Seizgan lumj aen yaemfouz lingzdoengh nei youq byai fwngz menhnyednyed, diuqyetyet, yaepyet couh lae gvaqbae lo；ndwenngoenz lumj raemxmboq sawrikrik nei, daengngoenz baez hwnj ronghndwen baez doekcongh couh caegcaeg gvaqbae lo. Mwhhaenx, ndaejgeiq daxmeh lumj duj vagut seizcou nei gig bingzciengz, ndwenngoenz gvaqbae, fwn doek rumz ci, cix yied daeuj yied rang lo, gij ngaeuz de gaenq gaek youq ndaw sim gou laeglinlin bae, bi gvaq bi, ngoenz gvaq ngoenz cungj mbouj rox lumz.

Youq mwh fat binghraq haenx, laeng gou ngamq guh ranzmoq baenz, gij ngaenzrom ndaw ranz hix mbouj lw geijlai lo. Daxboh caeuq daxmeh vut gij seng’eiq baihrog mbouj guh ma daengz mbanjranz hai aen dan sauhgauj ndeu. Haihag ngoenz daih’it daxmeh dawz dab ngaenz nyaeuqnyatnyat ndeu oet roengz ndaw daehsaw gou daeuj, sing iq naeuz:“Bae hagdangz aeu roengzsim doegsaw, gaej lauheiq naeuz mbouj miz ngaenz.” Gou yawjraen gij hohfwngz daxmeh cocat, fwngz dekvadvad. Gwnz fwngz de lij uq miz gij heiz danq sauhgauj haenx, youq mwhhaenx gou gamjsouh daengz gij ndiepgyaez daxmeh dwg gyanghwnz ngaizhwnz mbouj ninz, dwg gij cingsaenz youq ndaw gungznanh hix enjaek mbouj fug saw haenx.

Gyanghaemh laep le gwnzgai fwzrikrik, mbouj miz geijlai boux hek lo, daxmeh vanzlij faeuj youq henz aen dan sauhgauj, mbouj seiz ngiengx gyaeuj muenghyawj, muengh miz lai saek boux hek daeuj. Gou gienq de naeuz sou dan romh di, de cix ngauzngauz gyaeuj naeuz:“Caiq deqdeq, gangj mbouj dingh yaep dem lij miz vunz daeuj gwn sauhgauj.”Gyanghwnz laepnyamnyam, cehda de lumj aen ndaundeiq gwnzmbwn nei yaepmyebmyeb. Youq laj ronghdaeng monmeumeu haenx, aen ngaeuz ndang de daegbied mbang, hoeng youh dwg gig nyangq.

Geiqndaej miz baez ndeu, gou gyanghwnz ndiu gvaqdaeuj raen daxmeh lij youq ranzsaeuq nyaengq dwk bwh gij doxgaiq ngoenz daihngeih aeu bing haenx. De ngaem gyaeuj nyinhcaen roix gij noh aeu roix haenx, fwngz de riengjret unqnemnem. Gwnz daizheng gij ronghdaeng ciuq dwk gij ngaeuz de ingj hwnj gwnzciengz bae raezlenlen, lumjbaenz fuk doz ndeu nei. Gou ndwn youq bakdou raen bangxmbaq de miz di saenzdedded, conghhoz gou lumj deng gijmaz doxgaiq gaz nei hoj youq raixcaix. Youq mwhhaenx gou geijlai siengj cung gvaqbae, got dawz daxmeh naeuz de nyi:“Daxmeh ha, mwngz gaej guh dwgrengz sinhoj lai lo.” Hoeng gou rox de youh gyangq youh gaemh, gij neix cingq dwg gij rengz hawj de cengq aen gya neix.

Dinfwngz daxmeh gig ndei, gij sauhgauj de guh haenx cungj dwg rangfwdfwd yinx daeuj haujlai bouxhek. Hoeng de soqlaiz mbouj hawj gou bae coengh de guh hong gvaq, cungj dwg coi gou naeuz: “Mwngz bae hagsib, gij saeh neix mbouj yungh mwngz fanzsim.” Baez daengz gyanghwnz vunz ninzndaek caemrikrik le gou cungj dingqnyi de menhmenh yaemj din yaemj fwngz bae sou dan, lauheiq gij sing doengh haenx cauz gou ndiusingj. Gij yiengjdoengh saeqiq haenx lumj hot fwen unqswnh nei, buenx gou haeujninz. Gij ndiepgyaez de diem youq ndaw moix aen hengzdoengh saeqiq, hamz youq ndaw gij heiq moix roix noh saz homfwdfwd haenx.

Seizneix, saedceij ngoenz beij ngoenz ndei lo, ndaw ranz hainduj guh nungzgyahloz, hoeng daxmeh lijdwg ngoenznaengz bae faeuj aen dan sauhgauj iqet de. De naeuz gijneix dwg gij saeh miznaj de, dwg boux aen dan neix buenx de yungh fajfwngz swhgeij dingj aen gya neix hwnjdaeuj. Moix baez gou byaij gvaq henz aen dan sug haenx, cungj siengj daengz gij ngaeuz de youq gyanghwnz souj dan haenx, siengj daengz gij yienghceij daxmeh youq ndaw oenq sauhgauj nyaengqfoed haenx. Gij nyangqnyinz vih ndaw ranz okrengz, gij ndiepgyaez de gaenq gaek youq ndaw simdaeuz gou, hawj gou baenz ciuh vunz gamjdaengz raeujrub.

Gyaeujgai aen dan sauhgauj haenx vanzlij biu ok gij heiq homfwdfwd sugrox daeuj, gij haenx dwg gij feihdauh daxmeh, dwg feihdauh ndaw ranz, dwg gij heiq youq ndaw sim ndaw saej gou ceiq nanzlumz、ceiq gvaqniemh haenx. Daxmeh couh lumjnaeuz aen lohdaeng henz gai haenx, youq ndaw gyanghwnz laepyamq haenx mbouj ok sing rongh gou byaij bae naj. Mboujlwnh ngoenzcog aeu byaij geijlai roen gyae, hix mboujlwnh fwn doek roxnaeuz byajraez, youq ndaw sim gou aen ngaeuz daxmeh cungjdwg gij ingbaengh ceiq maenh haenx, hix dwg gij saek ceiq raeuj ndaw ciuhvunz gou, hawj gou ciengxlwenx roxnyinh miznaj, engq dwg gij rongh ciengxlwenx mbouj bienq ndaw sim gou.

（Couh Hijnoz raiz

Vangz Gijveiz hoiz）