Sai:

Yaek daengz gouj nyied gouj,

Nuengx youq gyae hwnjban,

Seizlawz ndaej dauq ranz,

Raeuz doxhanh fwendoiq.

Mbwk:

Duenh nanz mbouj gaxfwen,

Baez dwen sim cix angq,

Danghnaeuz beix ndaejvangq,

Hwnj vangj(muengx) fwen geij coenz.

Sai:

Hwnj vangj fwen geij coenz,

Ngoenzneix beix ndaejvangq,

Miz vah gaiqmenh gangj,

Hwnj vangj fwen cij ndei.

Mbwk:

Nuengx naeuz mwngz coenz ndei,

Beix yaek aeu roxndeq,

Ngoenzneix ciet bouxgeq,

Aeu roxndeq cij baenz.

Sai:

Ndiep bouxgeq ndaw gya,

Gwnz laj bouxboux rox,

Ndiep bouxgeq gvaq loh,

Caemh aeu rox cij baenz.

Mbwk:

Geij cien bi gvaqdaeuj,

Guek raeuz gingq laux ndei,

Cienz daeujdaengz banseiz,

Cienz ndei gaej hawj duenh.

Sai:

Meh raek(bazlwg) raeuz baenz eng,

Seng raeuz caiq ciengx geq,

Raeuz yaek aeu roxndeq,

Ndiep meh raeuz cingq baenz.

Mbwk:

Meh seng raeuz okdaeuj,

Muengh raeuz hung baenz vunz,

You daenj caiq you gwn,

Gyanghwnz ninz mbouj ndaek.

Sai:

Bohmeh seng ndang raeuz,

Caiq aeu haeux daeuj bwnq,

Gaeq ngamq haen cix hwnq,

Vih gwndaenj roengzrengz.

Mbwk:

Daengx bouxmbwk bouxsai,

Wnggai ndiep bohmeh,

Langh miz saek gaiq nyeq(noh),

Hawj bohmeh gonqdaeuz.

Sai:

Goleux ngoenzneix sang,

Go’gvang ngoenzneix soh,

Bohmeh vih raeuz hoj,

Aeu rox hauq gyoengqde.

Mbwk:

Miz meh goq cix ndei,

Miz feiz byoq cix raeuj,

Ciuh gonq cienz roengzdaeuj,

Raeuz aeu geiq gaej lumz.