Makgam Henj Baenz Gim(2) - 广西民族报网

Makgam Henj Baenz Gim(2)

来源：广西民族报

作者：Yinj Fuzgen / 尹福建

发布时间：2020-08-14

　　Daihcaeux, Daegnamz ngamq byaij daengz henz reih, couh yawjraen geij boux mehyah riengzlaeng Simj- seiq hix daeuj daengz lo. Daegnamz riunyumnyum dongx de:“Simjseiq, sou daeuj ndaej caeux ho. Yiet yaep he, caj vunzlai daeuj menh guhhong.” Simjseiq naeuz:“Gaej caj lo, sien daeuj sien guh, caj vunz caez cij guh, nguh bae haujlai hong lo.” Naeuz sat, doq daiqdaeuz haeuj reih bae vat gumz. Aiq gvaq 20 faen cung, cij raen Ausam gwed gvak byaijyedyed daeuj daengz. De caeuq Daegnamz naeuz:“Cienzhong noix lo. Seizneix, lajmbanj banghong cungj mbouj noix gvaq bak maenz.” Daegnamz roxnyinh miz di veiznanz, mbouj rox baenzlawz han de. Simjseiq sepsaengsaeng naeuz:“Vunz hawj baenzlai cienzhong, mbouj raen mwngz bae guh.” Ausam bakgeng naeuz:“Mwngz rox gou mbouj bae guh ha?” “Mboujdan gou rox, vunzmbanj bouxboux rox, youq laj goreiz hung dwkbej, ngoenz lawz noix mwngz? Ausam, gaej ma dai cij gangjgyaq lo. Seizneix, 80 maenz cienzhong cungj hoj ra miz.” Gyoengq beixnuengx de ngamq yaek yamq haeuj reih bae, doq deng de fok doxdauq:“Sou gaej guh.” Youh coh Simjseiq enj hoz naeuz:“Noix gvaq bak maenz, sou guh, gou mbouj guh.” Daegnamz mbouj miz banhfap, cij ndaej couh’eiq de gya daengz bak maenz.

　　Haeuj caet nyied, ndaw naz, gwnz bo, mbouj dwg gohaeux henjrwdrwd, couhdwg gofaex heuswdswd, suen- mak Daegnamz dauq dwg reuqred duixdwd, lumj vunzbingh fatndat nei miz heiq fouz rengz. Daegnamz hix caz mbouj ok maz yienzaen. De sim goenj baenz feiz.

　　“Gou naeuz maz, Daegnamz baenzlawz rox ndaem mak, vaih gij reih gou.” Ausam yuekyon vunzmbanj bae ra Daegnamz. “Heuh de doiq reih. Mienx ndaej daengx bi maz cungj ndaem mbouj miz.” Ausam baez guhdaeuz, haujlai vunz riengzlaeng hemqyatyat:“Deng, doiq reih ma raeuz gag guh.” “Seizbienh ndaem di lwgsawz, ndei gvaq reih fwz.” Daeg- namz hozraez nai naeuz:“Gomak ngamq ndaem, caengz maj ndaej baenz vaiq, gvaq mboengq de couh did hoengh lo.” Ausam laekgaek naeuz:“Reuqredred caez, baenzlawz did ndaej dem,” doq naeuz doq yungh fwngz ciemzcag geij go,“Mwngz yawj, lienz rag cungj naeuh liux, gwn haex ha.” Daegnamz sim’in hemq:“Ausam, gaej ciemz ha! Vaih gomiuz bw.”

　　Ausam mbouj dingq, youh riengjretret ciemzcag geij go. Daeg- namz doq fatheiq, lumj duz vaizdaeg nei roemx gvaqbae, song fwngz nyoengxnyag Ausam. Ausam gyajcang laemxninz roengzbae, gotdawz fajgen gongzuu:“Aeyo, fwngz raek lo, haux- seng hoenx bouxlaux, gouqmingh ha!” Simjseiq buet gvaqdaeuj ragreg de hwnjdaeuj, ndaq naeuz:“Namh mboengmbupmbup, raek gij haex mwngz. Mwngz gaej cang lo, najna lai.” Ausam yaeploekloek yawj seiqhenz, raen caezgya cungj goemq bak riundumndum, roxnyinh saetnaj lo, doq menhmenh fonj ndang ndwn hwnjdaeuj, doq bongxbongx buhvaq, bak damzbyoedbyoed deuz lo.

