Ndit ciuq daengz ndaw roengq, duznou canghsuj iq cingq gwn doxgaiq, aen ndang de unqnemnem ndongqgywggywg. Duznou canghsuj iq neix youq laeng gou “baiz youq daih- it”, de cix dwg gij baujboiq gou ceiq ndiepgyaez.

Duznou canghsuj iq neix heuh guh “Donzdonz”, dwg bi’gvaq ndwensam boux doih ndeu soengq hawj gou. Donzdonz iqetet, ndang bwn saek mong lamz de mboengmbwtmbwt, yawj hwnjdaeuj luenzlulu; fouq lwgda de ndaemndetndet ronghrikrik, lumj song ngveih duhndaem. Mwh song ngveih lwgda iqet de muenghyawj gou, aen sim gou caen unq liux lo.

Donzdonz gwn ak dangqmaz. Ngoenznaengz gou cuengqhag ma daengz ranz, cungj raen de youq ndaw roengq swenjgitgit. Baezbaez gou daek song sieg haeuxgwn coq roengz ndaw vanj gwnhaeux de bae, de sikhaek buet gvaqdaeuj vax haeuj bak bae, yienghceij gig diuqgah. Danghnaeuz seizneix mwngz gueng di raemx hawj de, de couh angqfwngfwng youq gwnz modfaex rouxringx. Rouxringx yaep ndeu le de couh ra giz goxlox ndeu yietnaiq, yawj hwnjdaeuj gig lumj aen giuzlaengj saekmong ndeu.

Gou geiqndaej miz baez ndeu cuengqhag loq nguh, ma daengz ranz gou couh vaiqvet buet bae henz roengq, raen de gutgungq youq goxlox mbouj ning mbouj non. Gou sien coq di haeuxgwn ndeu hawj de, raen de mbouj ning saekdi, gou couh aeu aensieg nyoegnyoeg ndang de. De cij menhdwddwd niuj aenndang nyeux gyaeuj yawj gou, lij coh gou heuhgitgit geij sing, lumj naeuz ienq gou ma ranz gvaiz lai. Gou hix mbouj rox baenzlawz guh, cijndei haeuj ndaw rug bae sij cozyez lo.

Bineix seizgyajhwngq, gou okrog bae youz caet ngoenz. Okdou gaxgonq, gou gaenq ce gijgwn hawj Donzdonz gaeuq lo. Hoeng dauqma seiz cix raen de ninz youq gwnz modfaex mbouj ning mbouj doengh lo. Baezneix gou heuh mbouj singj de dem. Gou maeuq youq henz roengq, raemxda doekbyoegbyoeg, gou caen liuh mbouj daengz de biek gou bae baenzneix caeux. Daxmeh gangj vah unq nai gou: “Lauheiq de youq gizwnq caeuq doengzdoih sim’angq guhcaemz ne.”

Gou yawj dwk aen roengq noucanghsuj hoengqhanghang ngawz- ngwd, ndit lij lumj doenghbaez ciuq youq gwnzde, hoeng Donzdonz gaenq mbouj youq dem lo. Gou dauqngeix caeuq Donzdonz guhcaemz doengh gij saeh mizyinx haenx, ngeix naeuz: “Docih mwngz Donzdonz, hawj gou baenzlai angqyangz!”

“呆萌呆萌”的小仓鼠

南宁市星湖小学五年级(8)班 陆炜彤

阳光倾泻在笼子里，正在进食的小仓鼠身上散发出柔和的光芒。这只小仓鼠在我们家的地位“非比寻常”,它可是我心尖上的宝贝。

小仓鼠叫“团团”，是去年三月朋友送给我的礼物。团团个头很小，它有一身蓬松的灰蓝毛毛，看起来圆溜溜的；它的眼睛黑亮黑亮的,像两颗小黑豆。每当它用那双小眼睛望着我时,我的心瞬间被萌化了。

团团很能吃。我每天放学回到家都能看见它在笼子里吱吱地大叫。当我挖两勺粮食放到它的食碗里,它马上跑过来抓着粮食不断地往嘴里塞,样子十分狼狈。如果这个时候你再给它喂点水,它就会高兴地在木屑上打滚。打滚过后它会找一个角落休息睡觉，像极了一只灰色的毛线球。

我还记得有一次放学比较晚,回到家后我直奔仓鼠笼，发现它窝在角落里一动不动。我先放了一点粮食给它，见它没动，我就用勺子碰了碰它的身子。它这才慢悠悠地扭动身子转头看我，还朝我叫了几声，似乎在抱怨我回来太晚。我很无奈，只好回房间写作业了。

今年暑假，我外出旅游了七天。出门前，我给团团留了足够的食物。可回来的时候却发现它躺在木屑上一动不动。这一次我没能再叫醒它。我蹲在笼子前，眼泪忍不住掉了下来。我从没想过它会离开得这么早。妈妈轻声安慰我：“或许它在另一个地方和朋友们开心地玩耍呢。”

我呆呆地看着空空的仓鼠笼，阳光依旧照在上面，可是团团已经不在了。我心里回忆和团团在一起的有趣故事，默默念道:“谢谢你团团,带给我这么多快乐!”

(Vangz Gyanghmyauz hoiz)