Hainduj, bohmeh dauq ranz youq, gou miz di mbouj gvenq, aenvih haujlai bi cungj mbouj mizmaz gyauhliuz, gou mbouj rox caeuq gyoengqde gangj gijmaz, gyoengqde hix mbouj rox yaek caeuq gou gangj gijmaz. Dou couh lumj gij ranznden najseng youq doxneb ndawsingz, cijmiz bungqraen seiz cij doxdongx, roxnaeuz mizseiz cij ngaekngaek gyaeuj. Miz haemh ndeu, gou cingq boemz youq gwnz daiz sij cozyez, daxboh yawjraen le byaij gvaq daeuj naeuz:“Yienghneix doiq lwgda mbouj ndei.” Heuh gou naengh soh caiq sij, gou ciuqbanh. Daxboh ndwn youq baihlaeng gou mbouj gangj vah, nanz nanz cij lizbae.

Daxboh dauq ranz gaenq geij ndwen lo, de buen seuq rug ranz gaeuq, siudoeg le aeu daeuj guh ranz ciengx nonsei, doengzseiz cawx buek gvaengh ndeu. Codaeuz, daxboh ciengx nonsei giet reh youh iq youh unq, cijndaej gai cunghdwngj gyaqcienz, ngamq gaeuq dauqbonj, doz mbouj ndaej maz cienz, gyoengq vunzmbanj ciengx nonsei haenx caemh dwg cungj cingzgvang neix, cijmiz geij boux ciengx gvaq nonsei haenx, gij reh gyoengqde youh hung youh hau, lumj gyaeqroeggumj nei. Miz vunz yienq naeuz:“Caeux rox dwg cingzgvang yienghneix mboujdaemx youq Gvangjdungh dajgoeng suenq lo, ceiqsiuj lij doz ndaej di cienz.” Hix miz vunz sim’onq naeuz:“Raeuz ngamq guh mbouj miz maz gingniemh, guh nanz le couh rox lo.” Cunhcihsuh yawjraen caezgya ciengx nonsei cungj mbouj baenz geijlai, couh lwnh baihgwnz. Gvaq mbouj geijlai nanz, ndaw yienh couh cingj geij boux conhgyah Gvangjsih Nungzyez Gohyoz Yen daeuj daj gyaeuj daengz rieng son vunzmbanj baenzlawz ciengx nonsei, raen dwg aenvih nonsei gwn lai geij ngoenz haenx mbawsangh dwk mbouj gaeuq, caemhcaiq youq nonsei hwnj gvaengh giet reh seiz mbouj gibseiz cingjleix ranz ciengx nonsei, yienghneix couh cauhbaenz gij yingzyangj nonsei mbouj gaeuq, ndigah gvex sei siuj, giet gij reh haenx couh mbang lai lo. Dingq le gij vah conhgyah, doeklaeng caezgya ciengx nonsei yied ciengx yied ndei, aen reh cungj dwg youh hau youh geng, gyoengq ciengx gvaq nonsei haenx caemh ciengx ndaej ndei gvaq ciengxgwq. Vunzmbanj gai ndaej cienz hix mbouj siuj lo, ndawsim caezgya angq dangqmaz, bouxboux cungj docih conhgyah daeuj son, docih cunhcihsuh caeuq cwngfuj bangcoh.

