12 nyied 5 hauh, Swcigih Dangjveij suhgi、Swcigih Dangjveij Cienzmienh Haeujlaeg Gaijgwz Veijyenzvei cujyin、Swcigih Dangjveij Gohgi Veijyenzvei cujyin Cinz Gangh cujciz Aen Hoih Baez Daih Cibhaj Swcigih Dangjveij Cienzmienh Haeujlaeg Gaijgwz Veijyenzvei Nem Aen Hoih Baez Daihbet Swcigih Dangjveij Gohgi Veijyenzvei, cienmonz yenzgiu hong “haeujlaeg gohgi dijci gaijgwz, aeu gohgi cauhmoq dazyinx gij swnghcanjliz rengzmoq hwngfat”, daegbied gangj daengz aeu haeujlaeg doekguh gij cingsaenz Ngeihcib Gaiq Seiqcungh Cienzhoih Dangj, doekguh gij lwnhgangj youqgaenj gohgi cauhmoq caeuq gij iugouz youqgaenj lwnhgangj hong Gvangjsih Siz Ginbingz cungjsuhgi, ciuq Cibngeih Gaiq Baez Cib’it Cienzhoih Swcigih Dangjveij baijbouh, dawzmaenh saedguh dwg daeuz、cauhmoq guh hoenz，yungh cingzcik gangjvah、hawj bouxminz bingz, dawzmaenh miz mbangj guh、miz mbangj mbouj guh, haeujlaeg gyauyuz gohgi vunzcaiz caez gaijgwz, laebmaenh aen gihci dijci hop ndei gohgi、canjnieb、ginhyungz, doinyoengx gohgi cauhmoq caeuq canjnieb cauhmoq doxyungz laegdaeuq, ciuq saed dingh geiq hwngfat gij swnghcanjliz rengzmoq, gyavaiq hwnqguh aen Gvangjsih yienghmoq ndei, doinyoengx dieg minzcuz henzguek hwngfat ndei saed hamjok yamqdin moq.

Aen hoih daegbied gangj daengz, cauhmoq dwg seizdaih itdingh aeu, cauhmoq dwg aen canloz guekgya, cauhmoq dwg diuzroen Gvangjsih. Seizneix caeuq coglaeng aen seiz ndeu, doinyoengx Gvangjsih gohgi cauhmoq dazyinx gij swnghcanjliz rengzmoq hwngfat, aeu laebdin gij diuzgienh caeuq gijndei seizneix miz de, lai naemj guh baenz mbouj baenz, yienh’ok ca ndei banhfap、cingjhab、ciengzgingj, haenqrengz cienjvaq gohgi cauhmoq aen “bienqliengh youqgaenj” neix baenz gij“demliengh ceiq hung” hwngfat ndei saed. Cungdenj ca ndei “roek aen it”： Laebhwnj laebcaez aen gihci boiqhab caez doihaeuj gyauyuz gohgi vunzcaiz hwngfat Swcigih Dangjveij, buqcawz gij gazngaih dijci “lai dieg guenjleix、faensanq ok rengz”； bienguh mbaw dan dijhi cwngcwz moq gohgi cauhmoq yawjnaek swhyenz cingjhab、yungh ndei gijndei、dawzmaenh miz mbangj guh miz mbangj mbouj guh ndeu, ciuq aen yenzcwz “gaenj yungh dingh gonq、baenz aen doi aen”, hawj mbaw dan baenz gij roen doinyoengx Gvangjsih gohgi cauhmoq baenz yamq baenz yamq hwngfat baenaj; cauhlaeb aen dijci gohgi cauhmoq dingjcengj“Bwz Sang Gvangj yenzfat+Gvangjsih comzbaenz+Dunghmungz wngqyungh”、najdoiq Gvangjsih najdoiq Dunghmungz gak guek ndeu, haeujlaeg gohgi cauhmoq hailangh doxgap; cauhlaeb aen gihci buedcienz gohgi cauhmoq aeu caizcwng、ginhyungz、hawciengz guh dingjcengj caezcaemh ndeu, hopheux aen gvaengx youqgaenj Gvangjsih ginghci sevei hwngfat、cib aen canjnieb saeudingj yendaiva hangzcauhguh caeuq mizgven aen gvaengx it ngeih sam canjnieb gyalai buedcienz yenzfat、gyaak gij yienghsaeh yenzfat; cauhlaeb aen dijhi cwngcwz vunzcaiz haeujcoengh cienzmienh cauhmoq ndeu, bang gemjmbaeu mbaqrap bouxvunz gohgi、bang bouxvunz gohgi cauh aen seizgei ndaej hawciengz hoizbauq, laebhwnj guhcaez aen cidu sueng cingj bouxvunz gohyenz yaugi、yengi, guhbaenz gauhyau、yensoj、bingzdaiz、giyez vunzcaiz baedauq doengrat; cauh aen swnghdai hailangh cauhmoq miz rengz doxceng ndeu, gaenx cauh ndei gij vanzging hawciengz Gvangjsih, mwh caeuq Dunghmungz doxgap gyalai ciengzgingj haifat wngqyungh.

Aen hoih daegbied gangj daengz, aeu dawzmaenh coh “moq” byaij、baengh “ndei” ndaej hingz, comz rengz doekguh ca ndei hong cungdenj “roek aen it”, baenzroix doihaeuj hong gohgi cauhmoq、canjnieb cauhmoq caeuq vunzcaiz cauhmoq, cien fueng bak geiq cienjvaq gijndei gohgi cauhmoq baenz gij cingzcik caensaed swnghcanjliz rengzmoq hwngfat.

(daj 《Gvangjsih Yizbau》 aeu daeuj genj hoiz Cinz Yizcwz Loz Canghlieng)