Mboengqneix, bi 2025 swnghdai vwnzmingz lundanz youq Baekging guh, ndawde hawj baiz aen gih guhyiengh hwnqguh swnghdai vwnz- mingz caeuq aen gihdi cauhmoq saedguh “raemx saw bya heu couhdwg byagim bya’ngaenz” daengx guek ngamq ndaej de, Gvangjsih 6 dieg miznaj hwnj buengj, ndawde Liujcouh Si Cwngzcungh Gih、 Bwzhaij Si Haijcwngz Gih、Hozciz Si Dava Yauzcuz Swciyen ndaej ancoh aen gih guhyiengh hwnqguh swnghdai vwnzmingz, Nanzningz Si Sanglinz Yen、Gveilinz Si Yangzsoz Yen、Bwzhaij Si Veizcouhdauj Lijyouzgih ndaej aen cwngheuh gihdi cauhmoq saedguh “raemx saw bya heu couhdwg byagim bya- ngaenz”.

Cauhlaeb guhyiengh swnghdai vwnzmingz dwg gaiq youqgaenj saedhengz aen swhsiengj swnghdai vwnzmingz Siz Ginbingz, hix dwg gij hong gvanhgen doihaeuj hwnqguh aen Cungguek gyaeundei. Daj bi 2017 Swnghdai Vanzgingbu hainduj mizgven hong cauhlaeb doxdaeuj, Gvangjsih itloh youq gwnz roen hwngfat saekheu onjyamq baenaj. Miz Swcigih Dangjveij、Cwngfuj dawz cinj, daengx gih swnghdai vanzging hidungj laebmaenh aen leixniemh “song bya”, doinyoengx ginghci sevei hwngfat cienzmienh saekheu cienjhingz, cauhlaeb guhyiengh swnghdai cingzcik yienhda. Daengz seizneix, Gvangjsih gaenq miz 22 aen gih guhyiengh hwnqguh swnghdai vwnzmingz gaep guekgya、9 aen gihdi cauhmoq saedguh “raemx saw bya heu couhdwg byagim bya’ngaenz”, buek hwngfat saekheu baenaj okhingz ndeu laebdaeb yienh okdaeuj, hawj aen ciubaiz gim Gvangjsih “bya heu raemx saw swnghdai gyaeu” ngoenz rongh gvaq ngoenz, dwk rengz hung’ak hawj aen Gvangjsih gyaeundei hwnqguh vunz caeuq swhyienz huzndei caemhyouq.

Linghvaih, lundanz yienhciengz naeuz bi 2026 swnghdai vwnzmingz lundanz yaek youq Gvangjsih Gveilinz Si guh. Neix yaek dap aen bingzdaiz langhbaij engq sang、guenq haeuj rengzhoengh hwngfat moq hawj Gvangjsih hwnqguh swnghdai vwnzmingz.

(Yiz Fungh Du Yangz Veiz Sangangh)