Soujgih Doiq Siujhagseng Yingjyangj Lai

来源：广西民族报网

作者：□Banh Cuhlenz/班珠莲

发布时间：2025-02-20

Youq ngeihcib bi gaxgonq, soujgih cij yungh daeuj dwk denva yawj seizgan. Hoeng, doeklaeng cinwngz soujgih byaij haeuj ndwenngoenz raeuz, gij gunghnwngz de yied daeuj yied lai, ndaej yawj densi denyingj、 ingjsiengj、 yawj faenzcieng、 dwk youzhi、hai ci byaij roenz seiz aeu daeuj daujhangz daengjdaengj, gij yunghcawq cinwngz soujgih gangj mbouj liux, hawj gyoengqvunz fuengbienh gig lai. Seizneix gyoengqvunz cungj dwg seizseiz gaem soujgih, baez ndaejhoengq couh dawz soujgih daeuj guhcaemz, mizseiz yawj haeujyinx le lumz gwn haeux roxnaeuz guhhong dem.

Vunzhung seizseiz loengh soujgih, lwgnyez raen le hix siengj gaen loengh, yied loengh yied yinx, gij haihcawq gig lai.

Seizneix haujlai lwgnyez sam seiq nienzgaep couh daiq gingqda lo, dingzlai dwg aenvih loengh soujgih lai deng dagaenhyanx. Lwgnyez baez loengh soujgih couh mboujguenj geijlai nanz, vanzlij mizmbangj gyanghwnz caj banlaux ninzndaek le caiq hwnqdaeuj caeg lumhlaep loengh soujgih.

Ngeih dwg gij soujgih sibinz dinj daiqdaeuj sengmingh yungyiemj. Seizneix gij sibinz dinj hwngfat gig vaiq, neiyungz cawz le miz gij cizgiz yingjyangj, lijmiz mbangj cozbinj neiyungz famh daengz daudwz daejsienq bouxvunz, gyoengq siujhagseng lij caengz faen ndaej ok deng loek, gag guenj naengzliz mbouj ak, youq ndaw vangjloz bya lungz doxcab de, lainoix cungj deng yingjyangj, gyoengqde gig ngaih couh maezmwnh ndawde.

Mbangj boux banlaux “fatbag ” vih ingj sibinz, lingx lwgnyez bae guh gij dungcoz yungyiemj roxnaeuz hwk vunz haenx. Lumjbaenz, miz boux daxboh nengh gen lwgnyez fan dangqnaj fan baihlaeng roxnaeuz venj youq gwnz mbaq, gij dungcoz neix dawz lwgnyez guhcaemz, seiqhenz mbouj miz saek di ancienz baujcang. Boux banlaux mbouj miz gij eiqsik ancienz yienghneix dauqcawq miz, lumjbaenz youq ngoenz roengz siet yaeuh lwgnyez bae riz gij bing conghcueng, yawjraen diuzlinx deng nem youq gwnz conghcueng lij riu haha……Gyoengqde leihyungh lwgnyez daeuj guh- angq caeuq comz lwgda gyoengqvunz, dwg doiq lwgnyez sengmingh ancienz mbouj fucwzyin, yungzheih hawj lwgnyez gaen rumz youq gwnz ndang daegnuengx dahnuengx roxnaeuz doengzhag ciuq guh, yaek cauhbaenz engq lai lwgnyez deng sienghaih.

Sam dwg yingjyangj gij swhsiengj siujhagseng. Sibinz dinj miz haujlai rox son lwgnyez hag vaih, lumjbaenz lij iq couh mbouj doegsaw ok sevei caengz baenz vunzhung couh aeuyah haqvunz seng lwg; ngoenzngoenz mbouj guhhong cangndang gyaeuget youq gwnz vangjloz hai cizbo; ciengq go roxnaeuz gai doxgaiq daeuj aeu ngaenz; lij miz mbangj sibinz dwg yienghlawz son vunz bae yaeuh vunz. Cungj sibinz yakrwix neix doiq siujhagseng gauhnenzgiz haenx daeuj gangj, yingjyangj gig yakrwix, doiq swhsiengj gensez gyoengqde lumjbaenz cadan bauca ityiengh haenqrem, gij swhsiengj mbouj cingq caeuq gij neiyungz yungyiemj hawj vunz yousim.

Bet goujcib nienzdaih mwhhaenx gij lijsiengj gyoengq lwgnyez iq cungj dwg gij maqmuengh gyaeundei, aiq dwg gingjcaz、canghyw、lauxsae, hix aiq dwg canghranz、gohyozgyah daengj boux bingzciengz miz gungyen hungmbwk haenx. Hoeng, seizneix siujhagseng lwnh daengz lijsiengj seiz, gij dapanq gyoengqde dwg cujboh guhcaemz、cujboh cangndang、yenjyenz daengj doengh cungj hangznieb hong mbaeu ngaenz lai neix. Mwhneix vangjloz hwngfat gig vaiq, daiq daeuj fuengbienh doengzseiz, hix miz daihliengh saenqsik roemx haeuj saedceij raeuz daeuj. Ceiq youqgaenj dwg gij sibinz mbouj yungh roengzrengz guh hong couh ndaej yiengjsouh, ndaej gwn ndei youq ndei haenx. Cungj sibinz neix hawj lwgnyez miz cungj swhsiengj “guh cujboh mboujdanh ndaej guhcaemz, lij gig canh cienz” “doegsaw mbouj miz yungh, cijaeu gou gyaeundei、gou baenzsau baenzmbauq, couh ndaej ra boux miz ngaenz, couh ndaej gvaq cungj saedceij vuenyungz”……

Seiq dwg doiq gij hagsib siujhagseng miz yingjyangj. Gyoengq siujhagseng ukgyaeuj lij oiq, doiq seiqgyaiq gak cungj gak yiengh geizheih dangqmaz. Doujyinh、gvaisouj daengj APP sibinz dinj hwngfwdfwd, hai aen dou seiqgyaiq moq hagseng, gij doxgaiq ndawde singjsien mizyinx, doenghduz dwggyaez、doxgaiq guhcaemz、dozveh lai yiengh、gojgaeq ndeiriu…… Gij neiyungz haenx supyinx siujhagseng hag guh, gyoengqde cungj naemj lumj cujboh ityiengh, couh ngoenzngoenz nyaengq “cozbinj”. Miz lauxsae naeuz hagseng swhgeij mbouj guh cozyez, yienzaen gingqyienz dwg youq ndaw doujyinh yawj vunz gai doxgaiq, cozyez guh mbouj gib. Lij miz dah iq ndeu, hwnjdangz couh loengh fwngz mbouj dingz, lauxsae baez cam dwg hag doujyinh diuq foux. Gij saeh neix couh yawj ndaej ok soujgih yingjyangj hagsib gig daih, gij swhsiengj gyoengqde caemh ngaiz nyauxluenh, gyoengqde bienq dwk simfouz、simnyap. Sojlaiz dazyinx gyoengq siujhagseng hableix yungh soujgih, dwg gij saeh ceiq youqgaenj seizneix.

Doiq dangqnaj soujgih yingjyangj siujhagseng neix, lauxsae、banlaux caeuq sevei sam fuengmienh caezsim lienzhab hwnjdaeuj, ra ok dauq fuengfap cingqdeng caemhcaiq cienzmienh ndeu, dajcauh aen seizdaih moq vangjloz huzndei、gyaeundei, vih siujhagseng majhung cauh ok aen vanzging ndangcangq ndeu.

编辑：黄誉琦