11 nyied 14 hauh daengz 15 hauh, Gvangjsih bouh nduj Heiqyungh heiqlwgnyez 《Roegvameiz Ndaengndiengq》 youq Yunghcouh Gicangz yienj, bouh heiq neix dwg Nanzningz Si Minzcuz Vwnzva Yisuz Yenzgiuyen caeuq Gvangjsih Yisuz Hagdangz caez cauhbaiz.

《Roegvameiz Ndaengndiengq》 aeu gojlwgnyez gojbeij guh lamzbonj, lwnhgangj gij gojgaeq roegvameiz majhung：Roegvameiz gyaeundei baengh sing go ndeidingq ciengqgo ndaej daih’it le, ndaengndiengq ndaengmoj, bienqbaenz duzroeg gikgyakgyak, mbouj lienh ciengq、mbouj guh rongz, gaenx gwn gik guh. Mwh seizdoeng daeuj daengz, roegvameiz deng rumznit cifofo ienqhoij raixcaix. Doeklaeng, de ndaej daengz gyoengq roeg bang dauq bienq gaenx, dauqcungz ra dauq bonjfaenh.

Baezneix 《Roegvameiz Ndaengndiengq》 camgya aen baijyienj heiq vunzmoq cozbinj moq daengx guek gaiq nduj, mboujdan dwg Gvangjsih bouh nduj Heiqyungh heiqlwgnyez baez nduj oknaj, lij hai diuzroen moq hawj cienzswnj cienzboq heiq yaek mied. Doenggvaq heiq ciuhgeq caeuq daezcaiz lwgnyez cauhmoq yungzhab, bouh heiq neix gawq baujlouz miz gijndei yisuz Heiqyungh, youh hawj de miz rengz singjsien depgyawj seizdaih、depgyawj lwgnyez, ok rengz vwnzva Gvangjsih hawj aen baijyienj heiq vunzmoq cozbinj moq daengx guek.(Lij Cunghvwnz Vangz Fanghhih)