Youz Bwzmaj - 广西民族报网

Youz Bwzmaj

来源：广西民族报

作者：　□ Luz Vanjcinh /陆婉珍

发布时间：2024-09-10

　　Roek

　　Gyoengq lwgnyez ceiq maq- muengh couh dwg majhung vaiqdi. Majhung le din ga cix miz rengz byaij roenndoeng, cij ndaej riengz bohmeh bae haw. Aenvih bouxlaux naeuz, duzmax baema cungj vih ndaw ranz doz doxgaiq, sinhoj dangqmaz, sij mbouj ndaej hawj de caiq doz lwgnyez lobw.

　　Ndigah, haujlai lwgnyez ndaej cib bi baedauq le, cij ndaej gaen bae mbat haw ndeu. Miz haujlai lwgnyez cib lai bi hix mbouj ndaej bae yienhsingz saek baez.

　　Seizhaenx, aenvih bya sang roen gyae, lij miz gij funghgen swhsiengj banlaux Yauzcuz yawjnaek bouxsai yawjmbaeu mehmbwk, gyoengq lwg- mbauq Yauzcuz byaij ndaej roen gyae le, cij ndaej bae hagdangz, lwgmbwk couh mbouj ndaej doeg geijlai saw lo, aeu gij vah banlaux gyoengqde daeuj gangj “duzma mbouj cae naz, mehmbwk mbouj doegsaw”. Haujlai dahlwg Yauzcuz caen mbouj ndaej doegsaw gvaq.

　　“Gou caemh dwg ndawde boux ndeu——Mbouj ndaej haeuj hagdangz doeg saek ngoenz saw.” Ciengj laux- banj gag riu naeuz.

　　Coenz vah neix sawj gou doek- saet——Aenvih de daj gyaeuj daengz byai cungj dwg yungh Vahbujdungh caeuq dou gangjvah, caemhcaiq gangj ndaej gig swnh, haxbaenh lij raen de yungh soujgih fat saenqsik hawj bouxcawx dem. Gou caen mbouj saenq de mbouj ndaej doeg gvaq saw.

　　Caet

　　“Geiq ndaej bi 2008, giz dou neix ndaej yungh dienh le, gou couh cawx densi, cang ‘bahek’ ciepsou saenqhauh couh ndaej yawj densi, menhmenh hagrox gangj Vahbujdungh lo.”De yawj ok dou geij boux cungj gig ngeizvaeg, couh riunyumnyum naeuz.

　　“Doeklaeng, daengz bi 2017, dou youh ndaej rag gvanghcenh, ranzranz ciep gvanghmauh, miz vangjloz yungh le, daihgya cungj cawx dennauj caeuq soujgih cinwngz. Seizneix haujlai vunzmbanj vanzlij hagrox doenggvaq veizsin、doujyinh cizbo gai huqdoj dem. Ne, haxbaenh gou ngamq ciep ndaej dan ndeu, ngoenzcog geiq betbak maenz raetlingzcih gvaqbae cijndaej.”

　　Yawj gij huq ndei baij rim sam mienh ciengz ndaw ranz de, gou haenh de seng’eiq guh ndaej ndei, baiqfug de dangqmaz. De mboujdan gaenx guh、simhoengh、gaenxmaenx dangqmaz，caemhcaiq guh yiengh baenz yiengh dem.

　　Hoeng de youh naeuz, bihaenx mwh cib geij bi gaxgonq gyoengqde ngamq baenzgya, saedceij gvaq ndaej gig hoj. Ranz gezvwnh dwg ciengz- namh vaxdoj, couhcinj ciuq fungsug sibgvenq seiqlengq cungj venj daeng venj geiz, gvanbaz moq cungj daenj buhvaq gyaqciq Yauzcuz haenx, hix cw mbouj ndaej gij ndwenngoenz hoj haenx.

　　Miz dahlwg le, de couh ngoenz- ngoenz caeuq gvan de daiq ngaiz aemq lwg haeuj ndoeng hwnj gocoengz bae gvej iengcoengz, moix boux gvej aen ndoi ndeu. Ban- ringzgvaq, youh bae ra raetlingzcih daengj huqdoj cij dauqma. Saedceij sinhoj ngoenz gvaq ngoenz, menh- menh rom cienz ciengx ranz.

　　Cigdaengz bi 2003 lajmbanj Yauzcuz cij doeng roensuijniz. Gyoengqde rom ndaej di cienz le couh hwnq ranzbingz. Hoeng rag caizliuh hwnq ranz cungj gig nanz, gyoengqde cij guh ndaej caengz ranz iq ndeu.

　　Bet

　　Gaenh geij bi neix, caeklaiq miz gij cwngcwz ndei guekgya, bi 2015 mbanjmbanj doeng le roensuijniz. Roen doeng yienghyiengh cungj doeng, mboujdan haeujok fuengbienh, doegsaw fuengbienh, gai huq fueng- bienh, daiq rag caizliuh hwnq ranz hix fuengbienh lai lo.

　　Ciengj lauxbanj gvanbaz youh rom ndaej di cienz le, raen miz haujlai hek diegrog cungj daeuj Mbanjbwzmaj yawj nazmbaeklae, caemhcaiq ra diegyouq, youh ra dwzcanj huqdoj Yauzcuz dem. Raen ndaw mbanj haujlai ranz cungj hwnq laeuzbezsu guh bouqhek caeuq nungzgyahloz, gyoengqde hix siengj hwnq laeuz moq daeuj guh gaicawx. Hoeng youq Mbanjyauz, dieg gvangq vunz noix, yaek guh ranz, ra doih- caepranz dwg bouh ceiq youqgaenj.

