来源：广西民族报
发布时间：2024-08-28
Yenz Cin gaxgonq hix caeuq geij dahsau doxlienh gvaq, vunz yiemz ndaw ranz de hojndoq, bohmeh boux he baenz bingh ninz congz, boux he ga’gvez, cungj mbouj miz dahsau lawz nyienh haq hawj de, daengz seizneix de lij dwg bouxdog. Bohmeh Yenz Cin gip dangqmaz, cungj muengh daeglwg dog neix baenzgya vaiqdi.
Ngoenzhaenx, Yenz Cin caeuq gyoengq doih doxcomz gangjgoj, boux doih naeuz de miz dah nuengxbiuj he heuh Meiz Li, riu dwk doiq Yenz Cin naeuz：“Sou song boux gya veihsin gangjgoj gangjgoj ba.”
Aen seiq neix caen ndei, song boux mbouj doxraen gvaq, hix ndaej guhdoih gangjgoj.
Yenz Cin caeuq Meiz Li roxnyinh songde gig doxngamj, ngoenzneix couh baez daih’it doxduenq bae haw doxraen.
Yenz Cin ndaw sim diemz- swdswd, de naemj raen Meiz Li le, yaek gangj maz vah, itloh youq ndaw sim fanfoek lienh.
“Gouqmingh ha, gouqmingh ha!” Sawqmwh dingqnyi baihnaj mbouj gyae miz vunz heuh.
Yenz Cin coh baihnaj muengh bae, cij raen henzloh baihgvaz diuz dah he, miz goenggeq he caeuq aen cisamloek he boek roengz dah bae lo, gwnz raemx byaekheu fouz rimrad. Aiq dwg goenggeq haenx mbouj rox youzraemx, de youq ndaw dah cak hwnj cak roengz.
“Daxau, gou daeuj gouq mwngz!” Yenz Cin coh goenggeq haenx sing hung swenj naeuz.
Yenz Cin daj ndaw daeh mbon ok aen soujgih daeuj, cuengq youq gwnz haenz, “bumlum” sing he diuq roengz dah bae, haenqrengz youz bae coh goenggeq haenx.
Yenz Cin vunz lajmbanj, ciengz- seiz roengz dah bae mo bya mo nyauh, de youzraemx ak yaep he couh youz daengz henz goenggeq, goenggeq aj song gen, got hoz Yenz Cin ndaetndaet bae, loengh dwk Yenz Cin yaek diemheiq mbouj hwnj bae.
Yenz Cin caenhrengz fid deuz song faj gen goenggeq, gaemhdawz vengq buh de buekmingh yiengq haenzdah youz bae.
Rag goenggeq hwnj haenz, Yenz Cin saeknaj bienq hoengzgyaemq liux, rauheiq fofo.
Seizneix buhvaq goenggeq dumz- swd, daengx ndang saenzdwddwd gangj mbouj ok vah, Yenz Cin lienzmuengz dwk denva heuh canghyw.
Yaep ndeu, aen ci 120 daeuj daengz lo, Yenz Cin hix riengzlaeng bae. Seizneix, Yenz Cin gaenq lumz ngoenzneix caeuq Meiz Li raennaj lo.
Daengz yihyen le, Yenz Cin bang goenggeq haenx gyau cienz yawj bingh. Canghyw naeuz Yenz Cin：“Boh mwngz ndangdaej dumz lo, souhnit dwgliengz, aeu di yw ma ranz gwn couh ndei lo.”
Yenz Cin caengz han canghyw, sawqmwh dingqnyi baihlaeng miz sing he cienzdaeuj.
“Canghyw, boh gou doekraemx, miz boux simndei he gouq de le, youh soengq daeuj yihyen, seizneix boh gou yienghlawz la? Boux vunz sim- ndei haenx youq gizlawz?”
Yenz Cin baez yawj, boux gangj dwg dahsau gyaeundei he. Yenz Cin roxnyinh dah sau neix gig najsug, cix geiq mbouj hwnjdaeuj youq gizlawz raen gvaq.
Yaepyet, Yenz Cin fwt geiq hwnj, dahsau neix couh dwg Meiz Li, Yenz Cin caeuq Meiz Li dwk gvaq geij baez sibinz, roxnyinh dah sau neix couh dwg Meiz Li.
“Dahsau, mwngz mizdi lumj boux baengzyoux gou Meiz Li ne.” Yenz Cin naemj yaep he, riu dwk doiq dahsau naeuz.
Dahsau dingq Yenz Cin baenz- neix naeuz, hix nyengh lo, de sijsaeq daj gyaeuj daengz din cim Yenz Cin, hix doeksaet naeuz：“Mwngz dwg Yenz Cin ba, gou couh dwg Meiz Li, boh gou doekraemx, miz vunz gouq de soengq daengz yihyen lo. Mwngz daeuj neix guhmaz?”
