Canh - 广西民族报网

Canh

来源：广西民族报

作者：□ Vangz Siujyinh/黄小音

发布时间：2024-09-09

　　Daxboh naeuz：“Giuz raek lij miz namh, camh raek lij miz vengh, bohmeh gou dai le, beix gou dai cix dai, haq cix haq, gou caen mbouj miz bouxlawz gyauq gou, cij ngamq miz daxmeh sou mbouj yiemz gou lo.” Daxboh beizheiq gaenj, daxmeh hozraez, daxboh naeuz: “Raez lumj diuz Dahcangzgyangh nei.” Caenz- naeuz mbouj miz daxmeh nyaenx- heiq, mbouj miz daxmeh gwn hoj naih haemz, aen gya dou mbouj miz ngoenzneix.

　　Vunz naeuz: “Bohmeh dai, iet din iet ga hawj vunz caij.” Daxmeh roxnyinh daxboh dwg lwggyax, aen gya mbangremrem, ngaiz vunzmbanj haepha lai, sojvix daxmeh buekmingh seng caet boux lwg hawj daxboh, sengsanj seizgan miz ngeihcib sam bi baenzneix raez, gij saeh neix doiq aen ndang daxmeh daemq iq neix daeuj gangj, dwg geijlai dwgrengz ha!

　　Daxmeh daj haeuj aen gya neix daeuj, mbouj goeng mbouj yah, mbouj beix mbouj nuengx, mbouj nangz mbouj gux, gag seng gag ciengx, gag rumx gag goq, aen duix、bwnz mbuk, yienghyiengh gvaq din gvaq fwngz, mwhde youq doihswnghcanj, daxmeh ganj hong ndaw ranz youh ganj hong rog, gwn mbouj imq, ninz mbouj gaeuq, couh yienghneix buekmingh, ciengx hung caet boux lwg, lij soengq geij beixnuengx dou bouxboux bae hagdangz doegsaw liux.

　　Doenghbaez, laeng gou caet beixnuengx, cuengz buh cuengz vaq, meh gou gag neuj gag nyib, boux beix daenj dinj le boux nuengx daenj, daenj geg le youh fong, caen lumj coenz damzraih: “Moq sam bi, gaeuq sam bi, fongfong boujbouj youh sam bi.”

　　Daxmeh hix rox son daxboh guhvunz, hawj daxboh rox gij bae gij dauq, rox goq gya goq dangq.

　　Gij aencingz gij haemzhoj daxboh daxmeh gou, lumj diuz dah raez, lumj aen haij laeg, gangj mbouj liux, hix boiz mbouj hwnj, gou dungxmaeg feuz, bak bit bumh, sij mbouj ok gij haemzhoj bohmeh dingz ndeu.

　　Sam Miz Lwg Ndaej Gwn Haeux Hak

　　Doenghbaez, daxboh bae daj- goeng, bae bang vunz daeb cien hwnq laeuz, bae guh canghdajdoq, dwgrengz dangqmaz. De cungj son geij beix- nuengx dou aeu roengzrengz doegsaw, de naeuz dingq gangj roengzrengz doegsaw cij baenz vunz. Daxboh sam- daih vunzguhnaz, daengz gij lwg de, miz seiq boux lwg gauj ndaej gwn haeux guekgya, boux dang gungh- cwngzswh、boux dang lauxsae、boux dang gunghyinz, miz boux dang hingzcwng ganbu dem, gizyawz sam boux lwg gwndaenj hix mbouj loek, bouxboux baenz gya baenz dangq, rox riq rox ra, bouxboux hwnq ranz laeuz、miz ci hai. Seizneix, lwglwg lanlan, moumou mama, rim ranz rim riengh.

　　Seiq Canh Mingh Ndaej Gyaeu

　　Geij bi gonq, daxboh baenz bingh sinhgvanh, aen bwt baenz “bwzfei”, geij beixnuengx dou naemjnaeuz goengboh dingj mbouj ndaej gvaq mbat binghraq neix lo, gou gaenq cinjbi gij buhvaq dwk dai de gvaq.

　　Siengj mbouj daengz, daxboh mingh laux, ndigonq lamqdai lo!

　　Daxboh youq ndaw mbanj dau- dwz ndei mingzmuengh naek, de baenz bingh le, vunzlai bouxboux doeknaiq raixcaix, daxboh bingh ndei le, vunzlai angqyangz, boux yawj boux daeuj cam daxboh gij gwn gij youq de, cam yw bae geijlai ngaenz, lwglan doiq de ndei mbouj ndei.

　　Daxboh dingq le, cungj iet ok song fwngz daeuj, riuhaha dwk baez yiengh baez yiengh geq okdaeuj, naeuz: “It, gou yw bingh miz baujyenj hozcoz yihliuz, ndaej bausiuh dingz lai, sojvix mbouj bae geijlai ngaenz; ngeih, lwglwg lanlan bouxboux bae yihyen yawj gou, cungj hawj ngaenz hawj gou, gou baenz bingh, mboujdanh mbouj bae ngaenz, lij canh ndaej ngaenz doxdauq dem. Beijswq youq gaxgonq, gij ndok gou senq hau daengz gizlawz bae lo.”

　　“Gaej dai vaiq bw, gaej dai vaiq bw!” Daxboh ciengzseiz yienghneix naeuz, “haeux lau rumz bet nyied, vunz lau geq cij hoj, hoeng, gou lwgmbwk ndiep, lwgsai goq, cwngfuj youh fat ngaenz hawj bouxlaux dem, gou ndaej yiengjsouh daengz gij gwndaenj vuenyungz neix, seiqvunz gou canh gvaq cienzbouh lo, gou mbouj ngah dai vaiq bw!”

　　（2 sat）

编辑：黄誉琦复审：黄慧华终审：蒙树起