Goj Gungh Vwnzfangh - 广西民族报网

Goj Gungh Vwnzfangh

来源：广西民族报

作者：□ Ouh Caijfangh cingjleix fanhoiz

发布时间：2024-08-14

　　Gungh Vwnzfangh dwg vunz Mbanjliengbyauj Cingsih, de dwg boux guhnaz gungzhoj he, youq bonjdieg riuzcienz miz mbangj gojgaeq de.

　　Doxdax Goengfou Ndaej Daih’it

　　Seizhaenx, Gveihswn Couh hwng doxdax goengfou, miz doxdax nyingz naq、dwk gienz、 foux faexmbaenq、foux caxhung daengj.

　　Gungh Vwnzfangh foux caxhung gig ak. De dawz fag caxhung haenx, miz ciengh baj raez, samcib haj gaen naek, gaenzcax dwg faexdiet guhbaenz. Hoeng de foux hwnjdaeuj gig seizbienh, cij raen de hwnj roengz foekfan, baez raemj baez baet baez deuq, caendwg cij raen vunz mbouj raen cax, bouxyawj cungj vih de bek fwngz hemq ndei.

　　Cingq foux ndaej hwnj yinx, mwh de deuq fag cax doxhwnj, mbouj siujsim gaenzcax duet ok gyang fwngz, ngaiz gveng hwnj byonghmbwn bae lo, gyoengq vunzmbanj gaen daeuj yawj haenx cungj vih de simndaet liux lo. Geij ngoenz neix Gungh Vwnzfangh deng ok haexlwed, roxnyinh daengx ndang mbouj miz rengz geijlai. Banhaet de lij sawq sikgvangq mbaw naengvaiz he, saenq bonjfaenh lij miz rengz, cij gietdingh daeuj doxbeij. Yawjraen caxhung duet fwngz, bouxyawj saetmuengh lo. Gungh Vwnzfangh hix ngawh le yaep he, yienzhaeuh gig vaiq couh dingh roengzdaeuj lo, de gibseiz naemj ok aen geiq ndeu, gangj seiz menh, seiz haenx vaiq, swnh caxhung caengz doek daengz gwnz namh, de mbin hwnj din’gvaz, fag caxhung deng dik hwnj ciengh baj sang, caj fag cax doek roengz seiz, de yungh fwngzswix ciep gvaq, yienzhaeuh yiengq baihlaeng raemj bae, cienq gvaq ndang youh yiengq baihnaj baet bae, couh baenzneix ciep hwnj de youh laebdaeb foux roengzbae lo. Bouxyawj youh faenfaen bek fwngz haenh ndei lo. Couh aenvih “ciu ak” neix, de gingqyienz ndaej daih’it mingz.

　　Hoeng aenvih yungh ga haenq- rengz dik fag caxhung, ga de ngaiz foeggawh ndaej lumj aen lwgfaeg hung nei, gvaq baenz ndwen cij roengz mbonq byaij ndaej.

　　De Dwg Vunzbag

　　Ndaw singz miz meh cawjdieg he, leixhaih youh yakdoeg, vunzmbanj dingzlai dwg coyungh reihnaz de. Moix baez de roengz mbanj daeuj, gyoengqvunz mboujdanh ngaiz ngaem gyaeuj roengz gvih, baema seiz lij ngaiz soengq ngaenz soengq gaeq、cuengq bauq dem. Gyoengqvunz doiq de youh haemz youh lau. Lij miz vunz caeg aeu betcih de haem youq laj go- gyoij, mieng de dai vaiq di.

　　Ngoenznaengz, dingqgangj meh- cawjdieg youh yaek daeuj lo, gyoengqvunz bouxboux najsaep naj- mbwng, swenj hoj mbouj dingz, cungj caeuq Gungh Vwnzfangh geqhaemz. Gungh Vwnzfangh dingq le, gietdingh aeu ceihfad meh cawjdieg neix cij ndaej, yienghneix de couh daengq geij boux laux baenzlawz guh.

　　Mwh meh yak haenx naengh giuh daeuj daengz diuz loh henz mbanj, raen Gungh Vwnzfangh rap rap haeuxvaiz he lanz youq gwnz loh neix. Saeyez caeuq bouxramgiuh raen bouxwnq cungj dwg siujsim sisi, hoeng bouxsai maengh neix ndwn maenh- maenh youq gizhaenx, mbouj gangj vah hix mbouj nyienh roengz gvih, gyoengqde hozndat lo, ram aengiuh saeg gvaqbae siengj saeg laemx Gungh Vwnzfangh, hoeng Gungh Vwnzfangh gig riengj couh bienq gvaqbae lo, baenzlawz saeg ndaej daengz de ne. Mehcawjdieg youq ndaw giuh boekbit ca di ngaiz laemx, de hozndat raixcaix, iet gyaeuj okdaeuj ndaq：“Mbong vunz sou cawzle gwn lij guh ndaej gijmaz, coengh gou moeb de dai bae.”Vunzcawj doengh bak, vunzhoiq doengh fwngz, gyoengqde homh gvaq- bae couh yaek doiq Gungh Vwnzfangh roengz fwngz, cijraen Gungh Vwnz- fangh mbouj gaenj mbouj gip, coenz vah he hix mbouj gangj, cuengq roengz aenrap, yut ok diuzhanz couh yied mbong vunz neix, miz geij boux deng dub naj gawh ndaeng ngeng liux. Mehcawjdieg raen le huj song da yaek ok feiz lo, de duet haiz ok couh hwnjbae dub Gungh Vwnzfangh, byawz rox de deng Gungh Vwnzfangh mbat hanz he gyongz dawz najbyak, youh deng mbat ga he dik dawz aendungx, mehcawjdieg couh ngaiz laemx roengz youq haenx daejnga’nga lo.

　　（1）

编辑：黄誉琦复审：黄慧华终审：蒙树起