Daxboh gou gaxgonq dwg boux canghdajcawj ndeu. Mwh gou lij caengz rox byaij roen, de caeuq daxmeh song boux couh bae Gvangjdungh dajgoeng lo, daxboh youq aen bouqhaeux ndeu cauj byaek, daxmeh cix bae aen cangj ndeu guhhong.

Gij cingzgvang ranz gou neix, youq ndaw mbanj raen gvaiq mbouj gvaiq lo, bouxsai caeuq mehmbwk seng lwg le couh ce hawj daxgoeng daxbuz, gyoengqde cix ok rog bae dajgoeng cijndaej baujmaenh gij haicei ndaw ranz.

Seizhaenx ndaw mbanj lij caengz coih roen, dauqcawq cungj dwg gumzgumz gamxgamx, ci baez gvaq couh namhsa mbinyebyeb, daegbied dwg fwn doek seiz vunz couh engq naiqheiq, daengx diuz roen cungj bienq niunaengnaeng、nwknaunau lo, byaij roen seiz laj haiz nem boengz liux bae, raemxnaez sinzbya’bya uq buhvaq, gig nanz swiq seuq. Hoeng dou mbouj miz baenzlai buhvaq vuenh, gij ciuqfong gwnz buhvaq haenx gaiq ciep gaiq, cijmiz gvaq cieng seiz gyoengqvunz cijndaej bae haw cawx saek dauq buhvaq moq. Ndigah bouxcoz ndaw mbanj cungj nyienh okrog bae dajgoeng, daegbied dwg bae Gvangjdungh, gunghcangj Gvangjdungh lai souhaeuj hix sang.

Mwh gou lij iq couh riengz daxgoeng daxbuz caemh gwn caemh ninz, baenzbi mbouj ndaej raen bohmeh geij baez, mizseiz cingmingz daxboh ndaej dauq sauqmoh, roxnaeuz ndaw ranz miz saehgaenj cij dauq yaep ndeu, liux cix cijmiz gvaq cieng gyoengqde cij dauq geij ngoenz. Seizhaenx lij caengz miz cinwngz soujgih, ndaw ranz cijmiz aen denva ndeu, moix baez daxboz dwk denva daeuj, daxgoeng daxbuz cungj heuh gou gangj geij coenz, hainduj gou cij doiq denva heuh geij coenz “boh” “meh”, couh dingqnyi ndaw denva cienz singriu vuenyungz okdaeuj, hoeng nienzgeij gou yied daeuj yied hung le, gij singriu vuenyungz haenx hix yied daeuj yied siuj, daengz doeklaeng couh mbouj miz lo. Gou baenzbi hix mbouj raen bohmeh geij baez, doiq gou daeuj gangj, gyoengqde couhlumj vunzhek, gipgip muengzmuengz dauq, gipgip muengzmuengz bae, gij yaenqsiengq bohmeh yied daeuj yied myoxmyoet. Gou mbouj rox caeuq daxboh gangj gijmaz, daxboh hix mbouj rox caeuq gou gangj gijmaz, moix baez dwk denva dauq ranz cungj liz mbouj ndaej geij coenz haenx “gij cingzcik mwngz baenzlawz yiengh la” “baezneix gaujsi gauj le geijlai faen a” “youq ranz dingq daxgoeng daxbuz vah lwi” “ndaw ranz lij miz gijmaz yaek cawx lwi”…… Gou roxnyinh gig fanz, gij hoizvah gou hix yied daeuj yied siuj, daengz doeklaeng bienqbaenz geij coenz “w” “o” “rox lo”……

Bouxcoz mbanj gou cungj okrog bae dajgoeng lo, cij lw goenglaux buzlaux caeuq lwgnyez youq ranz dawz ranz, haujlai naz caeuq reih mbouj miz vunz bae dajndaem、dajleix, dauqcawq cungj dwg rum nya. Yienghneix haujlai bi lo, dwkdaengz “hwngfat lajmbanj” daezok cij miz gaijbienq.

