来源：
发布时间：2024-08-07
（1）
“Daegfaenz, Byaigofaiz laj reih lwggyoij gou haenx, dwg mwngz ciemz lwi?” Gyanghaet, Daegfaenz cingq yaek okdou bae aen cangj datbenj guhhong, Vazciengz fag byoz haenx cix fatheiq fwfw daeuj daengz naj bakdou fokcam.
“W, gou ciemz.” Daegfaenz miz di mbouj naihfanz, “baenzlawz yiengh?”
“Guhlawz bang gou ciemz bae? De youq haenx famh mwngz ha?”
Daegfaenz nyaenx mbouj ndaej swenj hwnjdaeuj：“Giz dieg gwnz naz gou, gou senq hah gvaq lo, mbouj cinj mwngz ndaem roengzbae!”
“Gou bae gyaenx guh reih nyaenx lai bi, cungj mbouj raen saek boux hah gvaq, guhlawz gou baez ndaem geij go gyoij roengzbae, mwngz couh naeuz mwngz hah gvaq, guh ndaej nyaenx oknaj?”
“Bibi gou cot nywj haenznaz cungj cot haeuj gizde bae, mwngz raen nywj dai le cij bae ndaem, caen rox guhgwn ho.”
“Mwngz baenzlawz gangj cungj ndei, fanjcingq mbouj dwg dieg mwngz. Gou dwgrengz roengzbae lo, itdingh aeu ndaem.”
“Mwngz dauq ndaem, gou ciuq- yiengh ciemz.”
“Gou aeu yieng bae mang (mieng), byawz ciemz byawz dai caeux, daengx ranz dai cied dai ndoq bae……”
“Ndaem gwnz naz gou couh dwg hangz gou aeu, byawz hangz aeu byawz dai, gag mang gag haeuj de!”
Song boux de doxndaq, yied swenj sing yied sang, mongz ndaej daengx mbanj cungj ndaej nyi, daengx byoz ma raeuqhumhum, haujlai vunz cungj iet gyaeuj ok rog cueng daeuj yawj.
Gvaqlaeng miz vunz caegcaeg guh fwen naeuz：
Caemh mbanj vunz doxceng,
Caih mwngz deng naeuz loek,
Ndaq coenzcoenz yakdoeg,
Cog rox boek gyaranz……
（2）
Diegndoi Byaigofaiz, gyaengh mieng fwz laj reih’oij Vazciengz haenx, nyuenz dwg diuz miengraemx suijli ndeu, mwh yinzminz gunghse haenq hemq “vunz itdingh ak gvaq mbwn” haenx, daj aen suijgu hung Nazrenh vut guh diuz miengraemx ginggvaq Mbanjdaemzmiuz doeng bae baih Nazgut、Luegyiemx dwk naz. Gaijgwz hailangh naz baen hawj gak ranz gag guh le, diuz mieng neix couh vit fwz mboujmiz vunz guenj lo. Duenh mieng Mbanjdaemzmiuz neix gizgiz cungj deng vunz ciengjciemq hai reih ndaem doenghyiengh, dan lw gyaengh laj reih Vazciengz、gwnz naz Daegfaenz neix caengz miz vunz hai. Seizneix Vazciengz ndaem geij go lwggyoij roengzbae, Daegfaenz cix mbouj haengj, ceng yaek dai yaek niu, boux mbouj fug boux.
Miz denva bauqnaeuz Vazciengz caeuq Daegfaenz youh vih ceng dieg haenx yaek doxmoeb lo, cunhveij diuzgej cujyin Laujluz caeuq geij boux gihcwngz ganbu sikhaek ganj daeuj yienhciengz guh bouxlaux, gienq song mbiengj gaej cungdoengh, naeuz:“Doxnyiengh saek yamq couh fouz saeh, nyaenxnyak gaemz heiq caez hozliengz.” Hoeng mbouj miz saek boux dingq haeujrwz.
Vazciengz naeuz:“Doengh bi haenx, dieg neix gou daegdaengq louz hoengq fuengbienh dawzreih langh vaiz, seizneix mbouj miz vaiz lo, cij ngeix ndaem doenghyiengh.”
