Seiziq cij rox ngoenz ndaej gwn,

Miz byawz roxdaengz aen naekgywg;

Bohmeh yienghyiengh ngeix daengz lwg,

Nanz ndaej soengsup gvaq ndwenngoenz.

Daxboh doegsaw noix,

Doiq lwg de gyauyuz,

Caen dwg “manz” lai lo,

Hozfoeg le daxmeh.

Daxmeh hix deng ndaq,

Gaej dangqnaj gyaez lwg;

Ranznden gangjswgswg,

Buz raen swk raemxda.

Naeuz cawx ceij vehveh,

Mbouj yungh deq couh faen,

Ndi lai hawj saek maenz,

Boh gou caen saejheiq.

Naeuz cawx aen soujgih,

De mbouj sij hai ngaenz;

Cawx saejdaeuz ma gwn,

Deng de raen ndatheiq.

Meh naeuz gaej cit ien,

Gij vah diemz,

Miz fanhcien ok bak;

Ndwn soh ciep bekaek,

Lai cawx byaek,

Mbouj caiq yaek gaemz ien.

Mbouj ndaej cit myaiz lieng (rwi),

Meh sim liengz,

Lij dwg deng hawj cit;

Boh mbouj dwg vunz gik,

Raeuz simgip,

Gvaqlaeng cit noix lai.

Gienq de noix gwn laeuj,

De youh naeuq,

Fajnaj nyaeuq dangqmaz;

Naeuz de mbouj gikya,

Laeuq ngaenz ma,

Youh vihmaz laengzap?

Gou “haemz” daxboh,

Guhhong mbouj goq aen ndang;

Dwgrengz mbouj cangz,

Dangqnaj caenh cang ndang cangq.

Meh raen ndi angq,

Youh mbouj gamj gangj oksing;

Aen sim caenh in,

Cijndaej yamqdin doxbiek.

Bae ndaem lwgbiek,

Guhhong dungxiek cij ma;

Ngoenznaengz bae naz,

Ngeix daengz raemxda gag conh.

Mbouj dwg gangj gyaj,

Boh gyaez lwgyah dangqmaz;

Bau daemz ciengx bya,

Yienghyiengh cungj ca bae guh.

Gou “haemz” daxboh,

Ceng gwn haemzhoj cauhgya;

Ciengx yiengz ndaem naz,

Ngoenzngoenz bae ra ngaenzceij.

Gaenx buet seng’eiq,

Ndangdaej lij beij vunz ca;

Laeuq ndaej ngaenz ma,

Mbouj raen gwn caz saek mbat.

Miz mbouj lumz gok,

Ngoenznaengz caeux ok haemh ma;

Sim vih daihgya,

Gag gwn maenzsaz hix nyienh.

Gangj mbouj dingq, nanz le nanz,

Ngeixdaengz saeh neix sim caenh fanz;

Heiq ien haeu, heux daengx ranz,

Boux nyouq baez ngeih ndang hix canz;

Haeuj siujgangh, gwn engq van,

Gwn gij doxgaiq mbouj goq ndang;

Vih baenz ndei, naeuz luenh nam,

Gangj bae gangj dauq naeuz mbouj ngamj;

Vunz gangj baek, de gangj namz,

Caen muengh ranznden caez daeuj bang;

Gienq mbouj doengh, sim mbouj gam,

Danhnyienh daxboh gaej nyangz fangz.

Boh miz di dwghaemz,

Mbouj liz gaemz ien laeuj;

Son lwg mbouj baenz raeuh,

Guhyiengh hawj lwg raen.

Aeu guh ndaej baenz gwn,

Dinfwngz caen aeu hag;

Roengzsim vunz bienq ak,

Ceiq lau bak gangj rengz.

Gyo’mbaiq boh son dou,

Hwnj ranzlaeuz hawj youq;

Gwndaenj ndei lai raeuh,

Youh naengzgaeuq baenz caiz.