Mwhhaenx gou cingq youq ndaw yienh doeg gauit, gwn youq cungj dwg youq ndaw hagdangz, dep daengz singgeiz haj cuengqhag le cijndaej dap cigunghgyauh daengz ndaw cin, caiq dap cisamloek daengz ndaw mbanj. Miz aen singgeiz haj ndeu youq gwnz roen dauq ndaw mbanj, gou yawjraen haujlai cidaehhuq rag suijniz、namhsa haeuj ndaw mbanj, bakmbanj lij miz song gyaq vahdujgih cingq vat namh, haujlai vunz bae yawj. Daxgoeng gou naengh youq ndaw bouqgaicawx bakmbanj haenx caj gou ma ranz gwn haeux, ngamq roengz ci gou couh cam daxgoeng mbanj raeuz guh gijmaz ne?

Daxgoeng naeuz, mbanj raeuz yaek coih roen, vahdujgih gaenq vat le song ngoenz lo.

Dingqnyi daxgoeng yienghneix gangj, ndawsim gou gig angq, hoeng gou lij miz di you, gou naeuz, yienghneix dwg mbouj dwg aeu ok haujlai cienz?

Daxgoeng naeuz, dwg a, dingqnyi naeuz yaek ok 100 fanh maenz bae guh diuz roen neix.

Gou siengj, yienznaeuz coih roen dwg gienh saehndei, hoeng yaek ok 100 fanh maenz bae guh, yienghneix bingzfaen daengz moix ranz moix hoh hix aeu haujlai cienz, ranz dou bae gizlawz ra baenzlai cienz okdaeuj. Daxgoeng yawj gou mbouj ok sing, najbyak nyaeuqnyat, lumjnaeuz rox gou you gijmaz nei, gejnaeuz, 100 fanh maenz neix cienzbouh cungj dwg cwngfuj ok cienz, raeuz faen cienz hix mbouj yungh ok.

“Faen cienz hix mbouj yungh ok, lij miz cungj saehndei yienghneix?” Gou naeuz, cwngfuj doiq raeuz caen ndei ha! Daxgoeng riunyumnyum ngaekngaek gyaeuj.

Ndwen ndeu gvaqbae, mbanj gou bienq ndaej moqsaksak, gij roensuijniz youh bingz youh seuq, caeuq ndaw singz ityiengh, byaij youq gwnz roen, caiq mbouj yungh yousim deng bo iq gaz daengz lo, hix mbouj yungh yousim fwn doek gauz uq buhvaq caeuq haiz lo, ndawsim gou angqyangz raixcaix.

Mboujdan yienghneix, lienz reihnaz hix miz gaijbienq lo. Yienh gou youq baihdoeng Dayauzsanh, baihdoengbaek Vuzcouh Si, doeng gyawj Cauhbingz Yen, sae lienz Ginhsiu Yauzcuz Swciyen, namz nem Bingznanz Yen、Dwngzyen, baek ciep Libuj Si, dwg gij dieg gannanz sinhoj Vuzcouh Si. Ndaw yienh mbouj miz gijmaz daegsaek canjnieb, hix mbouj miz maz gunghcangj, cijmiz haujlai naz caeuq reih mbouj miz vunz bae dajndaem. Ginggvaq yienh lingjdauj damqgouz, gietdingh roengzrengz yungh gij diegfwz neix bae hwngfat ciengx nonsei canjnieb, mbanj gou deng senj guh giz sawqdiemj ndeu.

Mwhhaenx, bouqhaeux daxboh guhhong haenx aenvih mbouj miz gijmaz vunzhek daeuj, ra mbouj ndaej cienz gven dou lo, aen gunghcangj daxmeh guhhong haenx hix aenvih yauqik mbouj daemx gaxgonq, yaek swzdoiq buenqlai yenzgungh, daxmeh couhdwg ndawde boux ndeu. Songde cingq naemj bae ra hong guh seiz, daxgoeng dwk denva bae naeuz seizneix cwngfuj miz cwngcwz, yaek youq mbanj dou guh aen gihdi ciengx nonsei ndeu, heuh gyoengqde dauqdaeuj guhhong. Couh yienghneix, daxboh daxmeh baenz le bouxciengxcanz daih’it dauq ndaw mbanj ciengx nonsei.

Ginggvaq cwngfuj gveihva, gij rum nya reihnaz haenx gig vaiq couh deng cingleix bae lo, yienzhaeuh fan namh、hwnj lumx、daeh bwnh、ndaem gosangh, dauqcawq cungj dwg heuswdswd. Mboujdan yienghneix, cwngfuj lij cingj conhgyah daeuj beizyin baenzlawz dajndaem baenzlawz ciengx nonsei, neix cienzbouh cungj mbouj aeu saek faen ngaenz.

（1）