来源：广西民族报
发布时间：2020-09-17
It
Boux dwk dienhvah hawj gou dwg dahsau ndeu, de naeuz de dwg Siujlinz, de cam gou dwg mbouj dwg lij miz ranz okco dem.
Gou naeuz miz, ranz dwg gan dog, youq it laeuz, 30 geij aen bingzfueng, miz ranzdajcawj, miz rugdajcaemx, ndawranz gij doxgaiq sawjyungh cungj miz caez, mbouj yungh daiq maz doxgaiq, haeujdaeuj couh ndaej youq, haeujok gig fuengbienh, ceiq hab bouxgeq youq. Siujlinz naeuz de couhdwg co ranz hawj bouxgeq youq.
Lajbyonghngoenz Siujlinz daeuj yawj ranzco. Seizneix daengngoenz aengfwdfwd, Siujlinz naeuz:“Baenz- neix ndat mbouj miz gunghdiuz baenzlawz youq ndaej?” Gou naeuz: “It laeuz liengz, mbouj yungh gungh- diuz ni, mbouj saenq mwngz haeujbae yawjyawj.”
Siujlinz daeuj daengz ndaw fuengz, yawj neix yawj haenx, lij aeu soujgih ingjsiengq dem. Gou cam:“Mwngz dwg co hawj daxboh dax- meh mwngz youq roxnaeuz co hawj gyagoeng gyabuz mwngz youq?”
Siujlinz naeuz:“Gou dwg bang dah baengzyoux gou ra ranz, de yaek co ranz hawj daxmeh de youq.”
Siujlinz naeuz daxmeh baengz- youx de song aen rwz mbouj daiq singjsak, vunz gangj vah, de loq dingq ndaej nyi loq mbouj, diuz ga’gvaz de gvez di, co ranz laeuz hwnjroengz sinhoj, mbouj fuengbienh, dah baengzyoux de youq baihrog dajgoeng dauq mbouj ndaej, heuh Siujlinz daeuj bang ra ranzco.
Siujlinz naeuz:“Haxbaenh gou dawz gij siengq aen fuengz mwngz fat hawj dah baengzyoux gou lo, de gig rimhoz. Gou seizneix bae ciep daxmeh de gvaqdaeuj yawjyawj, daxmeh de naeuz baenz youq, yaep dem gou couh caeuq mwngz dingh habdoengz, caemhcaiq gyau ngaenz co hawj mwngz.”
Ngeih
Siujlinz daiq daxmeh baengzyoux de daeuj daengz lo, yah neix byoemgyaeuj ndaemndatndat, buhvaq seizhwng, saeknoh hoengzmaeq, yawj mbouj ok de ndaej geijlai bi. De byaij roen baez ndiengq baez ndiengq, gig dwgrengz. Aen bak de guiz gvaq mbiengj he bae, gangj vah mbouj baez coenz, dingq gvaq geij coenz le cij loq rox de gangj maz.
“De dwg dieg dou boux meh- mbwk ceiq saundei he bw,” Siujlinz gangj sat dep rwz gou gangj naeuz:“Ndaejhoengq gou caiq caeuq mwngz gangj gij goj de.”
Gou ngaekngaek gyaeuj. Ciep- daeuj Siujlinz couh caeuq gou dingh habdoengz, gou naeuz:“Ngaenz co it ndwen 300 maenz, lij aeu gyau ngaenzat 300 maenz, gij ngaenzat neix daengz seiz mbouj co ranz le gou caiq doiq dauq. Danghnaeuz mwngz mbouj co ranz lo, ngaenz dienh ngaenz raemx mwngz caengz gyau, gou couh youq gij ngaenzat neix gemj okdaeuj, lij lw geijlai couh doiq hawj mwngz geijlai. Ngaenz dienh ngaenz raemx baenz ndwen gyau baez, ciuq sawjyungh dohsoq bae suenq, mwngz yungh geijlai couh gyau geijlai.”
