Canh - 广西民族报网

Canh

来源：广西民族报

作者：□ Vangz Siujyinh/黄小音

发布时间：2024-08-28

　　Daxboh gou bineix goujcib ngeih bi, dwg ndaw mbanj boux ceiq laux he, de ndangdaej lij ak, dawz rap ndaej, bag fwnz ndaej, daeh bwnh bae ndaem haeuxyangz、ndaem byaek ndaej. Daxboh maij caeuq vunzlai gangjgoj, ngoenzngoenz cungj daengz laj goek gorungz bakmbanj guhcaemz.

　　Ndaw mbanj miz boux lwgmbauq manz he gyaez caeuq daxboh gangj vahriu, miz baez ndeu, daeg mbauq he naeuz：“Goeng ha, mwngz dwg mbanj raeuz boux ceiq geq, mwngz lau dai lwi?”

　　Daxboh riunyumnyum naeuz: “Ha! Vunz naeuz ‘lwgnyez mbouj lau nit, loeg it mbouj lau dai’, dajdingh gou seizneix dai, gou hix dwg boux ceiq canh haenx lo.”

　　Naeuz daengz gij canh daxboh, gou ceiq miz vah gangj lo.

　　It Canh Ndaej Boux Mehyah He

　　Daxboh canh lai dahraix.

　　Daxboh seiq neix gig haemzhoj, de haj bi gyax boh, cibngeih bi gyax meh, song boux go de okbae guh gwzming, doeklaeng, song boux de lix mbouj raen gyomq, dai mbouj raen ndok, ngamq miz mingzcoh deugaek youq gep sigbei mohcungq lezsw gwnzde; sam dah mehgux gou hix haq liux, ndaw ranz ngamq lw daxboh gag youq lo.

　　Daxboh bienq baenz lwg gyax、lwg dog, mbouj beix mbouj nuengx, mbouj ranz mbouj riengh, hix mbouj gya mbouj dangq, mbouj mou mbouj ma, reihnaz gag raeq, haeuxcaeuz gag gwn, haemh mbouj miz meh coi ninz, haet mbouj miz boh heuh hwnq, iek mbouj miz boux cawj, in mbouj miz vunz cam.

　　Daxboh geijlai hojlienz!

　　Mehguxsam gou haq bae mbanj rog, de raen daeg nuengx iq de guh gyax haemzhoj godog lai, couh hwnz ngoenz gwn mbouj roengz ninz mbouj ndaek, cungj naemj ra bouxyah hawj de baenzgya baenzdangq. Ndigah, couh youq ndwenlab bi gyoengqde gyax meh haenx, mehguxsam raen ndaw gya de miz boux mehnaz iq ndeu, daeuj gaen dahcej de dawz nuengx, cibsam bi, mehguxsam gou couh guhmoiz hawj daxboh, mwh- haenx, goengda caeuq yahdaiq gou yienznaeuz rox daxboh gou dwg lwggyax, hoeng, raen mehguxsam miz sim miz eiq, hix rox daxboh dinfwngz ndei, lij iq couh rox dwknyaen, rox dawzvaiz, couh dapwngq lo, yiengh- neix, daxboh caeuq daxmeh doiq gvanbaz iq neix couh baenz aen gya iq lo.

　　Aen mbwn daxboh rongh lo! Daj ngoenzde hwnj, daxboh miz yah baenz gya, mbouj lau vunz yawjcuij lo.

　　Ngeih Canh Ndaej Baenz Ranz Vunz

　　Daxboh caeuq daxmeh gezvwnh caet bi le, daxmeh baenzsau lo, bi daihngeih, dah cejdaih gou seng daeuj, daxboh angqfwngfwng, nyangz vunz couh bauq naeuz: “Gou miz iq gvaq! Gou baenz boh gvaq!”

　　Daj seng cejdaih hwnj, geij bi gvaqbae, dou caet beixnuengx laeb- daeb doekseng lo, haj boux mbwk, song boux sai, daxboh mbouj miz yawj lwgsai gviq yawj lwgmbwk cienh, bouxboux ndiep haeujgyaeuj. Seizde, yienznaeuz laeng dou hoj raixcaix, hoeng, daengx ranz vunz cungj riu- roegroeg, hemqhumhum, cejdaih youq ndaw ranzdangz beiq ceng sat ndeu, dou geij beixnuengx langhninz youq gwnzde, dingq dahcej lwnh goj、eu fwen, yawj daxmeh dozfaiq、daemj- rok, dah cejngeih hix rox son geij beixnuengx iq dou doeg saw、diuqfoux. dah cejdaih rox eu haujlai fwen, daengz seizneix gou lij ndaejgeiq hot ndeu:

　　Ndaundeiq youq gwnzmbwn,

　　Ronghndwen ronghsagsag,

　　Raeuz daemj baengz daem sak(rum),

　　Ngoenzcog dak buh ceq guh coiz.

　　Daxboh ciengzseiz daengq geij beixnuengx naeuz：“Gou canh ndaej aen gya laux neix, sou aeu lai niemh daxmeh sou bw, daxmeh sou dwgrengz lai bw.”

　　Daxboh gig gyaez daxmeh, gyoengqde song boux ciuhvunz dox- gyaez, gou daj iq hwnj, couh mbouj raen daxboh ndaq roxnaeuz dub daxmeh gvaq, hix mbouj raen daxmeh naeuz daxboh saek coenz gvaq.

　　Daxmeh vunz daemq ndang iq, ngamq sang 145 lizmij, daxboh sang 185 lizmij, daxboh gangj vahbeijlumj, naeuz swhgeij dwg goengq bya Hijmajlahyaj, daxmeh dwg goengq ndoi iq he, hoeng, daxboh coengzlaiz mbouj yiemz daxmeh, geij beixnuengx dou hix “ma mbouj yiemz cawj hoj, lwg mbouj yiemz meh yakyawj” gig aeueiq daxmeh. （1）

编辑：黄誉琦复审：黄慧华终审：蒙树起