　　Yienghneix daemdaem dengdeng daengz bi daihngeih, yawj gij makgam did ndaej heusausau, nga noengq mbaw hoengh, Daegnamz simhai lumj fwjhau gwnz mbwn biufofo. Banringz, Daegnamz cingq youq ndaw suenmak ciemz rum ndai reih. Ndit haenq baenz feiz, mbwn oemmobmob, de gaenq hanh dumz daengx ndang. De aeu sujbaq uet baez naj he, enj hwet ngiengxyawj baihdoeng, caenh raen ndaek ngauq fwjndaem ndeu cingq goenjfoedfoed biu gvaqdaeuj. “Mbouj baenz, yaek doek fwn hung lo.”

　　De sikhaek hemq caezgya vaiq buet maranz ndoj fwn. Ngamq yamq haeuj bakdou, fwn couh lumj aeu biuz boeg raemx nei doekrara, ciepdaeuj youh dingqnyi sing fwn yiengjsasa. Daegnamz yawj gyanghongh, ya, doek lwgbag lo, aen’aen hung lumj gyaeq- gaeq sinxbyabya, go’byaek go’nywj gokciengz deng dwk ndaej sangx liux. “Luix lo.” Daegnamz gag mboen coenz he. Fwn caengz dingz dingh, de couh buet daengz suenmak. Daegnamz ngaezngwd lo. Dangqnaj, gomak cungj mbiengjmbiengj mbeujmbeuj caez. Nye gaenq raek, mbaw gaenq loenq, mbouj miz saek go baenz yiengh lo. Daegnamz song fwngz got gyaeuj, maeuq youq henz reih, gag daej- ngoegngoeg.

　　Daj ndaw reih dauqma, Daeg- namz raen bang vunz he cingq humx youq ndaw gyanghongh, couh cam miz maz saeh. Gyoengqvunz ngiengx- gyaeuj ngonz de, cungj mbouj ok- sing. Yaep he, lij dwg Ausam gangj vah:“Ngoenzneix raeuz daeuj neix, cam mwngz, baenzlawz faenhoengz?” Daegnamz han:“Daengz seiz sou mak, lij miz bi dem. Daengz baezde, itdingh faenhoengz hawj caezgya.” Ausam youh naeuz:“Gomak cungj deng lwgbag dwk sangx liux, bae lawz sou mak, cienz faenhoengz daj gyawz daeuj?” Daegnamz mboengj aek naeuz:“Daengz baezde, gou gai ranz gai rek cungj hawj sou faenhoengz.” Ausam mbouj saenq, nyengh heuh Daegnamz sij sawcih guh baengzgawq.

　　Simjseiq yawj mbouj gvaq da, hat swenj:“Sou baenzlawz yienghneix guh vunz, baezdaeuz naeuz ndaem mak ndaej faenhoengz, bouxboux angq lumj gaeqboux fah meh. Seizneix bungq saekdi gumzgemx, couh hemq dai hemq lix. Mak caengz ndaej sou, baenzlawz faenhoengz hawj sou.” Ausam na laepngaungau naeuz:“Gou mbouj leix baenzlai, naeuz gvaq couh yaek suenqsoq.” Daegnamz coh vunzlai gungj hwet baiq baez he, hozraez naeuz:“Gak boux daxlungz daxbaj, daxau daxsimj, gouzgouz caezgya, caiq nyiuz gou siengj banhfap. Gou gangj vah suenq vah, itdingh hawj daihgya faenhoengz.” Simjseiq vadfwngz hat naeuz:“Baema lo. Dou saenq Daegnamz baez he.”

　　Daegnamz yawjngoengngoeng suenmak siksangx baenz yienghneix, aek in yaek dek. Daj ndaw reih byaij okma, de mbouj rox mbouj nyinh byaij daengz gwnz dat. “Vihmaz?” De coh gwnz mbwn hemqswenj. 60 lai fanh maenz cienzcaiq, lij yaek faenhoengz hawj caezgya, gij saehnyap neix lumj rumzgeujgaeq coh de bongj daeuj fafa. “Gou baenzlawz miznaj najdoiq vunzmbanj, najdoiq bohmeh, najdoiq yahlwg.” Daegnamz ngeix dwk, baez laepda, yaek coh laj dat hoemj ndang roengzbae…… “Daegnamz, mwngz yaek guh maz!” Sawqmwh, baihlaeng cienz daeuj gij sing Dahfangh. Daeg- namz vaiqdi sou din doxdauq, Dahfangh baegfofo buet daengz henz ndang, ragdawz de:“Mwngz, mwngz gaej guh gij saehngawz neix, raeuz maranz naemj banhfap.” Dauqma gwnz loh, Dahfangh bak mboen- saexsaex:“Mbwn mbouj cied vunz, roen mbouj daemdaenx. Raeuz lij miz loh byaij.” Daegnamz cimyawj meh- yah, raemxda riengxronron, gotumj Dahfangh daejngoegngoeg. Yaep he, de uet seuq raemxda, naeuz:“Baenz, raeuz daj gyaeuj dauq guh.”