Canghyw naeuz：“Couh dwg daeg neix gouq boux doekraemx.”
Saehcingz couh dwg baenzneix mizyinx.
Geij bi neix, gyoengqvunz ndaw mbanj bae rog dajgoeng, haujlai reihnaz vut fwz, bohmeh Meiz Li cungj dawz daeuj dajndaem, byaekheu bi daengz haemh vunz caeuq doihduz cungj gwn mbouj liux.
Haetneix, boh Meiz Li bae ndaw suen ciemz byaek, faen di hawj gyoengq ranznden le, couh rib gij byaek hwnj aen cisamloek dawz bae haw gai. Boh Meiz Li ca mbouj lai ngoenzngoenz cungj yienghneix daeh byaek bae haw, diuz loh byaij baenz nanz baenz sug, mbouj ngeix ngoenz- neix doek roengz dah bae.
Daxboh Meiz Li mbouj roxnaj Yenz Cin, hix mbouj rox gij saeh Meiz Li caeuq Yenz Cin, de gaem fwngz Yenz Cin naeuz：“Docih mwngz lo lwgmbauq, ngoenzlawz mwngz ndaej- hoengq, couh bae laeng gou cunz- cunz.”
Yenz Cin riu dwk naeuz：“Ndei, ndei.”
Vunzmbanj cungj bae dajgoeng lo, Meiz Li bae mbouj ndaej, de yaek ndaej samcib bi, baenz okhaq gvaq, Meiz Li dwg boux lwgdog, bohmeh de yaek aeu vunz hwnjranz, geij bi gvaqbae, ra mbouj ndaej daegmbauq lawz ngamjsim.
Yenz Cin baez daih’it daengz ranz Meiz Li dwg seizhah, cingq dwg seiz dajsou, ranzranz guhhong nyaengqfoedfoed.
Yenz Cin daengz ranz Meiz Li, Meiz Li daengx ranz gaenq dauq ranz yietnaiq lo.
Boh Meiz Li baez raen Yenz Cin, couh angq dwk naeuz：“Mwngz mbouj dwg daegmbauq gouq gou haenx ma? Angqcoux mwngz daeuj daengz.”
Yenz Cin riu dwk ngaekngaek gyaeuj, naeuz：“Daxau, mboengqneix dajsou nyaengq, gou ngoenzneix daeuj daengz, nyauxluenh sou lo.”
“Daegmbauq, mwngz gaej gangj gij vah neix, mwngz ndaej daeuj laeng gou, dou angq lailai lo, raeuz ngoenz- neix aeu ndoet fiz bae cij ndaej.”
Boh Meiz Li gangj le, baenq- gyaeuj youh doiq Meiz Li naeuz：“Meiz Li, bae gaj bit dakdaih bouxaen raeuz.”
Meiz Li dingq le, doq byaij bae coh rienghbit, doq riu dwk coh Yenz Cin yaepyaep da.
“Sou song boux roxnaj?” Boh Meiz Li yawjyawj dahlwg cihgeij, youh muenghmuengh Yenz Cin naeuz.
“Boh, Yenz Cin dwg bouxaen gouqmingh mwngz, hix dwg baengz- youx gou ne.” Meiz Li han naeuz, Yenz Cin hix coh boh Meiz Li riunyumnyum.
Meiz Li dawz saeh baedauq lwnh baez he, boh Meiz Li dingq le, engq angq lo, riunyumnyum naeuz：“Caen dwg mbwn soengq faenh cingz neix.”
Byaek laeuj baij hwnj daiz, Yenz Cin hix mbouj guhhek, caeuq gyoengqde gwq gwn gwq gangjgoj.
Laeuj ndoet roengz dungx miz vah gangj, Yenz Cin doiq bohmeh Meiz Li naeuz：“Daxau daxsimj, vah naeuz miz yienz cien leix daeuj doxraen, fouz yienz doiqnaj mbouj roxnaj. Gaxgonq gou mbouj roxnaj Meiz Li, hix mbouj roxnaj sou bouxlaux. Ranz gou baihhaenx reihnaz noix, gaenq dajsou sat lo, gou baezneix daeuj, dajsuenq bang sou sat cij dauq ranz.”
Bohmeh Meiz Li dingq le, angq yaek dai, boh Meiz Li riuhoho naeuz：“Yienghneix raeuz ndaej haemhhaemh guhdoih ndoetlaeuj gangjgoj ne.”
Raih naz Meiz Li youq lajmbanj, liz ranz mbouj suenq gyae, gwn ringz sat le, yawjyawj ngaeuz bya hix raemh roengzdaeuj lo, geij boux couh guh- doih okbae dajsou.
