Moix bi cingmingz bae sauq aenmoh daxboh, cawzliux coemh sacienz, gou cungj daiq aen boibaujvwnh ndeu bae, youq henz moh daxboh gou yet cenj raemxgoenj ndeu hawj de.

Miz vunz geizheih dwk cam gou:“Mwngz dwg aeu raemx daeuj dingj laeuj lwi?”

Gou naeuz:“Couh dwg boi raemxgoenj ndeu, gou yiemq daxboh gou. ” Gangj liux raemxda couh gag lae.

Daj gou roxyiuj, ndaw ranz cij miz daxboh boux vunz ndeu. Daxboh youh geq youh couj, hoeng gou mbouj yiemz de. Gou cijdwg ciengzseiz cam:“Boh, gyoengq lwgnyez wnq cungj miz meh, gou baenzlawz mboujmiz ne?”

Seizhaenx, daxboh cungj dwg hojsik dwk naeuz:“Ai, meh mwngz minghdinj, ngamq seng mwngz couh bae lo. ”

Daxboh doiq gou cibfaen ndei. Gou muemqmuemq geiq ndaej, gou sengcingz dwg dah lwgnyez bakveuq ndeu. Daxboh vihliux yw ndei aen bak gou, de aemq gou bae haujlai aen yihyen ywbingh. Seizneix, naengbak gou yienznaeuz lij miz di niuj, hoeng beij seiz lij iq ndeiyawj lai lo!

Daxboh dwg youq linzcangz dawz faex, souhaeuj mbouj sang, vih gou yw bingh yiemq haujlai caiq, ranz dou gwndaenj cibfaen dwgrengz. Hoeng miz daxboh ndiep gou, gou roxdaengz gig vuenyungz.

Bi ndeu seizhah, gyoengq dah doengzhag wnq cungj daenj vunj, gou gig hozhaenz, geij baez gouz daxboh bae cawx, daxboh cungj mbouj oksing, naj de hawqmyangmyang. Gou rox ndaw ranz gunnanz, mbouj siengj caiq hawj daxboh nanzgvaq, cijndei haepbak mbouj gangj, hoeng ndaw sim lij miz di muengh.

Ngoenz muengh haemh muengh, muengh gvaqbae liux song aen seizhah, gou doiq daenj vunj caiq mbouj miz muengh lo, hoeng doeklaeng dauqfanj saedyienh lo.

Ngoenzhaenx, daxboh roengzban dauqma, naj riunyumnyum doiq gou naeuz:“Lwg ha, mwngz guj daxboh cawx gijmaz doxgaiq ndei ne?”

Gou guj baenz buenq ngoenz mbouj deng, doeklaeng daxboh daj baihlaeng dawz geu vunj okdaeuj. Mwh geu vunjva myab ok dangqnaj gou, raemxda gou “sa” doek roengzdaeuj lo.

Ngoenzhaenx banringz, gou lienz haeux cungj mbouj siengj gwn, daenj geu vunj, youq baihnaj gingq ciuq bae ciuq dauq, ndaw sim couh van lumj gwn dangz nei.

Boh miz bingh, gwn haeux le cungj aeu gwn raemxgoenj soengq yw, de gaenq baenzgvenq lo.

Bingzseiz, gou hix sibgvenq baez gwn haeux le, ndingq cenj raemxgoenj ndeu cuengq youq gwnz daiz hawj de gwn yw.

Hoeng ngoenzhaenx, gou lumz liux, ndaw sim cij siengj baenzlawz caeuq doengzhag beij daenj vunj.

Sawqmwh, aen lahbah hung gwnz denganj rog ranz fanfoek hongz hwnjdaeuj, daxboh dingq le vaiqvet buet okbae.

Gou seizneix cij geiqndaej, gaem aen huzraemx yaek ndingq cenj raemx hawj daxboh.

Daxboh gig muengz, doq byaij okbae doq naeuz:“Sien cuengq gwnz daiz ba, gou bae ndaw ciengz yawjyawj, dauq le caiq gwn. ”

Daxboh ngamq yaek hamj giemxdou, youh baenq ndang byaij coh gou, maeuq roengzdaeuj cup gou amq ndeu, naeuz:“Aeya, dahsau neix dajcang hwnjdaeuj, caen gyaeundei ha!”

Sikhaek, ndaw sim gou angq raixcaix.

Boh naeuz:“Daiq muengz lai, banhaemh daxboh dauqma caiq yawj ha!”

Banhaemh, daxboh mbouj dauqma.

Ranznden Vangz mehlaux naeuz:“Feiz remj bya lo, feiz hwnj gig haenq, miz gvaq cien gak dieg vunz daeuj gouq feiz, yawj daeuj, feiz ndaep mbouj baenzlai vaiq. ” De naeuz hawj gou youq ranz de gwn youq, gienq gou gaej simgip.

Geij ngoenz le, feiz ndaep liux lo, gyoengqvunz ndaw ciengz bae ndaep feiz haenx cungj dauqma lo, hoeng cix mbouj raen boh gou dauq. Gou simgip yaek daej, haujlai vunz cungj daeuj yawj gou, gou rox saehcingz mbouj ndei lo.

Doeklaeng gou cij rox, daxboh vihliux gouq bouxwnq, deng feiz coemh dai lo……

Gou baenz lwggyax lo.

Boh yaek biek naj, lienz cenj raemxgoenj ndeu cungj mbouj ndaej gwn. Moix baez siengj daengz gij saeh neix, gou cungj roxdaengz doiq mbouj hwnj de. Ndigah, moix daengz ciet cingmingz, gou cungj mbouj lumz daiq cenj raemxgoenj ndeu bae hawj de.

Bi’gvaq cingmingz, baengzyoux ndei gou Lili caeuq gou bae sauqmoh, de sawqmwh cam gou:“Mwngz naeuz meh mwngz dai caeux, hoeng cungj aeu miz aen moh de ba?”

Baenzneix cam, gou cij roxnyinh geizheih, daxboh coengzlaiz mbouj gangj hawj gou gvaq ha!

Doeklaeng, gou cam gyoengq bouxlaux ndaw linzcangz liux, gyoengqde cungj ngauz gyaeuj. Doek- laeng, boux vunzlaux rox cingzgvang ndeu naeuz gou nyi:“Boh mwngz baenz ciuh vunz caengz gietvaen gvaq, mwngz mbouj dwg dahlwg caenseng de, dwg vunzwnq seng mwngz le, fatyienh mwngz bakveuq, vut mwngz youq aen doengjlabsab yihyen, de cij gip dauqma ha……”