Ndaejgeiq seiz lij iq, moix baez daengz “Roek It”, daxmeh couh bang gou bwz noeg byoem iq le, caiq daenj geu vunj moqsaksak he hawj gou, daep fag gebbyoem gyaeundei dem, cang hawj gou saunini. Gou ndwn youq gwnz aen daengqgeg, gyaeuj ngauzngwdngwd yawj gij “yienghsiengq lwenqda”swhgeij, ndaw sim nyoengx gij ndaenggon bouxmbwk rim liux.

Hoeng yied maj hung, gou yied roxndeq gij nyapnyuk bouxmbwk.

Gou dwg bouxmbwk, lij iq maij caeuq lwgsai ranznden doengzdoih guhcaemz, lumj lwgsai nei hag fag cungq gihgvanhciengh yiengj “dududu”, miz maz saeh hix mbouj lau saekdi “cung bae gonq”. Yahgeq ranznden raen le, cix gangj gou mbaeqmbaeq bagbag, mbouj lumj yiengh bouxmbwk saekdi. Miz baez ndeu, gou caeuq gyoengq lwgsai guhcaemz “goemqndoj”, ngamq guh daengz giz gvaqyinx, daxmeh gaeb dawz gou, vix ndaeng gou gangj: “Yizcinh, baezlaeng mboujcinj mwngz okdaeuj langh lo.” Gou vix coh gyoengq lwgsai giz mbouj gyae haenx cam: “Vihmaz gyoengqde ndaej caemz, gou mbouj ndaej caemz ni？” Ngeix mbouj daengz daxmeh gangjroenroen: “Aenvih mwngz dwg lwgmbwk, gyoengqde dwg lwgsai.” Gou baez dingq ngawh liux.

Hwnj daengz sam nienzgaep, gij saeh nyapnyuk engqgya lai lo. Gou gyaez doengh、gyaez riu、 gyaez caeuq gij lwgsai guhdoih, aenvih lwgsai haemq ndei gangj, mbouj lumj bouxmbwk nei bak gangj letlet. Gou ciengzseiz daiq gyoengq lwgsai daengz ranz guhcaemz, bouxgeq baez raen le, cim daengz aen lwgda yaek doek bae. Gou mbouj dawz haeujsim, hoeng daxmeh couh souh mbouj ndaej lo, najhaen dwk doiq gou gangj: “Yizcinh, baezlaeng mboujndaej caiq daiq gij lwgsai daeuj ranz guhcaemz lo.”

Moix baez gou caeuq gyoengq lwgsai itheij guhcaemz, cungj miz vunz youq baihlaeng gou vixyekyek、 gangj sam gangj seiq; moix baez gou aj bak riuhaha seiz, vunzlai couh yawj gou lumjnaeuz yawj doenghduz noix raen nei; moix baez gou caeuq daeggo ceng bouxlawz guh hongranz seiz, daxmeh cungj haeuj daeggo, naeuz wnggai dwg gou guh, lumjnaeuz bietdingh dwg lwgmbwk guh hongranz nei…… Sojmiz gijneix hawj gou nyapnyuk caez, dwg boux vunz lawz baenzlai “simndei”, dingh ok baenzlai saeh mbouj sam mbouj seiq hawj bouxmbwk ne? Bouxboux gangjnaeuz bouxmbwk dwg “buenq aenmbwn”, hoeng gij swnghhoz bouxmbwk vihmaz deng hanhhaed baenzlai ne? Gij goujhau “mbwk sai bingzdaengj” heuh baenzlai nanz lo, hoeng vunzlai doiq lwgmbwk lwgsai vihmaz cungj mbouj ityiengh ne?

Seizneix, gou raen gij vunj gyaeundei hoij youq ndaw gvih caeuq gij gebbyoem gyaeundei ninz youq ndaw habroi haenx, gij ndaengmoj miznaj haenx cungj mbin gvaq rumz gvaq fwj bae liux lo. Danghnaeuz hawj gou caiq seng baez ngeih, gou caen naemj dwg boux lwgsai he.

(Cinz Yizcinh raiz Banh Liginz hoiz)