12 nyied 5 hauh 10 diemj 18 faen, aen ci baez D9668 haiok Camhdoeng Bingzsiengz, biugeiq Nanzningz daengz Bingzsiengz Gauhdez duenh Cungzcoj daengz Bingzsiengz hwnqbaenz doeng ci. Daengz seizneix, Nanzningz daengz Bingzsiengz Gauhdez daengx diuz haidoeng daehyinh, gauhdez cigsoh doeng daengz aen hawsingz goujan henzguek Cungguek Yeznanz.

Nanz Bingz Gauhdez duenh Cungz Bingz dwg aen hong hwnqguh guek ak roenloh ndaw aen gveihva “cibseiq haj” guekgya gyaak caeuq guek henzgyawj dox baedauq doxdoeng ndawde aen ndeu, hanghmoeg faen Nanzningz daengz Cungzcoj、Cungzcoj daengz Bingzsiengz song duenh guh, ndawde, duenh Nanzningz daengz Cungzcoj youq 2022 nienz 12 nyied haidoeng daehyinh gvaq. Bingz Nanz Gauhdez duenh Cungz Bingz baezneix haidoeng daehyinh hainduj dwg Camhnamz Cungzcoj, ginggvaq Cungzcoj Si, doeksat daengz Camhdoeng Bingzsiengz Bingzsiengz Si, roen raez 81 goengleix, dajveh haivaiq diemj cung 250 goengleix. Daengx diuz gungh laeb Cungzcoj Namz、Ningzmingz Doeng、Lungzcouh、Camhdoeng Bingzsiengz, ndawde Camhnamz Cungzcoj dwg aen camh miz gvaq, gizyawz dwg aen camh guh moq. Ciuq cam rox, Nanz Bingz Gauhdez duenh Cungz Bingz ngamq haidoeng daehyinh, ngoenznaengz hai ci dungcehcuj 4 doiq, ndaej doeng daengz Liujcouh、Gveilinz、Bwzhaij doenghgij dieg neix, Nanzningz daengz Bingzsiengz ceiq vaiq 75 faen cung ndaej daengz, vaiq gvaq ci bujdungh 178 faen cung; Nanzningz daengz Ningzmingz Doeng、Lungzcouh ceiq vaiq faenbied 65 faen cung、80 faen cung ndaej daengz.

Daengz seizneix, Gvangjsih gaenq miz 3 diuz dietloh doiqciep Dunghmungz. Nanz Bingz Gauhdez daengx diuz haidoeng daehyinh, doiq lai daezswng gij suijbingz Cungguek caeuq Dunghmungz guekgya dox baedauq doxdoeng, dajcauh diuz roen hung gozci lienzciep Dunghmungz、cauhguh aen dieg sang doxgap canjnieb najdoiq Dunghmungz、fugsaeh guekgya doiqrog hailangh caeuq gizdieg doxgap bangrengz lailai, bang fugsaeh hwnqguh aen minghyinh caezcaemh Cungguek—Dunghmungz engq gaenjmaed gunghawj dingjcengj rengzrwd.

(Sung Yauz Moz Yuzgez)