Daegfaenz naeuz：“Langh mbouj dwg lau nyak (mbaw nye doenghgo sang lanh yingjyangj gohaeux damq maj) mbaek naz gou, gou caeux couh ndaem lo.”
“Lau nyak naz, mbouj hawj ndaem gyoij hix ndaej, gou ndaem lwgduh ndaem lwggva, goduh、 go- gva mbouj rox nyak naz.”
“Mbouj ndaej!” Daegfaenz mbouj haengj, “yienznaeuz seizneix ndaem mbouj ndaej gijmaz, hoeng dangh- naeuz miz saek ngoenz guekgya cwngdieg guh gijmaz roxnaeuz miz lauxbanj daeuj co dieg, de couh dij cienz lo.”
Laujluz naeuz：“Yienghneix ba, sou song boux hixnaengz cungj gaej ndaem lo, mienx ndaej nyak naz lajde. Gou youq neix coh sou gangj cingcuj bae, diuz mieng fwz neix lij dwg dieg suijli. Danghnaeuz caen miz ngoenz guekgya cwngyungh roxnaeuz laux- banj co dieg, mbouj guenj byawz ciengjciemq le geijlai nanz, ndaej ngaenzbouj cungj dwg gvihaeuj suijli bumwnz. Swnhbienh lwnh sou aen siusik ndeu, Suijligiz gaenq miz vwnzgen roengzdaeuj lo, naeuz bineix nienzdaej yaek haihong dauqfuk coihguh diuz miengraemx neix……”
Ceng bae ceng dauq, doeklaeng cungj mbouj saek boux ndaej aeu, hoeng ranz Vazciengz caeuq ranz Daegfaenz cix bienqbaenz “boux- caeuz”, doxroeb mbouj doxdongx lo. Miz vunz gag lwnh naeuz：
Bouxboux cix vunz gvai,
Dai cungj bae capheiq,
Ceng gyaeujnaz gyaeujreih,
Daengx seiq caenh gietcaeuz.
（3）
Daengngoenz lumj bogfeiz venj gyangmbwn, bik ndaej gwnz roen yaek hwnj feiz, duzbid youq gwnz faex swenj dai swenj lix. Daegfaenz bae aen cangj datbenj gyawj mbanj guhhong, de souhong gwih cidienh dauqma daengz bakroen gyaeujmbanj, fwt siengj roengz Dahsuijmuh bae daj- caemx doiq hwngq.
De ce aen cidienh lajfaex henzroen, couh byaij roengz Dah- suijmuh bae. Dahsuijmuh youq baihlaj goengloh, diuz dah iqet raemx sawyauyau, geij aen vaengz doxdab, daj goengloh byaij doxroengz saek bak baj yamq couh daengz vaengz daih’it, henz vaengz miz geij go faexaekraemx raemhrwd, raemxdiuqdat daj baihgwnz biusasa roengzbae, caen dwg giz ndei dajcaemx doiq hwngq. Yienznaeuz cwngfuj youq henz vaengz baek gaiq baiz gingjceih ndeu：“Vaengz laeg yungyiemj, mbouj ndaej roengz raemx dajcaemx”, hoeng nanz mbouj nanz lij miz lwgnyez caeg daeuj faengz raemx.
“Gouq vunz ho, daeuj gouq vunz vaiqdangq ho, miz vunz doekraemx lo——” Daegfaenz ngamq yaek byaij daengz vaengz daih’it, sawqmwh nyi sing heuh gouq vunz, raen geij boux lwgnyez youq henz vaengz cuenq bae cuenq dauq, gwq daej gwq hemq. Mbouj ndei lo, miz vunz doekraemx lo. Daegfaenz sikhaek haidin buet gvaqbae, duetbuh fili fwdlwd couh diuq roengz raemx……
Yaep ndeu, Daegfaenz umj laeq lwgnyez lohlanglang ndeu hwnj hamq daeuj, loq dauqndiengq cuengq gwnz dieg boemzninz, doq yungh fwngz bongx baihlaeng de doq heuh geij boux lwgnyez bang mbon buhvaq aeu soujgih daeuj dwk denva hawj 120.
