12 nyied 18 hauh, Swcigih Dangjveij suhgi、Swcigih Yinzda Cangzveijvei cujyin Cinz Gangh haeujlaeg Laizbinh Si Hozsanh Si、Yinhcwngz Yen, diuyenz gizdieg ginghci hwngfat、suijli gunghcwngz hwnqguh、guhhoengh lajmbanj、dangjgen dazyinx gihcwngz ceihleix doenghgij dieg neix.

Cinz Gangh daeuj daengz Hozsanh Guekgya Gvangsanh Gungh- yenz Bozvuzgvanj, nyinhcaen dingq lwnh Hozsanh Si swhyenzhingz hawsingz cienjhingz hwngfat caeuq canjnieb swnggaep、gvangcanj swh- yenz cingjhab、gaijndei ndwenngoenz bouxminz、swnghdai coihfuk doenghgij hong neix guh ndaej baenzlawz yiengh, yawjngonz huqcaen langhbaij、lizsij yingjsieng caeuq soqcihvaq langhbaij, ciengzsaeq roxyiuj Hozsanh meizgvang hwngfat ginglig, haengj- dingh lailai gij cingzcik Hozsanh Si swhyenzhingz hawsingz cienjhingz hwngfat caeuq canjnieb swnggaep aeundaej haenx.

Gveicungh ceih rengx gungh- cwngz dwg aen suijli gunghcwngz hungnaek mbaet raemx gung raemx Gozvuyen 172 aen ndawde aen ndeu, hix dwg daengx guek 9 dieg dwkraemx lai Suijlibu dinghlaeb ndawde dieg ndeu. Youq diuzmieng faen namzbaek Gveicungh ceih rengx, Cinz Gangh nyinhcaen dingq gaisau dwkraemx cungjdaej gviveh hwnqguh caeuq yungh ndaej baenzlawz yiengh, daengz dieg cazyawj gunghcwngz seizdoeng guhlawz guenjhoh, iugouz suenq ndei gij soqmoeg ginghci、gij soqmoeg swnghdai、gij soqmoeg ndwenngoenz bouxminz, lai hwnqguh ndei、henhoh ndei、guenjguh ndei、yungh ndei aen suijli gunghcwngz hungnaek neix, lai gohyoz gamcaek caeuq guenjleix aen gunghcwngz, lai yungh ndei aen gunghcwngz, hawj dieg dwkraemx vunzlai lai ndaej ndei.

Yinhcwngz Yen Hungzdu Cin Luznaz Cunh doihengz aen vunqsik guhhong “gwnz muengx guh baenz gek、gwnz biengz guh baenz gek”, doihaeuj gyamaenh gij guhbaenz gunghoj duetgungz aeundaej haenx caeuq guhhoengh lajmbanj doxciep ndeindumq. Youq aen cunh neix dangjginz fuzvu cunghsinh caeuq Yez Gvei bangfuz banghwnq hanghmoeg, Cinz Gangh nyinhcaen dingq lwnh hong, siengzsaeq roxyiuj gihcwngz dangjgen、lajmbanj guenjleix、canjnieb hwngfat、coi bouxguhnaz laisou doenghgij neix, gienqmienx boux suhgi daih’it capmbanj aeu insik seizgei, dangrap caen guh, youq lajmbanj aen dieg gvangqlangh neix raiz ciuhvunz gyaeundei. Cinz Gangh daegbied gangj daengz, aeu dawz- maenh dangjgen dazyinx, caensaed ca ndei ciengzseiz fuengz dauq gungz ngaiz gungz gak loh hong, haenqrengz guh aen canjnieb ndaem gosangh ciengx nonsei daengj, baengh Dahraemxhoengz doenghgij dieg ndei neix gaenx guh baeyouz lajmbanj, laebdaeb gyamaenh gij guhbaenz gunghoj duetgungz aeundaej haenx, doihaeuj guhhoengh lajmbanj liuxliux, daezswng gihcwngz ceihleix yauq- naengz, gyavaiq hwnqguh aen lajmbanj habyouq habhong gyaeundei, lai hawj vunzlai roxnyinh ndaej daengz、roxnyinh vuenyungz.

Cinz Gangh daegbied gangj daengz, Laizbinh Si aeu haeujlaeg doekguh gij cingsaenz Ngeihcib Gaiq Seiqcungh Cienzhoih Dangj caeuq Aen Hoih Hong Ginghci Cunghyangh, doekguh gij iugouz youqgaenj mizgven lwnhgangj hong Gvangjsih Siz Ginbingz cungjsuhgi, ciuq Aen Cienzhoih Baez Cib’it Gaiq Cibngeih Swcigih anbaiz, dawzmaenh caen guh guhdaeuz, cauhmoq guh hoen, aeu cingzcik gangj vah、hawj bouxminz bingz, laeb aen cwngci’gvanh cinj- deng, dawzmaenh miz mbangj guh、miz mbangj mbouj guh, ciuq aen lohnaemj “ciuq saed dingh geiq、doxcab hwngfat, canjnieb hwng yienh、fouq minz demsou, swnghdai cuk giek、singz mbanj doxyungz”, gyavaiq hwngfat guhhung gizdieg ginghci, haenqrengz hwngfat aen canjnieb miz gij ndei yienhda、ragdoengh nungzyez lajmbanj rengz ak、hawj vunz ndaej bae guhhong lai de, doinyoengx it ngeih sam canjnieb doxyungz hwngfat. Aeu gohyoz maeuzveh “cibhaj haj” hwngfat, dungjcouz ca ndei gak loh hong byaibi, gvansim vunzlai gungzhoj guhhong gvaq ngoenz, mbouj soeng saek di ca ndei hong ancienz guhhong, dawzdingh guhsat gaiq hong ginghci sevei daengx bi, roengz giek maenhdwd hawj “cibhaj haj” haidaeuz ndei.

(daj 《Gvangjsih Yizbau》 aeu daeuj genj hoiz Loz Canghlieng)