“Caemh daeuj muengh ndwen vunz youq gyawz, gingjsaek mumjgyumq lumj bi’gvaq. ”Baez doeg daengz gawq sei neix, cungj roxnyinh seizgan lumj raemx, gij rongh ronghndwen baenz diuzsai, cix ciuq mbouj raen saeknaj baengzyoux gaeuq.

Bihaenx Bet Nyied Cibngux, ronghndwen daegbied luenz. Ndaw gyanghongh iq, gij limqva va’gveiq loenqfoedfoed, heiq rang sanq seiq cawq. Daxbuz ciuqlaeh guh le bingjmangx, diemz dwk fat nywnx, hoeng daxgoeng cungj dwg riunyumnyum gwn baenz aen bingj liux. Seizhaenx gou mbouj rox, vih gijmaz daxgoeng cungj gangj “diemz cij ndei”, cig daengz doeklaeng cij rox, ndaw diemz haenx duk miz de yawjnaek dinfwngz daxbuz.

Geiqndaej daxgoeng ciengzseiz gangj:“Gij bingjmangx daxbuz mwngz guh haenx, beij ronghndwen lij luenz.” Moix daengz Bet Nyied Cibngux, daxbuz cungj romhromh hwnqdaeuj gyaux mienh, daxgoeng couh youq henz mbek makhwzdauz、cauj lwgraz. Fwngz de gig gvai, ndaej dawz ceh makhwzdauz mbek ndaej baenz aen mbouj vengq, daxbuz cungj gangj de saeqsim lumj siuqva nei. Seiz gyaux mienh, gwnz gen gwnz fwngz daxbuz cungj nem rim mbamienh, daxgoeng couh yaengyaeng bang de uet bae, fwngz unqmenh couh lumj uet aen dijbauj ndeu nei.

Daxgoeng dai le, bingjmangx daxbuz guh haenx menhmenh noix lo, hoeng gij sibgvenq muengh ronghndwen cix itcig mbouj bienq. De ciengzseiz ing youq bakdou laeng go va’gveiq, da de con gvaq gij mbawfaex doxraemh haenx, doek youq gwnz ronghndwen gwnzmbwn. Gou cam daxbuz yawj gijmaz, de sing daemq gangj:“Yawj boux vunz ndeu.”Gou gyaep cam dwg byawz, de cij dwg riunyumnyum, gak da cix lae raemxda. Gij rongh ronghndwen con gvaq geh gova’gveiq ciuq roengzdaeuj, youq gwnz naj nyaeuqnyatnyat de ciuq roengz ngaeuz raiz, seiz luqlawq, gou lumjnaeuz yawjraen le yienghsiengq nienzoiq de.

Geiqndaej daxbuz gangj gvaq, de caeuq daxgoeng dwg youq laj gova- gveiq roxnaj. Seizcin bihaenx, de cingq youq laj gofaex siuqva, raq rumz ndeu ci daeuj, va’gveiq loenqbyoedbyoed, daxgoeng cingq- ngamj gvaq loh, bang de gip fagcim siuqva doek haenx. Daj neix, moix bi va’gveiq hai seiz, daxgoeng cungj aiq mbaet nye ndeu, naep youq ndaw byoem daxbuz. Couhcinj doeklaeng byoemgyaeuj hau, aen sibgvenq neix hix caengz bienq gvaq.

Ndwenngoenz lumj cax, gij riz laeglumx haenx gaek youq gwnz ndang daxbuz. Hwet de ngoenz beij ngoenz gungj, caen lumj gova’gveiq deng ndwenngoenz ap gaeuz haenx. Hoeng gofaex haenx vanzlij bibi haiva, gimmyammyam, heiq rang roemz vunz. Daxbuz gangj, gofaex gorum ndawbiengz neix, cijmiz va’gveiq ceiq rox sim vunz, youq aen geiqciet ceiq siengjniemh haenx haihoengh.

Youh daengz Bet Nyied Cibngux, gyanghongh caemrwg. Gij rongh ronghndwen ciuqgaeuq hausag, limqva va’gveiq ciuqgaeuq loenqfoenfoen, hoeng boux muengh ronghndwen gaenq mbouj youq. Gou ndwn youq gizdieg daxbuz ciengzseiz ndwn haenx, muengh aen ronghndwen ronghsag, sawqmwh rox le gijmaz dwg “cien leix caemh ronghndwen”. Laxlawz siengjniemh ndaej con gvaq dai lix, lumj rongh ronghndwen ndaej condaeuq caengz fwj, lumj heiq rang va’gveiq ndaej mbin gyae’gyanggyang.

Ndawgyang dai lix, mbouj gvaq dwg gek aen ronghndwen ronghsag ndeu. Daxbuz muengh ronghndwen seiz, dwg muengh gij ndwenngoenz caeuq daxgoeng caez gvaq haenx; gou muengh ronghndwen seiz, dwg muengh gij raeujrub ndaw sengmingh ciengxlwenx mbouj bienq saek haenx. Va’gveiq loenq le youh hai, ronghndwen ronghsag vengq le youh luenz, cijmiz gij gamjcingz ndaw sim, ciengxlwenx doekrag youq ndaw geiqniemh laeglaeg haenx, lumj gij rongh ronghndwen nei mbouj liux mbouj sat.

Haemhneix, gou yaengyaeng gip limq va’gveiq ndeu, doiq ronghndwen ronghsag damz: Muengh ndawbiengz sojmiz siengjniemh cungj ndaej bienqbaenz gij rongh ronghndwen, ciuq rongh ndaw sim boux neix boux haenx; muengh sojmiz doxbiek cungj ndaej lumj va’gveiq nei, youq aen seizcou baezlaeng doxbungz. Hoeng gij raeujrub yaepyet deng ndwenngoenz yo haenx, doeklaeng bienqbaenz fwensei ciengxlwenx, youq laj ronghndwen euciengq.

(Sunh Gyahyinh raiz Lingz Hinghningz hoiz)