Goj Lwggvai - 广西民族报网

Goj Lwggvai

来源：广西民族报

作者：□ Liengz Fuyungz / 梁富容

发布时间：2024-08-02

　　Lwggvai dwg boux lwgnyez coengmingz ndeu, youq sevei gaeuq, de ciengzseiz riengz gak cungj vunzvaih saehvaih daeuq, mbatmbat cungj ndaej hingz. Baihlaj dwg goj- gaeq de.

　　Ndi Yungh Rek Cawj Ngaiz

　　Miz ngoenz ndeu, Lwggvai riengz geij bouxhoj ndaw mbanj bae henzdah aeu nienjraemx nienj haeux.

　　Dungx iek le, daihgya naeuz: “Lwggvai, raeuz caenhmiz haeux, ndi miz rek, mwngz naengz mbouj naengz ngeix aen banhfap he, mbouj yungh rek cawj can ngaiz ndeu hawj gyoengqraeuz gwn ne?”

　　Lwggvai siengj yaep he gangj: “Cijaeu caezgya nyienh’eiq gwn, haj can gou hix cawj ndaej.”

　　Lwggvai bae raemj song hoh faexcuk oiq ma, youq gyaeuj he mbongq congh iq ndeu, yienzhaeuh dawz haeux caeuq raemx guenq haeuj baihndaw bae, caiq fung congh doxdauq, cuengq haeuj ndaw feiz bae saz. Cig saz daengz faexcuk coemh liux, couh dawz okdaeuj aeu cax bag, ngaiz ndawde youh rang youh hau.

　　Daihgya coengzlaiz caengz ndaej gwn gvaq gij ngaiz yienghneix, bouxboux cungj haenh myaiz rih caez.

　　Cawx Nohcwz

　　Hakdoj ok aen nanzdaez ndeu hawj Lwggvai gangj:“Lwggvai, ngoenzcog mwngz yien duz cwz ndeu bae gai, ndaej cienz couh cawx sam gaen nohcwz ma gou gwn, gyang- haemh lij aeu yien cwz ma hawj gou.

　　Ranz hakdoj miz cwzguhhong caeuq cwzbyaek, yax miz cwzcij.

　　Ngoenz daihngeih, ranz ngamq rongh, Lwggvai laeh duz cwz miz cij ceiq lai bae gwnz gai le, bae ciq bouxsug he aeu aen doengjraemx daeuj, nyaenj ndaej gyang lai doengj cijcwz le, couh gai cij singjsien neix, aeu cienz bae cawx sam gaen nohcwz, lij lw cienz, couh bae ndaw diemqlaeuj cawx song deb byaek ndei, sai can laeuj ndeu, cij ruj nohcwz caenh cwzcij ma ranz lo.

　　Hakdoj raen Lwggvai ciuq yauh- giuz de bae guh ndaej gig ndei, muenxeiq dangqmaz, couh cingj Lwggvai bae ganq hongcab hawj de.

　　Swiq Saw

　　Lij caizcawj daengq Lwggvai: “Ngoenzneix ndit ndei lai, mwngz dawz gij doenghyiengh ndaw ranz cungj swiq dak hawq bae.” Gangj sat le couh bae ganjhaw.

　　Lwggvai dawz doenghyiengh ndaw ranz cungj rubrub swiq mbaeq liux le, couh rap doi saw caizcawj bae haenzdah swiq, lij aeu faexlwg moebmoeb yungz cieng ceij le, caiq rap ma ranz aeu demx bu dak.

　　Lij caizcawj ma raen le, hozndat lumj byajbag, haenqrengz ndaq Lwggvai: “Mwngz aeu boiz saw hawj gou! Mbouj boiz, gou couh moeb mwngz dai bae!”

　　Hoeng Lwggvai mbouj lau saek di, riu dwk gangj: “Lauxyez, haetneix mwngz mbouj dwg naeuz gou dawz doxgaiq ndaw ranz cungj swiq liux dak liux ma? Gou ciuq vah mwngz cix dawz saw bae swiq le, neix miz maz loek ne?”

　　Lij caizcawj gangj: “Doxgaiq hukhak neix! Nanzdauh mwngz ndi rox saw swiq mbouj ndaej ma?”

　　Lwggvai lijdwg hozswnh han: “Gou ndi doeg saw gvaq, baenzlawz rox swiq ndi ndaej? Caiqnaeuz haetneix mwngz hix mbouj daengq gou mbouj swiq saw ya!”

