11 nyied 27 hauh, Swcigih Yinzda Cangzveijvei lwnh vunz rox, 《Gvangjsih Bouxcuengh Swcigih Cazloegbauj Hwngfat Diuzlaeh》（baihlaj heuhguh《Diuzlaeh》） ginggvaq Baez Hoih Daih Ngeihcib It Swcigih Gaiq Cibseiq Yinzda Cangzveijvei byaujgez doenggvaq, yaek youq bicog 1 nyied 1 hauh hainduj hengzguh.

Cazloegbauj dwg aen canjnieb caz miz gijndei daegsaek gih raeuz. Daengx gih seizneix miz suencaz habguh cazloegbauj daih’iek 100 fanh moux, cazloegbauj canjliengh ciemq daengx gih mbawcaz canjliengh 30% doxhwnj, gyonj dij cienz mauhgvaq 300 ik maenz. Hoeng canjnieb hwngfat hix miz giz yaez senjleh ceh ndei doigvangq mbouj doh、giekdaej sezsih noix、gyagoeng yo cang faensanq、rengz binjbaiz mbouj hung doenghgij neix. Doiq doenghgij vwndiz neix, diuzlaeh daj diuzlienh swnghcanj、diuzlienh siugai、diuzlienh gohgi、diuzlienh fugsaeh caeuq diuzlienh vwnzlij daengj haj aen fuengmienh roengz fap, gveihfan ndaem caz、mbawcaz gyagoeng、yo cang bienq geq、guenjhanh caetliengh、 binjbaiz hwnqguh、gohyenz cauhmoq、canjnieb hwngfat、vwnzva doigvangq daengj, dazyinx caeuq doinyoengx cazloegbauj hwngfat ndei saed.

Binjbaiz hwnqguh fuengmienh, doiq yiengh seizneix gih raeuz cazloegbauj giyez binjbaiz、canjbinj binjbaiz lai cix mbouj ak, diuzlaeh mingzbeg iugouz Swcigih Yinzminz Cwngfuj caeuq yinzminz cwngfuj dieg guh cazloegbauj wnggai gyaak hwnqguh caeuq baujhoh binjbaiz cazloegbauj, haeujcoengh doigvangq cazloegbauj gvendaengz gizdieg goengyungh binjbaiz、canjbinj deihleix biugeiq; haeujcoengh aen cawjdaej guenjguh swnghcanj cazloegbauj ganq giyez binjbaiz caeuq canjbinj binjbaiz, ciuqfap daenghgeiq sanghbyauh, bauq gaiqgwn saekloeg、nyinhcingq baenz huq ndei saekloeg daengj, lai hawj cazloegbauj mizmingz、miz rengz, lai dwkyiengj aen binjbaiz cazloegbauj Gvangjsih.

Bouxsiuhfei lai haeujrwz cazloegbauj ndei mbouj ndei、an mbouj ancienz. Vih hawj cazloegbauj Gvangjsih lai ndei, gyaak gamguenj daengx aen gyagoeng swnghcanj mbawcaz, diuzlaeh lij daj daengx aen senj ganq ceh caz daengz swnghcanj gyagoeng laebhwnq aen dijhi baujhoh caetliengh ancienz daengx diuzlienh “daj suencaz daengz cazboi”.

（daj 《Gvangjsih Yizbau》 aeu daeuj genj hoiz Sez Hungzyen）