Nonsei gwn lai geij ngoenz haenx, aeu mbaet haujlai mbawsangh, daxboh daxmeh ciengzseiz daj gyanghaet mbaet daengz mbwn laep bae, danghnaeuz dwg ngoenzsinghgiz, daxboh hix heuh gou bae bang mbaet mbawsangh, gou ciuqbanh. Youq gwnz reihnaz caezcingj haenx, miz geij diuz mieng doeng gvaq ndawde, danghnaeuz yaek coq raemx naz couh hai congh hawj raemx lae haeujdaeuj, cajdaengz raemx gaeuq le caiq yungh namhgik caeuq naez bae fung congh. Gosangh youq ndaw reihnaz neix baiz swnj baiz, beij gou lij sang, mbawsangh youh heu youh hung. Daxboh lwnh gou naeuz:“Mbaet mbaw heuswd couh ndaej lo, mbaw gwnz dingj lij heuoiq sien mbouj mbaet, louz de laebdaeb majhung.” Dou moix boux dawz aen daehnaengngwz ndeu, baenz baiz baenz baiz bae mbaet mbawsangh, fwngz ndeu gaem gosangh lingh fwngz mbaet. Mbaet daengz daehnaengngwz ndaej daengj youq couh cuengq ndaw luengx, mbaet le mbawsangh sien rom ndaw fwngz, fwngz gaem mbouj roengz seiz caiq cuengq haeuj ndaw daehnaengngwz, yienghneix guh couh mbaet ndaej vaiq lai lo. Itbuen gou diemj cung ndeu cij mbaet ndaej daeh ndeu, daxboh buenq aen cung couh mbaet rim lo. Dou gak boux gag mbaet baiz ndeu, gosangh mwncupcup, yawj mbouj doxraen, cijnaengz dingqnyi sing “sasa”. Mizseiz daxboh cawjdoengh hai bak caeuq gou gangjvah, hoeng itbuen cungj dwg cam gou gij saeh hagsib, moixbaez gou cungj dwg coenz baj song coenz lujlaj gvaqbae. Miz baez ndeu daxboh cam gou siengj gauj aen hagdangz lawz, gou nyinhcaen siengj le yaep ndeu naeuz:“Gou siengj gauj Gvangjsih Dayoz.” Daxboh angq naeuz:“Ndei ha, Gvangjsih Dayoz ndei ha, geizlaeng mwngz couh doeg gausam lo, aeu engq roengzrengz cijndaej.” Gou naeuz:“Rox lo.” Daj haenx gvaqlaeng, moixbaez daxboh caeuq gou bae aeu mbawsangh seiz cungj gangj gienh saeh neix, de cungj naeuz miz maz swhliu yaek cawx couh cawx, aeu bae hwnj fujdaujbanh couh bae, siengj cawx gijmaz doxgaiq couh cawx, mbouj yungh you cienz. Gou dingq le gij vah daxboh, ndawsim raeujrubrub, roxnyinh bouxsai naeng ndaem dungx bongz baihnaj neix sawqmwh bienq ndaej mbouj baenzlai moq lo, mizseiz daxboh caeuq gou gangjvah, gou hix ndaej gangj geij coenz lo.

Gauhgauj sat le, gou swnhleih gauj hwnj Gvangjsih Dayoz, daxboh gig gikdoengh, dwk denva lwnh gyoengq caencik baengzyoux nyi, youh iu gyoengqde daeuj gwn laeujdaihhag gou. Baij laeujdaihhag ngoenzhaenx, gou baez daih’it raen daxboh gwn ndaej fizfaengfaeng, de dingjai youq gwnz mbonq, hoeng gokbak yiengq gwnz riunyumnyum.

Seizgan couhlumj raq rumz riengjret cix gvaq, gig vaiq, gou couh daj hagdangz bizyez okdaeuj guhhong lo, daxboh youq ndaw ranz ciengx nonsei hix miz cib lai bi lo. Bineix gozging cuengqgyaj dauqma, cingq bungzdaengz nonsei giet reh, gou caeuq daxboh youq rug ciengx nonsei doq gip reh doq gangjgoj, gangj saeh ndaw ranz, gangj saeh guhhong, gangj saeh gaxgonq, gangj saeh baihnaj. Daxboh naeuz:“Geij bi neix, haujlai vunz okrog guhhong haenx cungj dauqdaeuj ciengx nonsei lo, seizneix ciengx nonsei bienqbaenz aen ciubaiz mbanj raeuz lo.”

Gou cam:“Seizneix reh gaen ndaej geijlai cienz?”

Daxboh naeuz:“Reh gaen ceiqlai gai ndaej ngeihcib roek maenz, ceiqsiuj hix miz ngeihcib haj maenz. Seizneix gij dinfwngz ciengx nonsei gaenq cibfaen cingzsug lo, giet gij reh haenx cungj dwg hausaksak genggyaenggyaeng.”

Gou cam:“Bi ndaej ciengx geijlai baez?”

Daxboh naeuz:“Bi ndaej ciengx bet baez. Baez doz song sam cien maenz.”

Gou naeuz:“Ndaej baenzlai cienz ha, caen ndei a.”

Daxboh riuhoho naeuz:“Dwg ha, raeuz bungzdaengz seiz ndei lo!

（2 sat）