Faenj Rang Liujcwngz - 广西民族报网

Faenj Rang Liujcwngz

来源：广西民族报网

作者：□Danz Hijvah/谭喜花

发布时间：2025-03-05

Liujcouh lozswhfwnj youq Gvangjsih mizmingz, youq daengx guek mizmingz, youq gwnzbiengz mizmingz.

Gou daj iq daengz seizneix, cungj gyaez gwn lozswhfwnj, soemj manh cungj miz, feih hom habbak, gwn baez it youh naemj gwn baez ngeih.

Lozswhfwnj baenzneix ndeigwn, cawz le faenj ndei, lij baengh gij boiqliuh de. Hoeng cix mbouj miz geijlai boux rox gij boiqliuh lozswhfwnj dwg baenzlawz ndaem okdaeuj, gijneix cungj hawj gou roxnyinh geizheih, aen sim caeux couh mbin coh Liujcouh siengj bae yawjyawj. Baezneix gij siengjmuengh neix saedyienh lo.

2024 nienz 12 nyied 12 hauh, dou ndaej caeuq Gvangjsih Minzcuz Bause lingjdauj、bouxbien lauxsae bae Liujcouh Si camgya aen hozdung “caezcaemh byaij Gvangjsih · camh Liujcouh” daengx meizdij hengz- doengh nem hoih lwnhgangj Gvangjsih Minzcuz Bause canghraiz ciemdingh.

Baez hoih neix, cawz ndaej laebdaeb caeuq bause ciemdingh, lij ndaej caemhdoih bae Liujcouh Si ndomqyawj caijfangj, gou gikdoengh dangqmaz.

Lau ganj mbouj ndaej gib, gou ngoenzgonq lajbyonghngoenz couh bae Nanzningz ninz, 12 hauh banhaet caet diemj buenq, dou 20 lai boux ciuqseiz naenghci bae Liujcouh Si.

Youq gwnz ci, dou gangjgangj riuriu, daihgya nanz mbouj raennaj, bouxboux miz baenzdungx vah yaek gangj, gangj raiz faenzcieng, gangj ndaw ndwenngoenz nyaengqfoedfoed gij vunz caeuq gij saeh mizyinx haenx……

Dou byaij haeuj Liujgungh bae, dingq boux gunghcoz yinzyenz mbouj dingz mbouj duenh simhoengz gangjgaij gij goj Liujgungh gaxgonq caeuq seizneix, caeuq gak cungj gihgai cingzhau, lumj canjceh、vahgih doengh gij gihgai naek neix.

Boux gunghcoz yinzyenz naeuz, Liujgungh hainduj guh dwg bi 1958, bihaenx ngamq miz geij cib boux gunghyinz daj Sanghaij buen gak cungj sezbei daeuj, mwh haenx diuzgienh gig gannanz, hoeng daihgya caez diuz sim ndeu, roengzrengz bae guh. Ginggvaq geij cib bi roengzrengz buekguh, Liujgungh cizdonz seizneix gaenq miz geij cien vunz, youq daengx guek、daengx seiqgyaiq cungj miz fwnhgunghswh, saehnieb hwngfat yied daeuj yied ak lo, hawj vunz da biengj, hawj vunz danqhaenh.

Cib diemj buenq, youq Liujgungh itlaeuz ranzhaihoih guh yizsiz canghraiz ciemdingh sat le. Dou 20 geij boux faen baenz seiq aen siujcuj, faenbied bae Liujcwngz Yen gak aen yanghcin、gak aen giekdeih、gak aen yozyau caijfangj.

Liujcwngz Yen Nungzsangh Yinzhangz fuhangzcangj、dangjveij veijyenz Cinz Lizcwngz, sien daiq dou bae daengz aen gvanj cawjdaez gyauyuz couqmaenh gij eiqsik caezcaemh Cunghvaz Mincuz Liuj- cwngz Yen ndomqyawj.

Liujcwngz Yen lizsij gyaeraez, miz lai aen minzcuz doxcomz caez youq, miz Bouxgun、Bouxcuengh、Dungcuz、Mulaujcuz daengj, baenzlai bi daeuj, gak aen minzcuz doxndiep doxgyaez, huzndei caez youq.

Liujcwngz Yen youq dajndaem fuengmienh caemh okmingz, oij、 makgam、mbawcaz, lij ndaem gosangh ciengx nonsei.

Vwnzva yisuz fuengmienh, Liujcwngz Yen miz fwen、caijdiuh daengj, hawj gyoengqvunz daiqdaeuj vaiqvued caeuq singriu.

