Bi daengz gouj nyied gouj,

Ciet bouxgeq daeuj daengz,

Ciuhgonq naeuz ciuhlaeng,

Aeu gyaez daengz bouxgeq.

Seiz miz gwn miz daenj,

Cix naemj daengz bohmeh,

Donqdonq raeuz gwn nyeq(noh),

Mbouj raen gyoengqde daengz.

Seiz miz gwn miz daenj,

Naemj bohmeh aencingz,

De ciengx hung ciengx nding(iq),

Cingzngeih aeu geiqmaenh.

Daengz donq raeuz gwn nyeq,

Heuh bohmeh mbouj raen,

Gyoengqde dai haeuj yaem,

Muengh mbouj raen daeujcoh.

Bohmeh dai haeuj yaem,

Mboujcaiq raen baez naj,

Mboujndaej gangj coenz vah,

Lwg aeu maz boiz cingz.

Ndiep bohmeh raeuz lai,

Dai bakndangj hozheiq(hawq),

Siengj daengz gij yiengh neix,

Gig heiq yaek dai vunz.

Bohmeh ciengx lwg lai,

Lumj yaek dai sinhoj,

Donq mbouj gangj gwn noh,

Souh gwn doh hix nanz.

Bohmeh raeuz sinhoj,

Mbouj rox aeu maz boiz,

Seiz dai ndok baenz hoi,

Lwg boiz cingz mbouj hwnq.

Bohmeh raeuz sinhoj,

Lwg hix rox sim nden,

Mbouj rox aeu maz denz,

Youh simgenx daengx ciuh.

Bohmeh raeuz sinhoj,

Lwg yaek rox geiq aen,

Bohmeh ndang lij gaenj(cangq),

Raeuz aeu gaenx hauqswnh.