12 nyied 26 hauh, Aen Langhbaij Cwngzgoj Maenhndei Yinzgungh Cinwngz Gvangjsih Nem Hoih Doxgyau Bi 2025 youq Nanzningz hai, haeujlaeg doekguh gij cingsaenz Seiqcungh Cienzhoih Gaiq Ngeihcib Dangj, nyinhcaen doekguh gij lwnh- gangj youqgaenj mizgven yinzgungh cinwngz caeuq mizgven lwnhgangj hong Gvangjsih Siz Ginbingz cungj- suhgi, cungjgez doxgyau diuzroen saedguh caeuq vunqsik cauhmoq yinzgungh cinwngz hawjrengz hangznieb hwngfat, yenzgiu anbaiz hong yamqlaeng. Swcigih Dangjveij suhgi、Swcigih Yinzda Cangzveijvei cujyin Cinz Gangh camgya hai hoih caemhcaiq gangjvah. Swcigih cujsiz Veiz Dauh cujciz aenhoih.

Cinz Gangh haengjdingh gij cingzcik gih raeuz yinzgungh cinwngz hwngfat aeundaej de. De naeuz, bineix gyaeujbi, Gvangjsih dwen ok “seizdaih yinzgungh cinwngz, Gvangjsih mbouj ndaej giepnoix、mbouj ndaej doeklaeng”, dawzmaenh miz mbangj guh、 miz mbangj mbouj guh, youq daengx guek gak swngj（gih、si） daiqdaeuz daengj hwnj fangeiz hung caeuq Dunghmungz doxgap guh yinzgungh cinwngz, yungh ndei gijndei onjyamq bae guh, dox boiqhab cauhlaeb diuzroen hwngfat “Bwz Sang Gvangj yenzfaz+Gvangjsih comzbaenz+Dunghmungz wngqyungh”, guhbaenz Gaiq Daih 22 Dunghbozvei、Funghvei aen cawjdaez dwg yinzgungh cinwngz, lai doinyoengx yinzgungh cinwngz hawjrengz cien hangz bak nieb, aeundaej cingzcik lailanglang.

Cinz Gangh daegbied gangj daengz, daengx gih gak gaep lingjdauj ganbu aeu ndwn engq sang caeuq yawj engq gyae, gamj guh gonq, aeu aen cingsaenz “fanh bi nanz lai、dan ceng haethaemh” bae guh ndei gak loh hong baugvat yinzgungh cinwngz, hingz ndaej aen seizgei hwngfat coglaeng. Aeu laeb aen cwngci’gvanh cinjdeng, dawzmaenh saedsaeh gouz dwg、gouzcaen guhsaed, giengiet gimq youq aen gvaengx yinzgungh cinwngz sajbaizciengz guen、cang guh yiengh ndwi. Aeu gyaak ndang rengz, gyaak hag dungxcaiz aen gvaengx yinzgungh cinwngz, gyaak lohnaemj daejsienq, aeu ancienz baujcang ronzgvaq goekbyai yinzgungh cinwngz hwngfat bae, baengh yinzgungh cinwngz guhlaeg caeuq Dunghmungz doxgap, haenqrengz haicauh aen buenz moq gih raeuz yinzgungh cinwngz hwngfat.

Veiz Dauh daegbied gangj daengz, daengx gih gak gaep gak bouhmonz aeu ciuq Swcigih Dangjveij guhhong iugouz, gyavaiq hwnqguh Cungguek—Dunghmungz Guekgya Yinzgungh Cinwngz Wngqyungh Doxgap Cunghsinh, baijbouh hwnqguh yinzgungh cinwngz giekdaej sezsih, haeujlaeg guh aen hengzdoengh “yinzgungh cinwngz”, gyavaiq gungganq engqlai yezdai moq vunqsik moq ciengzgingj moq. Aeu ca ndei hwnqguh baijbouh sonliz vangjloz, gyavaiq haifat yungh gunghgung soqgawq swhyenz, guhcaez soqgawq ancienz ceihleix, cukmaenh sonliz soqgawq “songdaejnaengh”. Aeu dawzmaenh baengh yungh daeuj yinx, hopheux heiqci、gihgai、guh dangz、gimsug mizsaek caeuq najcoh Dunghmungz hailangh doxgap doenghgij dieg neix, gyalai vatcimh、fukcauh doigvangq dieg yungh, doinyoengx AI caeuq canjnieb doxyungz laegdaeuq. Aeu yungh ndei gij ngaenzgoek canjnieb yinzgungh cinwngz, gyalai yinx daeuj caeuq gungganq aen giyez ngamq cauh、aen giyez lienhcawj caeuq vunzcaiz lingxdaeuz, guhcaez aen gihci hamj bouhmonz、hamj gizdieg dox boiqhab, comz gij rengz doxgap baenaj, hawj canjnieb hwngfat miz dungxcaiz haeujcoengh caeuq dinfwngz dingjcengj.

(daj 《Gvangjsih Yizbau》 aeu daeuj genj hoiz Loz Canghlieng Cinz Yizcwz Cungh Siujgij)