Siujlinz naeuz rox lo, rox lo. Siujlinz mbouj dwg boux co ranz, gou mbouj hab caeuq de ciem habdoengz. Gou naeuz:“Siujlinz, gou caeuq daxmeh baengzyoux mwngz ciem habdoengz cij deng, mwngz cam de aeu mbaw sinhfwncwng de daeuj hawj gou cij ndaej.”
Yah co ranz naeuz de mbouj daiq sinhfwncwng, gou cijndei caeuq dah- lwg de ciem habdoengz, dahlwg de heuhguh Siujcouh, 1986 nienz okseng, seizneix de youq Gvangjcouh aen gunghswh hung ndeu hwnjban. De mbouj youq, gou couh heuh Siujlinz bang de ciem mingz.
“Seizneix byawz mbouj miz sinhfwncwng? Seizneix byawz okrog mbouj daiq sinhfwncwng?” Gienh saeh neix youq ndaw ukgyaeuj gou baenqcienq mbouj dingz. Gou caeuq Siujlinz ciem ndei habdoengz hawj gou ngaenz co le, gou caiq cim yah co ranz da he, roxnyinh meh neix hojlienz youh geizheih.
Gvaq yaep he, Siujcouh daeuj dienhvah hawj gou, naeuz de yaek gya veihsin gou ndaej mbouj ndaej, de naeuz doxmeh de co ranz gou youq, gvaqlaeng lauheiq miz maz saeh aeu caeuq gou lienzhaeh, gou naeuz ndaej.
Sam
Yah buen daeuj ranzco youq lo, gou baebae dauqdauq gvaq naj ranzco cungj aeu yawj da he, geij ngoenz gvaqbae cungj mbouj raen de hai dou gvaq. Gou gag naemj: Nanzdauh de cungj mbouj okrog gvaq ha.
Ngoenz ndeu, Siujcouh naeuz daxmeh de mbwq lai, yaek hawj de cang aen densi ndeu, heuh gou gvaqbae yawjyawj densi ndaej cang youq gyawz, de lau boux cang densi luenh ding haeuj ciengz bae, dwk vaih aen ranz gou.
Gou daeuj daengz bakdou ranz co, bakdou haep dwk, gou roq dou geij baez, mbouj nyi miz vunz daeuj hai dou, caj yaep he gou caiq roq dou, hix mbouj nyi ndaw rug miz sing. Gou dwk dienhvah hawj Siujcouh, naeuz hawj de. Siujcouh danq gaemz heiq ndeu, naeuz:“Miz seizgan le gou caiq caeuq mwngz lwnh gij goj daxmeh gou, lwnh mwngz nyi de baenzlawz mbouj gamj hai dou. Seizneix gou dwk dienhvah hawj de, heuh de hai dou hawj mwngz gonq.”
Yah daeuj hai dou lo, raen gou daeuj daengz, de riuriu, gou naeuz gou daeuj guh gijneix gijneix. De mbouj hoiz vah, dawz bonj bouh he okdaeuj, gwnz ceij sij naeuz: Gou dingq mbouj raen mwngz gangj maz? Mwngz raiz saw hawj gou yawj ba.”
Gou raiz: Mwngz song rwz mbouj raeh, ga’gvaz youh gvez, caencingq dwg boux ndangcanz ndeu, mwngz banh miz canzcizcwng lwi?
Mehmbwk naeuz:“Mbouj miz.”
Gou raiz: Seizneix cwngcwz ndei, boux rwznuk、boux dafangz、boux ga- gvez cij aeu bonj cwng dwg song gaep canzciz doxhwnj, cwngfuj bi he cungj hawj di ngaenzbouj he. Miz seizgan le, mwngz couh vaiq bae banhcwng ba!
Mekmbwk dingq le, bi gyaeuj laglag naeuz:“Gou mbouj banhcwng, gou mbouj banhcwng.”