13 hauh gwn gvaq ngaizromh, dou geij boux caeuq Cinz fuhangzcangj bae Secungh Yangh Lozswhfwnj Giekdeih ndomqyawj.

Youq gwnz ci, muengh ok rog bae, gij reihnaz baenz benq baenz benq bingzrwdrwd, song mbiengj loh miz reihnaz dingzlai cungj dwg ndaem oij, miz gij oij aeu daeuj guh dangz, hix miz gij oij bingzseiz dangq mak gwn. Diuz dah Liujgyangh raemx laefoedfoed, lumj diuz sailoeg gyaeundei, caeuq gij bya doxing doxingj, gyaeundei raixcaix. Gij bya mbouj sang geijlai, gij yiengh geizheih dangqmaz. Cinz fuhangzcangj miz sing miz saek yiengq dou gangj goengqgoengq bya daemq bya iq neix.

“Sou yawj, goengq bya neix lumj bouxbaed ninz gizde lwi?”

Dou gaen sing Cinz fuhangzcangj muengh bae, raen goengq bya daemq yienghceij geizheih ndeu yienh youq dangqnaj, baihgvaz dwg gyaeuj baed, baihswix dwg ndang baed hungloet, caen lumj bouxbaed hung ndeu daengjhai ninz youq gizhaenx, hawj vunz mbouj ndaej mbouj danqhaenh daswyenz caen ak, cauh baenz gijneix.

Gwnz loh gij gingj gyaeu lumj daj ndaw dozveh byaij okdaeuj nei, miz di bya lumj aen ruz song gyaeuj ndiengq he, miz di lumj duzgvi, lijmiz haujlai gojgaeq cienzgangj dem…… Liuj- cwngz benq dieg neix, dwg dieg ndei vunz ak, guh ndaej baenz, guh ndaej gwn.

Aen cungdaeuz ndeu gvaqbae lo, aen ci hai haeuj lozswhfwnj giekdeih.

Langhda muengh bae, ingj haeuj ndaw da dwg gij reih bingzrwdrwd, ndaw reih ndaem miz byaekva heuswdswd, lwgmanh dingjmbwn baenz nyoemq baenz nyoemq coh mbwn daengjsoebsoeb. Liz dou mbouj gyae miz benq reih ndeu cienzbouh ndaem lauxbaeg, miz geij boux vunz cingq nyaengqfoedfoed sou lauxbaeg, aen ci ndeu dingz youq gyangreih, gwnz ci gaenq cang rim lauxbaeg lo.

Lozswhfwnj giekdeih gunghcoz yinzyenz naeuz：“Aenvih dou gizneix miz lozswhfwnj aen daegsaek guh gwn neix, daiqdoengh le haujlai hangznieb hwnjdaeuj, cawz le ndaw reih ndaem gak cungj byaek, ndaw bungz lij ndaem miz raetfaex、 hingbauguh, lijmiz lozswhfwnj gak cungj boiqliuh, lumj duhsoemj、 rangzsoemj、gyaeqroeggyumj doengh gijneix.”

Dingq gijneix, aen sim gou fubfeb mbouj dingz, sim naemj: Vanj faenj ndeu, gingqyienz daiqdoengh hwnj baenzlai hangznieb, ak lai bw.

Dou gyoengqvunz mienh gangj mienh byaij, byaij haeuj aen bungz ndaem raetfaex bae. Cij raen ndaw bungz gvangqlumlum dap miz haujlai aen gyaq, gwnz gyaq maj rim raetfaex, duj hung duj iq duj mbouj hung mbouj iq cungj miz. Lauxbanj naeuz:“Ndaem raetfaex gij doxgaiq neix dwg aeu modfaex、 nyaq oij daengj guhbaenz, caiq ginggvaq vwnhdu ndat siudoeg couh ndaej cuengq ginhcungj roengzbae ndaem lo, danghnaeuz mbwn yied raeuj, gij raetfaex couh yied maj ndaej vaiq youh ndei, duj raet couh yied maj hung.”

Dou youh daeujdaengz Luzsingh Nungzyez Gohgi Youjhan Gunghswh, gizneix cienmonz ndaem hingbauguh. Bouxsai cungnienz ndangdaej gig gietsaed hoeng mbouj sang geijlai ndeu okdaeuj angqcoux gyoengqdou, de gaisau naeuz:“Gou heuhguh Hungz Lungzginh, vunz Fuzgen, dwg bouxbing duivuj, daeuj neix hwngfat ndaem hingbauguh.”