　　Vahsug gangj ndaej ndei “doxbang doxbaengh, caez youq ndaej maenh”. Daengz ngoenz haigoeng, gyoengq beixnuengx caencik ndaw mbanj minzfungh cinghseuq lauxsaed neix cungj daeuj bang guh hong. Miz Bouxgun、Bouxcuengh、Yauzcuz. Couh yienghneix, sam caengz laeuz moq gyaqciq de mbouj geij nanz couh hwnq ndaej sang’vauvau lo. Minzcuz dox- giet youq gizneix caensaed fatseng，mbe’gvangq.

　　Caen dahraix, seiqcib bi gax- gonq, Yauzcuz yangh laebbaenz le, youq baihlaj Gungcanjdangj caeuq guekgya raeuz lingjdauj, yangh dangj- veij、cwngfuj cienzlig gaijbienq gij giekdaej sezsih lajmbanj Yauzcuz, doidoengh diuz roen gak mbanj canjyez hwngfat, coicaenh ginghci hwngfat. Daegbied dwg gaenh geij bi daeuj duetgungz gunggen caeuq hong saenqhwng lajmbanj, engq gyavaiq Nanzbingz ginghci hwngfat. Gyoengq beixnuengx Yauzcuz saedceij cungj yied gvaq yied ndei, caemh ciemhciemh fouqmiz lo.

　　Seizneix, gak ranz gak hoh gij dengi ndaw ranz cugciemh boiq caez, yienghyiengh cungj miz. Ca mbouj geijlai moix aen hongh cungj dingz miz ci, lumjbaenz ciiq、 cibizgaj、cigaj、 cimozdoz. Gyoengqde gung lwg doegsaw、hwnj bya guhhong、ok haw bae hangz cungj fuengbienh lai lo. Gaej gangj ganj haw Nanzbingz, couh dwg bae yienhsingz、bae Nanz- ningz…… Youzcaih de siengj bae couh bae, cwxcaih dangqmaz lo.

　　Gouj

　　Ngoenz daihngeih haetromh, bang roeg gwnz faex youq rog cueng heuh cici caca mbouj dingz, hawj gou daj ndaw fangzhwnz ndiu lo.

　　Gou hwnq congz le, couh bae daengz yangzdaiz, muengh coh gyoengqbya gyae haenx, cijraen ndit gyanghaet unqswnh saj roengz lajbiengz, sawj gij bya gij faex Sizvandasanh nyumx baenz saekgim liux.

　　Yawj gizgyawj, raq rumz iq ndeu ci daeuj, lajlaeuz gij va nywj daiq raemxraiz riengz rumz diuq foux, sengdoengh youh gyaeundei. Ndaw biengz fanhfaed cungj hoengh- hwdhwd.

　　Seizneix, gou gig siengj sikhaek roengz nazmbaeklae Bwzmaj bae, yawjyawj de youq laj ndit gyanghaet dwg baenzlawz yiengh. Daeuj daengz Mbanjbwzmaj le, dingh aeu bae yawj nazmbaeklae, cij suenq mbat neix mbouj daeuj ndwi.

　　Nazmbaeklae Bwzmaj couh youq baihlaj Mbanjbwzmaj, seizneix miz song bak lai moux, neix doiq ranghdieg Sizvandasanh daeuj gangj, gveihmoz suenq hung lo.

　　Daj Mbanjbwzmaj byaij roengz- bae, song henz bo dwg gij reih haeuxyangz caeuq suenbyaek gyoengq beixnuengx Yauzcuz.

　　Seizneix, cingq dwg seiz sou haeuxlwg bonj dieg, gwnz gyaeuj haeuxyangz dingzlai cungj venj rim mumh saekdaep.

　　Seizhah fwn raq gvaq baez ndeu, diegnamh nyinh, ndit youh cuk. Ndaw suen, byaekmbungj、byaekgep heu- ndikndik; duhnoh baenz nyoemq baenz nyoemq caeuq gveliengz benz rim gwnz duengq. Go namzgva maj ndaej ceiq vuengh, daz seiqlengq bae. Gyoengqde lumj gyoengq dahsien daenj vunj heuoiq riengz rumz diuq foux, miz mbangj caemh foux hwnj gwnz duengq bae lo.

　　Cib

　　Mwh dou byaij daengz gwnz dingj nazmbaeklae, yawj ndaej youh gyae youh gvangq. Mwhneix gij naz ngamq maj ndaej mwn, baenz raih baenz raih, heusausau, gyaeundei raixcaix. Seizneix gou couh lumj dahsien daenj diuz vunj saekheu ndeu, youh hung youh raez youh gyaqciq.

　　Gou ndwn youq laj ndit rongh- gim, mbe hai song gen, singhung baez hemq, gyoengqbya hix hemq dap gou, simsangj dangqmaz. Hemq gaeuq le, couh ing haeuj ndaw rungj daih- swhyienz bae ninz……

　　Caj gou roengz daengz laj din nazmbaeklae Bwzmaj, mup gij hom gomiuz unqswnh youh heuoiq, youh dingq gij raemxrij laelulu haeuj ndaw naz bae haenx, gou simsangj dangq- maz.

　　Mwh gou ngiengx gyaeuj muengh song bak lai moux nazmbaeklae neix, roxnyinh gig iengj. Raq rumz liengzsisi ci gvaqdaeuj, daiq miz iengcoengz、 batgak、 go’gvi doengh gij heiq hom neix, sim gou hix riengz rumz fubfed——Doengh naz- mbaeklae caengz daeb caengz neix, mbouj caendwg lumj gij saedceij gak minzcuz beixnuengx ngoenz beij ngoenz ndei loma?

　　（2 sat）

编辑：黄誉琦复审：黄慧华终审：蒙树起