Gwnzmbwn mbouj miz saek geu fwj ndeiyawj, rumz bongjhuhu, geij ngoenz mbouj dingz, daxbuz song fwngz naiqnueknuek daemx hangz, yawj gyoengqvunz youq gwnzhaw nyaengqnyatnyat byaij bae byaij dauq.

Mbiengj bya gizgyae miz benq fwj damh ndeu, ndit fwj cingq ciuq youq ndaw da Lij Gen, yaep ndeu, lumj dwg buhsawq mbin hwnjdaeuj, yaep ndeu, youh lumj benq lwed hoengz ndeu. Lij Gen byoemgyaeuj nyungqnyangq, boux dog naengh youq conghcueng fatmoengj.

Seizdoeng mbouj miz cungj dienheiq ndei neix, daegbied dwg ndwenlab. Ndwencieng yaek daengz lo, gyoengq ranznden seiqhenz cungj hainduj nyaengq, mizmbangj vunz caq naedyienz、mizmbangj vunz cawj noh.

Lij Gen boux dog naengh youq ranz luenhlablab de. Byaek ngaiz gwn lw caeuq vanj dawh baij youq gwnz daiz, haujlai bi gvaqdaeuj de couh yienghneix siliengz gvaq saedceij lo.

Gokgyaeuj deng geij geu byoemhau cw lo, byoemgyaeuj doek dwk gwnz gyaeuj cw mbouj liux, nyaeuq raih rim naj, lwgda hung de loemq gig laeg mbouj riuzdoengh. Lumjbaenz gwnz seiqgyaiq neix gak cungj doxgaiq gaenq caeuq de mbouj miz gvanhaeh lo.

Youq ndaw siujgih, gyoengq yanghgohdui hainduj niuj hwnjdaeuj. Foux mbawbeiz 《Nanznizvanh》《Mbouj Miz Gungcanjdangj Couh Mbouj Miz Cungguek Moq》 daengj gangj ok gyoengqvunz gyaez heiq, gyoengqvunz ndiepgyaez simmuengh gwndaenj.

Lij Gen laep lwgda gangj:“Dahlwg, mwngz dauqma lwi? Dauqma lwi?” De yungh fwngzgvaz naenx geiqsoqgi, baez dem baez nam fouzhauh.

Gvaq liux yaep ndeu, de sim luenh lumj maz, yaep ndeu, sim lumj cax gvej, raemxda caegcaeg loenq daengz henz gemj caeuq gokbak.

De yungh lwgfwngz suenq, Siujyen gaenq lizhai de ndaej 10 lai bi lo, geij bi neix, de ngoenzngoenz uet raemxda.

Bihaenx haemhndaep, baihrog, sing bauqrengh yiengj, miz dahsau ndeu youq ndaw yihyen, deng nyoengx haeuj ndaw ranz bingh naek bae.

Song boux canghyw、geij boux husw, gipmuengz hawj de guh soujsuz. Dahsau menhmenh laep da, gwnz najbyak miz diuz congh ngamq nyib raezrangrang ndeu, aen gyaeuj deng baengz hau geuj dwk, rwz lae miz lwed, canghyw aeu faiq saek gwnzde, hoeng lwed vanzlij itcig lae, gyaeuj gaenq bienqyiengh lo, byoemgyaeuj ndeiyawj de deng daeq baenz gyaeujndoq lo, gwnz naj mbouj miz saek di lwed, de gig nyieg dwk hemq naeuz:“Daxmeh……daxmeh……daxmeh……”

Lij Gen ndwn youq baihrog ranz bingh naek, boemz youq gwnz cueng daej, canghyw dawz mbaw saw dunghcih yungyiemj hawj de, heuh de caepcawq saehlaeng. Gyaeuj lwgsau deng sieng naek lai, dingjgyaeuj deng bungq ok aen congh gig hung ndeu, uk conh haujlai.

“Canghyw, canghyw, sou itdingh aeu gouqgouq dahlwg gou ha! ” Lij Gen gvih youq gwnz namh baiq mbouj dingz.

“Gou cij miz dahlwg neix, de dwg diuzmingh gou ha! ” Lij Gen naeuz, sing daejnga’nga. Ndaw lajroq yihyen, haujlai boux vunzbingh cungj humx gvaqdaeuj, daihgya cungj caeuq de itheij gouz canghyw, itdingh aeu gouq ok dahsau hojlienz neix.

Canghyw ngauzngauz gyaeuj, doiq Lij Gen gejgangj. Aenvih de siengsim lai, mbouj guenj baenzlawz gangj, hix dingq mbouj haeuj rwz bae. Lij Gen dwg boux mehmbwk minghhoj ndeu, aenvih seng mbouj ndaej lwgnyez, daihgya cungj heuh de “dahmaen siznij”.

Gezvwnh ngamq ndaej haj bi, couh riengz gvan de lizvwnh, ranz gaeuq deng ceksenj, faen ndaej ranz moq, bouxdaeuz gaihdau anbaiz faenh hong baet gai ndeu hawj de, de moix ngoenz haj diemj couh hwnqmbonq, baet diuz gai hung bakdou siujgih seuqsatsat bae.

De mbouj miz lwg, hawj vunz youq ndaw yihyen umjciengx boux lwgnyez he, ranznden cungj naeuz de miz fukheiq raixcaix. Dah lwgmbwk neix majhung le coengmingz roxsoq, bungz daengz ngoenzciet ngoenzgyaj, gyoengqvunz ndaw siujgih cungj yawj- raen song mehlwg de fwngz yien fwngz, youq siujgih seiqhenz youzlangh.

Youq ndaw siujgih, bouxboux haenh Lij Gen miz dah lwg gig ndei ndeu, baez daez hwnj dah lwg neix, gij najriu de cungj dwg baenzlai ronghlwenq.

Siujyen dayoz yaek bizyez lo, youq hagdangz gag guh hong ra ngaenz, aenvih cingzcik maenhndei, bibi cungj ndaej ciengjyozginh. Gaihdau cujyin youh hawj song mehlwg neix banh ceiq daemq swnghhoz baujcang, saedceij gvaq ndaej youh soeng youh angq.

（1）