“Dou ndaej haeujbae yawjngonz hingbauguh lwi?” Dou geij boux cam.

“Sou gaen gou haeujdaeuj yawj ba, yawjyawj gij hingbauguh youq ndaw ranzgunghdiuz maj ndaej baenzlawz yiengh.” Hungzcungj riu naeuz.

“A, gij hingbauguh dwg youq ndaw ranzgunghdiuz ndaem ha, neix aeu sai haujlai cienz o.” Dou dingq gij vah Hungzcungj le, cungj gig doeksaet.

“Dwg ha, ndaem hingbauguh gij sezsih sezbei couh aeu sai baenz geij cien fanh, hingbauguh youq ndaw ranzgunghdiuz ndaem, vwnhdu ngamq hab, gyoengqde cij maj ndaej hoengh, maj ndaej ndei. Gij hingbauguh neix, cienzbouh dwg gai ok rog bae, daegbied gai bae Yanghgangj ceiq lai, gaen hingbauguh gai samcib gouj maenz.”

“A, baenzneix bengz, itbuen vunz gwn mbouj hwnj bw.” Dou riu naeuz.

Naemjnaemj hix dwg, haxbaenh youq gwnz ci, Cinz fuhangzcangj doiq dou gangj gvaq, hingbauguh nanz ndaem, danghnaeuz youq rog seizbienh ndaem seizbienh maj, caengz miz vunz daeuj sou, maj hoengh le, itseiz gai mbouj okbae, youq ndaw reih naeuh caez; danghnaeuz dienheiq mbouj ndei, seiz nit seiz ndat, hingbauguh maj ndaej mbouj yinz, duj hung duj iq, hix mbouj miz vunz cawx. Youq ndaw ranzgunghdiuz ndaem hingbauguh, ndaej gamhanh vwnhdu, hawj hingbauguh canjliengh caetliengh miz baujcwng.

Hungzcungj cingj dou daengz diegbanhgoeng de gwn caz, lingh boux hujgeiq de gaenq youq gizhaenx deq lo. Hungzcungj naeuz, songde cungjdwg bouxbing duivuj, caez daj Fuzgen daeuj neix doxgap ndaem hingbauguh. Dingq song boux lauxcungj gangj daengz gizneix, caeuq dou caez daeuj guh caijfangj Ciz lauxsae fwt bienq ndaej cingsaenz gvaekgvaek hwnjdaeuj, de doiq song boux lauxcungj neix naeuz, de gaxgonq hix dangbing gvaq. Lauxbing raen lauxbing, ndawsim miz cien coenz fanh coenz mbouj rox daj gyawz gangj hwnj……

Daj giz Luzsingh Gunghswh okdaeuj, dou youh daeujdaengz aen cangj cienmonz guh rangzsoemj rangzmanh he.

Aen cangj neix lauxbanj hix dwg vunz Fuzgen, gij rangzsoemj rangzmanh cungj cang ndei haeuj ceijsieng, lauxbanj cingj dou cimzcimz gij rangzsoemj rangzmanh neix, dou dawz rangzsoemj rangzmanh cuengq haeuj bak bae nyaij, roxnyinh loq soemj loq manh, feihrang habbak.

Lauxbanj naeuz：“Gij rangzsoemj rangzmanh neix, bingzseiz dangq saejdaeuz gwn ndwi hix ndaej, roxnaeuz dawz daeuj soengq faenj- mienh gwn hix ndaej, daengx guek ndaw cauhsi cungj miz gai ne.”

Yawjngonz sat lozswhfwnj giek- deih neix le, gou ndawsim gag danqhaenh: Vanj lozswhfwnj ndeu, gingqyienz daiqdoengh baenzlai hangznieb, hix boiqfug gij lauxcungj neix, lizhai mbanjranz baenz cien leix, mbouj lau dwgrengz daeuj neix banh cangj, hawj gyoengqvunz youq ranz couh miz hong guh, mbouj caiq bae gyae dajgoeng, bi daengz haemh souhaeuj mbouj loek, lij ndaej guh reihnaz mbouj hawj vutfwz, ndaej ciuqgoq ndaw ranz laux nyaeq dem, nyienh gij heiqrang lozswhfwnj Liujcouh yied biu yied gyae, mbin doh daengx biengz.

编辑：黄誉琦复审：复审：黄慧华终审：蒙树起