Riengz dwk, geij boux vunzmbanj ganj daeuj daengz doengzcaez camgya ciengjgouq lwdlwd. Mbouj geij nanz, aen cigouqvunz veiswnghyen gwnz- haw hix daeuj daengz lo, geij boux canghyw husw dinfwngz riengjret ram lwgnyez doekraemx hwnjci. Daeg- faenz soeng gaemz heiq ndeu, de gag angq bonjfaenh guh gienh saeh ndei ndeu. De yawj hwnj gwnz ci, doeksaet yat, Daegvuengh gvanbaz caemh bin hwnj cigouqvunz bae. Daegvuengh dwg daeglwg Vazciengz, nanzdauh laeq lwgnyez doekraemx neix dwg……
Cigouqvunz hai bae le, Daegfaenz cij daj ndaw bak gyoengqvunz ndaej rox, laeq lwg doekraemx couh dwg daeglan Vazciengz. De lumj deng diuz gangjbya gaz hoz nei, ndwnj mbouj roengz, doenx mbouj ok.
Doengxhaemh Daegfaenz deng yah de vet naeuz：
Dwg mbouj dwg fangz doz,
Ndaw hoz nyaenx cungdoengh,
Dwg mbouj dwg fangz loengh,
Coemj bae gouq “bouxcaeuz”.
（4）
Hwnj lingq gag miz roengz lingq doiq, geij ngoenz bonz nditndat yaek dai, song ngoenz neix cix doek fwn mokmok mekmek, haujlai haeuxnaz、haeuxyangz、duhdoem、lwggva cungj deng raemx dumh liux. Aen cangj datbenj caemh deng yiethong, Daeg- faenz dinghyouq ndaw ranz ngonz densi. Fwtfwh duzma ranznden raeuq- houhou, Daegfaenz ok bakdou baez yawj, aengxsaengx liux, lumj yawjraen daengngoenz daj baihsae hwnjdaeuj nei, Vazciengz song gyaeujyah caeuq Daegvuengh byaij daeuj coh ranz de, Daegvuengh fwngz riuj song aen daehbyukngwz bongzbwt.
“Bouxcaeuz” sawqmwh daeuj daengz ranz, Daegfaenz ndwn ngaez- ngwd, ndaw sim gig mbouj cwxcaih.
“Daegfaenz ha, caen gyo’mbaiq mwngz lo.” Vazciengz naj nding daengz goek rwz, naeuz：“Caeklaiq mwngz mbouj geiq caeuz, mboujnex, seizneix gou gaenq mbouj miz daeglan heuh lo.”
Yah Vazciengz hix naeuz: “Doenghbaez dwg dou mbouj deng, daekcoih mwngz lo……”
Daegvuengh cuengq song aen daehbyukngwz hawj Daegfaenz naeuz：“Ne, maklaehcei dou cug lo, euj geij boengh daeuj hawj sou cimz feih.” Gangj sat youh mbon dawz aen fungbau ndingfwg ndeu oet hawj Daegfaenz.
Daegfaenz vuengmuengz baet fwngz doi naeuz：“Gaej nyaenx guh, gou mbouj aeu.”
……
Hotdaeg gej lo, “bouxcaeuz” hix doxhuz lo, Daegfaenz daengx ndang soengswt. De youq “gien baengzyoux” raiz naeuz：
Vaiz rox bae,
Cae rox haeuj,
Caezcaemh aen mbanj youq,
Raeuz yaek gaeuj gyae di.
编辑：黄誉琦 复审：黄慧华 终审：蒙树起
广西民族报社版权所有 未经书面授权禁止复制或建立镜像，广西民族报网—广西民族报原创文章，欢迎转载，转载请注明出处。
地址：广西南宁市桂春路16号 邮政编码：530021 联系电话：0771-5528076 5559552 传真：0771-5622291 电子邮箱：gxmzbzb@163.com
桂ICP备13003124号-2
桂公网安备45010002450838号
中国互联网违法和不良信息举报中心 广西互联网违法和不良信息举报中心 广西互联网辟谣平台
广西民族报社违法和不良信息举报电话：0771-5622291 举报邮箱：gxmzbsbgs@163.com