Ndaw naz gakraemx caengz hawq, namhnaez lij yungz, mbouj ndaej youq ndaw naz cang dieg fadhaeux, haeux gvej ndei le, aeu daeh daengz gwnz haenz daeuj cij ndaej fad.
Doenghbaez dwg daxmeh gvej haeux, Meiz Li daeh haeux, daxboh fad haeux, seizneix lai miz Yenz Cin le, Yenz Cin couh daeh haeux, Meiz Li caeuq daxboh fad haeux caeuq cang haeux haeuj daeh.
Loeg caet nyied, nditndat hoeng- heiq hix aeng, Yenz Cin hanh ndik dumz laenghwet, hoeng ndaw sim de diemzsubsub.
Dajsou sat youh dajndaem, sinhoj dangqmaz. Ranz Meiz Li demlai Yenz Cin bouxcoz he guhhong, vaiqdangq haujlai.
Haemh ndeu, gwn caeuz sat le, boh Meiz Li naeuz：“Yenz Cin ha, dou cijmiz Meiz Li dah lwg dog, mbouj- yawx mwngz daeuj laeng dou. Caiq- naeuz, ranz mwngz baihhaenx reihnaz noix, dou baihneix reihnaz lai, goj ndaej lai ndaem doenghgo roxnaeuz ndaem di byaek, bi daengz haemh souhaeuj mbouj noix, ciengx ndaej song ranz vunz.”
Cihgeij caeuq Meiz Li dwg lwgdog caez, Yenz Cin gig mbouj siengj biek bohmeh bae, de ndaw sim fubfab mbouj dingz.
Miuz hong neix guh sat, Yenz Cin dauq ranz lo, de dawz saeh baedauq caeuq bohmeh lwnh baez he. Bohmeh doiq Yenz Cin naeuz：“Lwg ha, mwngz couh wngq gyoengqde ba, raeuz song ranz doxliz mbouj gyae, sou song bouxcoz goj ndaej seizseiz dauq ranz yawj dou, seizseiz cungj ndaej guh song ranz hong.”
It bae ngeih dauq, Meiz Li caeuq Yenz Cin baenzgya lo, gyoengqde dawz reihnaz cungj guh dajndaem, cawz ndaem haeuxnaz、ndaem haeuxyangz gak cungj doenghgo, lij ndaem haujlai byaekheu, ngoenz- ngoenz ndaej daeh byaek bae haw gai, ngoenzngoenz ndaej cienz haeuj daeh.
Yenz Cin doiq Meiz Li naeuz：“Seizneix gyoengqvunz gwndaenj ngoenz beij ngoenz ndei lo, seizhah siengj gwn byaek seizdoeng, seizdoeng siengj gwn byaek seizhah, raeuz mboujyawx dapbungz ndaem gij byaek geiqciet doxfanj haenx, hawj gyoengq- vunz gwn byaek engq habbak, engq fuengbienh, gangj mbouj dingh raeuz hix canh cienz bw.”
Meiz Li naeuz：“Mwngz gangj gij neix gou hix naemj gvaq lo, guh!”
Mboujnanz, aen bungz hung ndaem byaek he couh guh baenz lo. Yenz Cin caeuq Meiz Li engq nyaengq lo, ndaw bungz ndaem miz lwggwz hoengzgyaemq、makyungz hoengzfe、lwgmanh hoengzfwg, byaekgat、byaek- hau、byaekmbungj heusausau……
Byaek ndaem baenz dawz bae gai, daxboh daxmeh Meiz Li couh ngoenzngoenz dawz byaek bae haw gai, vunzmbanj cungj rox gij byaek gyoengqde ndei gwn, miz geijlai cungj mbouj gaeuq gai.
Ndaw ranz miz ngaenz souhaeuj, Yenz Cin caeuq Meiz Li hix mbouj yungh ok rog dajgoeng lo, youq ranz ndaem haeux guenj byaek, seiq boux vunzgeq hix mbouj lau mbouj miz boux ciengx.
编辑：黄誉琦 复审：黄慧华 终审：蒙树起
广西民族报社版权所有 未经书面授权禁止复制或建立镜像，广西民族报网—广西民族报原创文章，欢迎转载，转载请注明出处。
地址：广西南宁市桂春路16号 邮政编码：530021 联系电话：0771-5528076 5559552 传真：0771-5622291 电子邮箱：gxmzbzb@163.com
桂ICP备13003124号-2
桂公网安备45010002450838号
中国互联网违法和不良信息举报中心 广西互联网违法和不良信息举报中心 广西互联网辟谣平台
广西民族报社违法和不良信息举报电话：0771-5622291 举报邮箱：gxmzbsbgs@163.com