Gou youh sijsaeq cim de da he, roxnyinh yah neix geizheih lailai, gou gag naemj: De itdingh fatseng gvaq maz saeh.
Seiq
Mehmbwk co ranz heuhguh Banh Gveivah, lij coz seiz noh hau loq gyaemqmaeq, aeu ndang ndaej ndang, aeu yiengh ndaej yiengh, gyoengq lwgmbauq bouxboux cungj daeuj ngaeuh de, bouxboux naemj aeu de guh yah. Doeklaeng de haq hawj daegcoz gwnz haw ndeu, couhdwg daxboh Siujcouh.
Seizde, lajmbanj gungzhoj, gwn- daenj mbouj miz, bouxmbanj miz rengz hix mbouj rox bae gyawz ra cienz. Dahsau lajmbanj ndaej haq hawj boux gwnz haw, vunzmbanj bouxboux dajbak haenh, cungj naeuz Banh Gveivah mingh ndei, bohmeh de miz fukheiq, gyoengq lwgmbauq lajmbanj cix ndaenq ndaej saihoz yaek dek, gyoengqde cungj nyinhnaeuz duzfungh ndaw roengq mbin okbae lo, hoeng bouxboux saej humz cix gaeu mbouj ndaej.
Aen ranz daeggvan Banh Gveivah youq gyang haw, miz aen laeuz 4 caengz buenq, caengz daihngeih doxhwnj dwg ranz youq, caengz daih- it hai diemq guh gaicawx, seng’eiq gig ndei, ranz de gwn mbouj you , daenj mbouj heiq, youq ndaej onj.
Ndaw diemq gai dangz、 bingj、 ien 、laeuj, gai haeux gai duh, lij gai gij doxgaiq ngoenz yungh. Banh Gveivah haq daengz ranz gvan le couh ngoenzngoenz youq ranz guh gaicawx, mbouj guh gvaq saek ngoenz hongnaek, de seng miz boux mbwk boux sai song lwg, couhdwg Siujcouh caeuq daeggo de.
Miz ngoenz ndeu banringz, Banh Gveivah youq ndaw diemq dajleix seng’eiq, miz boux vunz he gipgip muengzmuengz buet haeuj ndaw diemq daeuj, naeuz:“Daeglwg mwngz deng dienh dai lo, mwngz vaiq bae yawj ba.”
Banh Gveivah dingq daengz neix, lumj banngoenz deng byaj bag dingjgyaeuj nei, song da baez laep, song ga baez unq, laemx youq ndaw diemq.
Daeglwg Banh Gveivah ndaej 12 bi, ngoenzde bae henz dah guhcaemz, miz vunz youq ndaw dah aeu dienh dienh bya, mbouj rox baenzlawz yiengh couh oksaeh lo. Banh Gveivah ndiu gvaqdaeuj le couh daej, daej le youh ngunh gvaqbae……
Haj
Banh Gveivah baez laemx neix, bouxvunz de couh caiq hix mbouj cingsaenz lumj gaeuq, lij nanz mbouj nanz couh laemx baez ndeu. Baez nanz diuz ga’gvaz de gvez lo, byaij roen mbouj baenz yamq lo.
（caengz sat）
编辑：韦亦玮
广西民族报社版权所有 未经书面授权禁止复制或建立镜像，广西民族报网—广西民族报原创文章，欢迎转载，转载请注明出处。
地址：广西南宁市桂春路16号 邮政编码：530021 联系电话：0771-5528076 5559552 传真：0771-5622291 电子邮箱：gxmzbzb@163.com
桂ICP备13003124号-2
桂公网安备45010002450838号
中国互联网违法和不良信息举报中心 广西互联网违法和不良信息举报中心 广西互联网辟谣平台
广西民族报社违法和不良信息举报电话：0771-5622291 举报邮箱：gxmzbsbgs@163.com