　　Lij caizcawj rox dauhleix gangj mbouj gvaq Lwggvai, couh aeu faexdwngx yaek lemh de, hoeng de senqsi buet deuz mbouj raen ngumhngaeuz lo.

　　Moek Haeuxyangz

　　Lwggvai bae ndai naz hawj caizcawj Veiz Yinghyouj, cij youq gyang song hangz gyaz haeux byaijbyaij, hawj raemx doengq couh ndaej lo. Veiz Yinghyouj bae genjcaz raen le, hemq Lwggvai lingh ndai gvaq, lij son de naeuz: “Mbatlaeng ndai naz aeu ndai daengz goek gohaeux bae, caiqlix aeu fan gij boengz haenx hwnjdaeuj.”

　　Lwggvai daegdingh cam: “Laux- yez, baenzhaenx ndai rag haeux ndi gat ma?”

　　Veiz Yinghyouj han: “Rag gat le, de rox maj rag moq, yienghneix gohaeux couh ndaej fat lo.”

　　Gvaqlaeng, Veiz Yinghyouj heuh Lwggvai bae moek haeuxyangz. Lwg- gvai aeu faggvak caenhrengz vat daengz laj goek gohaeuxyangz bae, sawj dingzlai rag cungj gat liux.

　　Ngoenz daihngeih, Veiz Yingh- youj bae ndaw reih yawj, gohaeux- yangz cungj reuq liux! De hemq Lwggvai boiz haeuxyangz hawj de.

　　Lwggvai cang guh moengjdoengj gangj: “Lauxyez, mwngz naeuz ndai naz caenhrengz ndai daengz goek bae, nanzdauh moek haeuxyangz mbouj ityiengh ma?”

　　Veiz Yinghyouj fatheiq gangj: “Hukhak mwngz! Haeux dwg gohaeux, neix dwg gohaeuxyangz! Rox lwi?”

　　Lwggvai gangj: “Neix yax gvaiq mwngz yenzlaiz ndi naeuz cingcuj. Seizneix gou rox lo, mbatlaeng gaij couh ndaej la.”

　　Veiz Yinghyouj dingq le, hix doiq Lwggvai fouzfap.

　　Gvaq Dah

　　Veiz Yinghyouj dwg boux caiz- cawj sim doeg fwngz lad ndeu, moix baez bae coico bikcaiq, danghnaeuz doiqfueng boiz mbouj hwnj, de raen gijmaz ndei cungj ciengj ma ranz.

　　Miz baez ndeu, Veiz Yinghyouj heuh Lwggvai riengz de bae Mbanj- runghsaeh coi cohaeux, raen ranz bouxhoj he miz aen doengj fadhaeux caeuq fan mienzdauq, couh ciengj ma ranz. De heuh Lwggvai gwed doengj fadhaeux, de gwed mienzdauq.

　　Seiz ma ranz, Lwggvai byaij ndaej bieng, Veiz Yinghyouj gaen mbouj dawz, daengz haenzdah, gwnz dah caenhmiz song diuz giuzfaex, Lwggvai couh cek giuz deuz, cuengq doengj fadhaeux roengz dah bae, bakdoengj yiengq gwnz, baenz aen saz he, cihgeij couh naengh haeuj bae, song fwngz guh ciengj vad saz gvaqbae lo.

　　Veiz Yinghyouj ma daengz haenzdah raen giuz ndi miz le, youh raen Lwggvai aeu doengj fadhaeux guh saz doh gvaq dah bae, couh swenj: “Lwggvai! Vaiq ma ciep gou ya!”

　　Lwggvai gangj: “Lauxyez! Fan mienzdauq hix gojyij guh saz ya!”

　　Veiz Yinghyouj cuengq mienz- dauq roengz raemx bae, raen de yaeng’yaeng fouz, couh naengh hwnj gwnz bae, hag Lwggvai aeu fwngz vad raemx gvaq dah, codaeuz lij ndaej, mienzdauq liz hawz le raemx yied sup yied lai, sup raemx yied lai yied caem doxroengz. Daengz gyang dah, mienz- dauq couh caem daengz daej dah bae la. Veiz Yinghyouj ndi rox youzraemx, buekmingh vax mienzdauq mbouj cuengq, satbyai hix caeuq mienzdauq caem roengz daej dah bae ciengx bya lo.

编辑：黄誉琦