Dinghdingh dwk naengh yawj va hai va loenq fwj gienj fwj sanq. Valeiz ndaw hongh mbinfoenfoen, lumj dwg gangj gij goj ndwenngoenz gvaqbae. Aen bakdou ndaejgeiq laeglemx dajhai: Fwn’iq lumj fan yiemhcaw nei mbinfoenfoen, ndaw rumz valeiz hom haeuj sim haeuj bwt bae, gij ndwenngoenz gaxgonq dauq mbouj bae haenx youq ndaw uk fouzyienh. Moix limq va cungj coux duenh saehgaeuq ndeu youq ndaw sim fubfeb.

Naedfwn menhmenh ndik roengz gwnz valeiz, limqva riengz rumz mbinfoux. Seiz iq, valeiz baenz nyup baenz nyup hai rim ndaw hongh, ronghndit saj youq gwnz limqva moqsien haenx, ndongqmyabmyab maez vunz dangqmaz. Yahdaiq byaij gvaqdaeuj vaiqvet, raen gou ngeizvaeg raixcaix, riunyumj gangj: “Neix dwg valeiz, de hausak seuqcingh, maqmuengh mwngz ndaej lumj valeiz nei seuqcingh、gyaeundei. Gou yaek rox mbouj rox, cix dawz gawq vah neix geiq ndawsim. Mizseiz, gou cam yahdaiq: “Vihmaz valeiz yienghneix hom ne?” Yahdaiq unqswnh yawj gou, saenzmaed dwk gangj: “Majhung le mwngz couh rox lo.” Aen vwndiz neix lumj naedfwn nei caeuq gij hom valeiz yungzhab itheij, iemq haeuj ndawsim iqoiq gou, ndaem roengz naed ceh seuqcingh ndeu, dinghdingh cajdeq maj hung.

Fwn lumj sei doekfoenfoen, doek youq gwnz limqva, yiengjsese, lumj yahdaiq youq henz rwz gangjsebseb, raeujrub sim gou.

Seizgan menhmenh gvaqbae, gou ciemhciemh majhung, lizhai ranz- mbanj bae doegsaw. Mwh valeiz haihoengh, gou dauqma ranzmbanj, ndaw hongh iq cienz daeuj sing go nyaeqyebyeb: “Aenmbwn laepngau daemqdedded, ndaundeiq ronghsag myabyebyeb, duznon mbin, duznon mbin, mwngz cingq naemjngeix byawz?” Neix cingq dwg diuzgo seiziq gou caeuq yahdaiq itheij ciengq haenx. Gou fwt roxnyinh gingheij lai, lienzmuengz buet haeuj hongh iq. Yahdaiq riunyumnyum, rag gou naengh roengzdaeuj, gangj gak cungj saeh mizyinx. Baeg le, gou couh ninz youq gwnz eij yahdaiq, ai dwk yahdaiq, goemq fan denz iq miz homvaleiz. Mizseiz, yahdaiq rox gaem gaiq sujbaq caengz siuq baenz de, lwgda cimdingh dwk baez cim baez mae nyib dwk, singnyaeq gangj: “Guh saeh aeu simsaeq, mbouj ndaej rubrab.” Lwgfwngz de riengjret baebae dauqdauq, moix cim moix sienq cungj coux rim gyaez. Gou cam yahdaiq siuq gijmaz, de riu naeuz: “Caj mwngz majhung di le couh rox lo.” Neix youh sawj gou muengh dangqmaz.

Ndwenngoenz gyaeundei cungj dwg dinjdetdet, yahdaiq youq mwh seizcin valeiz haihoengh lizhai dou lo, cij lw gaiq sujbaq haenx ciuqgaeuq buenx gou. Gwnz sujbaq siuq miz baenz duj baenz duj valeiz caeuq fwnsaeq doekfoenfoen, maecim deihdedded, lumjdwg gij gyaez mbouj diemyo haenx. Yahdaiq wnggai dwg vaq baenz valeiz luba! Mboujne vihmaz yienghneix hom. Gou hix roxyiuj gawq vah “ngoenzlaeng mwngz couh rox lo”. Hoeng danghnaeuz aeu caeuq vunzcaen doxbiek cij ndaej rox dapanq, gou ningznyienh daengx ciuh mbouj rox.

Fwnsaeq ndawbiengz dwg mwngz, valeiz homrang dwg mwngz, ndaw mok fwn ranzmbanj Gyanghnanz, dauqcawq cungj miz ngaeuz mwngz. Mwngz dwg fwnsaeq ndaw mingh gou, nyinhdumz aensim gou, louz roengz aen yaenqgeiq mingz heuh “gyaez”. Aenvih miz mwngz, couhcinj ndwenngoenz laedeuz, ndaejgeiq myoxmyad, gou hix lumz mbouj ndaej mwngz. Yahdaiq, mwngz rox lwi, gwnzbiengz lij miz boux vunz ndeu hwnzhwnz siengjniemh mwngz!

(Loz Vwnzcing raiz

Nungz Cinfung hoiz)