganj goeng(hong),
Bouxcoz bae ndoeng guenj faex mak;
Dwkbwnh gvejnya guh seuqsag,
Ndawsim gag angq fwenrwenrwen.
Gwnzbiengz onjdingh cwngcwz ndei,
Sevei yungzhab lwgminz angq;
Roengzrengz laebcaux loh bae gvangq,
Cin nyumx runghrangh bienq diegsien.
Ndit ciuq lajmbanj maqmuengh lai,
Lueg naz haigoeng boenq raixcaix;
Doxbang gaenx guh mbouj lau naiq,
Cungj maengx daihdaih caemh vuenyungz.
编辑：黄誉琦 复审：复审：黄慧华 终审：蒙树起
广西民族报社版权所有 未经书面授权禁止复制或建立镜像，广西民族报网—广西民族报原创文章，欢迎转载，转载请注明出处。
地址：广西南宁市桂春路16号 邮政编码：530021 联系电话：0771-5528076 5559552 传真：0771-5622291 电子邮箱：gxmzbzb@163.com
桂ICP备13003124号-2
桂公网安备45010002450838号
中国互联网违法和不良信息举报中心 广西互联网违法和不良信息举报中心 广西互联网辟谣平台
广西民族报社违法和不良信息举报电话：0771-5622291 举报邮箱：gxmzbsbgs@163.com