Duzmalwg Ra Daengngoenz - 广西民族报网

Duzmalwg Ra Daengngoenz

来源：广西民族报

作者：Moz Gwzli / 莫克利

发布时间：2020-09-25

Gyoengq dahsau doxyaeng baenzlawz siuqva gyaeundei.Dozswh

　　Youq ndaw aen suenva hung gyaeundei, miz duz malwg ndeigyaez ndeu youq. Moix ngoenz gvaq banringz, de cungj daengz gwnz diegrum bingzbwd hung dak ndit, gij ndit raeujrub, de roxnyinh sangj dangqmaz lo.

　　Mboujgvaq, gij ndit ciuqrongh geij aen cungdaeuz le, couh ndoj hwnjdaeuj lo. Duzmalwg naemj: Danghnaeuz daengngoenz daj goek daengz byai cungj youq henz ndang gou, yienghneix geijlai ndei ha! Ndigah de gietdingh bae ra daengngoenz.

　　Duzmalwg biek bouxcawj le, couh hwnj roen lo. De bungqraen duzhanq hau hung, couh cam:“Daengngoenz youq gizdieg lawz youq?” Duzhanq hau hung naemj hix mbouj naemj couh hannaeuz:“Couh youq giz daemxgyaeuj doengh nazhaeux.” Duzmalwg gyo’mbaiq duzhanq hau hung, angqvauvau buet bae coh doengh nazhaeux.

　　Haeuxriengz youq laj ndit angq diuqfoux yetyet. “Maqmuengh ndaej lwnh hawj gou, daengngoenz youq gizdieg lawz youq?” Duzmalwg cam.

　　Gyoengq haeuxriengz cam:“Mwngz yaek ra daengngoenz guh maz ne?” Duzmalwg naeuz:“Gou siengj hawj daengngoenz ciengxlwenx mbouj lizhai suenva gou.” “Duzmalwg dwggyaez, danghnaeuz daengngoenz ciengxlwenx youq ndaw suenva mwngz, dou couh mbouj ndaej baenz naed lubw! Dou hix liz mbouj ndaej daengngoenz ha!” Gyoengq haeuzriengz gikdoengh naeuz.

　　“Danghnaeuz gou mbouj ndaej dak ndit, gij naengbwn gyaeundei unqnem baenz ndang gou, couh yaek bienq ndaej nyauqnyet lo.” Duzmalwg naiqnueknuek naeuz.

　　Seizneix gyoengq haeuxriengz ciengq naeuz:“Daengngoenz, daengngoenz, venj youq gwnz bya sangngaungau.” Duzmalwg baez dingq, sikhaek buet bae coh goengq bya gizgyae.

　　Duzmalwg baegfofo buet daengz gwnz bya, daeuj daengz laj go faex hung ndeu yietnaiq yaep he.

　　Gwnz faex miz gyoengq duzrwi iq, duzmalwg naeuz:“Gou yaek ra daengngoenz, sou youq gizneix youq, itdingh roxnaj daengngoenz ba?” Gyoengq duzrwi iq naeuz:“Daengngoenz mbouj youq gizneix youq, de youq ndaw daihhaij gizgyae youq.” “Daihhaij youq gyawz?” Gyoengq duzrwi iq naeuz:“Youq gizdieg gig gyae gig gyae, itcig byaij coh baihnaj bae, aiq yaek byaij geijcib ngoenz cij ndaej daengz ne, sinhoj dangqmaz!”

　　“Gou itdingh aeu ra ndaej daengngoenz.” Duzmalwg gangj sat, couh hwnj roen lo.

　　Gij roen bae coh daihhaij, youh gyae youh yungyiemj. Duzmalwg buet ndaej youh naet youh naiq, cungjsuenq daeuj daengz daihhaij lo.

　　Youq henz haij, duzmalwg bungz daengz le haujlai doenghduz iq, hoeng gyoengqde cix mbouj rox daengngoenz youq gyawz youq. Miz duzbaeulwg simndei ndeu, hawj duzmalwg bae camcam duzsahyiz hung, naeuz duzsahyiz hung baenzngoenz youq ndaw daihhaij youz bae youz dauq, rox gij saeh lai dangqmaz, cij miz de cij rox ranz daengngoenz.

　　Duzmalwg sai le haujlai goengrengz, cij ra raen le duzsahyiz hung. “Sahyiz bohlungz, mwngz ndaej lwnh hawj gou, daengngoenz youq gyawz youq lwi?” Duzmalwg roxsoq cam.

　　Duzsahyiz hung yawj duzmalwg baez da he, danq le gaemz heiq naekgywggywg naeuz:“Daengngoenz liz digiuz gyae’gyanggyang, seizneix gyoengqvunz gwnz digiuz, vanzlij mbouj caengz miz byawz bae daengz gizhaenx gvaq ne! Daengngoenz dwg ndaek hwngzsingh hung caemhcaiq rox fat rongh fat ndat ndeu, de soengq gij ndit caeuq gij ndat hawj raeuz, sojmiz doenghyiengh gwnz digiuz cij ndaej majhung、lixyouq, ndigah sojmiz doenghyiengh gwnz digiuz, cungj liz mbouj ndaej gij ndit daengngoenz daeuj ciuq. Ndigah, daengngoenz dwg duh daengxcungq sengmingh caeuq sojmiz doenghyiengh gwnz digiuz.” Duzmalwg ndaejnyi le yaepyet singjsag lo, de roxnyinh swhgeij daiq seihsei lo, couh najnyaenq dangqmaz ngaemgyaeuj roengzdaeuj.

　　Duzsahyiz hung nai de naeuz:“Raeuz mbouj ndaej ciemq aeu daengngoenz ne! Daengngoenz gig hung gig ndat, couh lumj aen giuzfeiz hung ndeu, aen giuzfeiz hung neix caeuq digiuz, seizseiz cungj cingq baenqlulu, gij ndit mbouj ndaej itcig dingzlouz youq gizdieg lawz. Danghnaeuz caenh ciuq gizdieg ndeu, mwngz vanzlij mbouj caengz deng gangq cug?”

　　Daihgya dingq le cungj sing gok riuhaha. Duzmalwg hix mbouj ndei eiqseiq riu lo. Duzsahyiz gaenlaeng youh naeuz:“Yaep dem, gou couh baij roeghaijyen soengq mwngz baema ranz!”

　　Gvaq le yaep ndeu, gyoengq roeghaijyen mbin daeuj lo, gyoengqde doz duzmalwg youq gwnz baihlaeng, mbin coh mbanjranz de. Gyoengqde mbin gvaq goengqbya caeuq doenghnaz seiz, duzmalwg coh haeuxriengz caeuq duzrwi angq hemq naeuz:“Gyoengq baengzyoux dwggyaez, ginggvaq mbatneix hojnanz bae cimhra, gou rox lo, daengngoenz dwg duh raeuz daihgya! Hawj raeuz caez vih gij ndit caeuq gij ndat daengngoenz angqvauvau ba!”

编辑：韦亦玮