11 nyied 13 hauh, gicej daj aen hoih fatbouh saehmoq baenzroix cawjdaez “guhsat hwngfat ndei saed aen gviveh ‘cibseiq haj’” Swcigih Cwngfuj Sinhvwnzban guh de roxyiuj. Gih raeuz aeu couqmaenh gij eiqsik Cunghvaz Minzcuz ranz vunz ndeu dangguh diuz sienqmeh gak hangh hong daengx gih, caezhwnq caezyungh “haj aen suenranz”, doinyoengx hwnqguh couqmaenh gij eiqsik Cunghvaz Minzcuz ranz vunz ndeu byaij laeg byaij saed.

Caezhwnq caezyungh aen suenranz cingsaenz caezcaemh Cunghvaz Minzcuz, gak cuz vunzlai engqgya dawzdingh “haj aen nyinhdoengz”. Gvangjsih cauhlaeb daengx aen senhconz gyauyuz couqmaenh gij eiqsik Cunghvaz Minzcuz ranz vunz ndeu faen gaep faen loih、cwgoemq liuxliux, gungganq 10 aen dieggiek yenzgiu “couqmaenh”, youq 《Gvangjsih Yizbau》 hai cienbanj “couqmaenh gij eiqsik Cunghvaz Minzcuz ranz vunz ndeu” daengx guek dangjbau aen nduj, gangj ndei gij gojgaeq Gvangjsih minzcuz doxgiet baenaj. Cienzswnj hwngfat gij vwnzva ciuhgeq maenhndei Cunghvaz, dajcauh “sam nyied sam Gvangjsih·aen ciet angq Betgveiq” doenghgij binjbaiz miz daegsaek neix.

Caezhwnq caezyungh aen suenranz vuenyungz doengzcaez baenzmiz, gak cuz vunzlai caez byaij coh sevei cujyi yendaiva baihnaj engqgya ronghsag. Aeu “yinzgungh cinwngz” hawjrengz cien hangz bak nieb, aeu AI yungh daengz aen hidungj bingzgya hwnqguh gih guhyiengh doenghgij dieg guhhong minzcuz neix. Bued ngaenzcienz caizcwng swnjciep doihaeuj guhhoengh lajmbanj（gij hong hwngfat minzcuz vunznoix） 35.8 ik maenz, guh 5800 lai aen hanghmoeg, dieg duetgungz lajmbanj boux vunz ndaej ceiboiq souhaeuj lienzdaemh 4 bi sang gvaq daengx guek、daengx gih lajmbanj boux vunz bingzyaenx suijbingz. 8 aen yienh（si、gih） henzguek guhbaenz roen gauhsuz “yienhyienh doeng”, Bwzswz Si、Bingzsiengz Si senjhaeuj aen hawsingz sawqdiemj doengzcaez yendaiva daengx guek.

Caezhwnq caezyungh aen suenranz huzndei henmuengh doxbang, gak minzcuz doxbyaij doxgyau doxyungz lai gvangq lai laeg. Laebdaeb doihaeuj “sam hangh dajveh·Gvangjsih cingq hengzdoengh”, Gvangjsih caeuq Gangj Au Daiz caeuq guekgya Dunghmungz doxgyau doxgap laebdaeb gyaak. Gihcwngz segih hong minzcuz cauhmoq hwngfat, segih hwnqguh、segih fugsaeh caeuq segih hozdung suijbingz laebdaeb daezswng. Cauhlaeb minzcuz doxgiet baenaj aeundaej cungbyoengq moq, daengx gih seizneix miz gih guhyiengh minzcuz doxgiet baenaj daengx guek danhvei guhyiengh 61 aen, mozfan cizdij 310 aen、mozfan bouxvunz 314 boux.

Caezhwnq caezyungh aen suenranz gyaeundei ndeiyouq ndaejgyaeu, aen ciubaiz “Gvangjsih swnghdai gijndei gim mbouj vuenh” engqgya rongh. Laebmaenh caeuq hengzguh aen leixniemh song bya, swnghdai vanzging cizlieng laebdaeb lai bi baujyouq daengx guek baihnaj. Cienzmienh doihengz aen vunqsik guenjleix lajmbanj “dangjgen+vangjgwz+daihsoqgawq”, hwnqguh lajmbanj gyaeundei habyouq habnieb guh baenaj ndeindi, lajmbanj seiqhenz vunz youq laebdaeb gaijndei, gak cuz vunzlai lai raen ndaejdaengz、raen vuenyungz、raen ancienz.

Caezhwnq caezyungh aen suenranz henzguek bingzan onjdingh, daengx aen guenjleix hongsaeh minzcuz caeuq rengz guenjleix engqgya ndei saed liuxliux. Guhyiengh doekguh aen cidu gizdieg minzcuz gagguenj, siujsim onjdingh doihaeuj hong diuzcingj guhcaez minzcuz cwngcwz fapgvi. Laebdaeb gek fuengz gij fungyiemj huxndumj aen gvaengx minzcuz.

(daj 《Gvangjsih Yizbau》 aeu daeuj genj hoiz Hoz Mingzvaz)