　　Daegnamz gvanbaz hwnj dennauj caz swhliu, daj denva ra ciengya. Gomak yienznaeuz deng lwgbag ndaej nye raek mbaw loenq, hoeng goenqrag lij lix, ndaej ciengya baez son, Daegnamz dauq youq seiqhenz gomak vat gumz dwk bwnh, gaj non rwed raemx. Mbouj geijlai nanz, gomak youh hoenghfwdfwd lo.

　　“Sou mak lo!” Gij sing Simjseiq goksasa rwenz youq ndaw suenmak. Gyoengqvunz cingq nyaengqnyinyi mbaet mak coux loz. Da raen gai mak couh ndaej faenhoengz lo, bouxboux naj haiyabyab, haenq cuk rengzloet. Daegnamz muenghyawj suenmak, makgam henj baenz gim, gogo nuengqroemroem, lumj gwn laeuj ndat nei, daengx ndang lwed goenjcancan. 3 bi lo, ginggvaq geijlai rumzfwn, co reih、 ndaem maklwg、go reuq dauq did、lwgbag dubdaenz…… Ngoenzneix, makgam cungjsuenq fungsou lo.

　　Makgam sou roengz go lo, doi youq ndaw reih baenz bo baenz bo, henjrwgrwg lumj aen byagim iq. Hoeng, 3 ngoenz lo, caengz raen boux lauxbanj lawz daeuj sou mak. Daegnamz simyou lumj feizremj. Goeng lauxbanj haenx dwg Daegnamz song ndwen gonq couh lienzhaeh ndei lo, duenq ndei song sam ngoenz neix daeuj yinh mak okbae, mbouj rox vihmaz mbouj raen vunz daeuj, caemhcaiq lienz denva cungj mbouj miz daeuj. Daegnamz dwk denva gvaqbae hix mbouj miz vunz ciep. Ngoenz daihngeih Daegnamz doq dap cihek bae ndaw singz ra daengz boux lauxbanj haenx. Yienzlaiz boux laux- banj neix mbouj miz baenzlai cienz ngaenz bae sou mak. Lauxbanj seiz- neix hix simgip baenz moed raih rek ndat, cingq bae gizwnq coi aeu gij cienz bouxwnq yiemq de. Daegnamz song fwngz hoengqvatvat dauqma ranz. “Guh cigboq baenz mbouj?” Mehyah doq yawj soujgih doq cam. “Baenz ha!” Daegnamz lumj ndoet cenj laeuj get he, angqhemq yatyat:“Sikhaek bae ra dahsau cigboq ndeu daeuj.”

　　Vangjloz caen dwg saenzgeiz lo. Cigboq ngoenz daih’it, couh miz vunz dingh cawx. Gvaq geij ngoenz, hix miz aen cauhsi hung ndeu baij vunz daeuj ra Daegnamz dingh gaicawx hab- doengz. Gij mak neix noh diemz naeng lwenq, aen’aen yinzyiengh, hawj vunz hozngah, bouxboux canj cawx. Mbouj daengz geijlai nanz, makgam couh gai gat lo. Daegnamz cij ndaej hainaj riunyumnyum caeuq bouxhek naeuz:“Caen doiq mbouj hwnj lo, gai liux lo, bimoq itdingh ndaem lai di.”

　　Seiz faenhoengz, raen gyoengq beixnuengx riu ndaej ajbak mbouj hab, Daegnamz ndaw hoz hix lumj gwn dangzrwi nei diemzsubsub. De naemj, aeu lai raen yauqik, itdingh yaek lai ndaem geij bak moux mak cij ndaej.

　　Gyanghwnz, de loqraen baenz benq baenz rangh makgam, rim ndoi rim doengh, rangfwdfwd, henjrwgrwg, lumj hoij rim ndaek ngauq ndaek ngauq gim, youq laj nditndat rongh- gywggywg.

　　（sat）

编辑：韦亦玮