Mboengqneix, Gaiq Daih Cibngeih Gvangjsih Vwnzyi Cauhguh Dungzgujciengj mingzdan goengbouh, cek sawgeq Sawndip 《Ciengq Dangzvangz Ingjyaenq Hoizgej》 ndaej Gaiq Daih Cibngeih Gvangjsih Vwnzyi Cauhguh Dungzgujciengj（loih vwnzyoz ndawbiengz vwnzyoz）, cek saw neix dwg Gvangjsih Minzcuz Yijvwnz Yenzgiu Cunghsinh、Swcigih Saujsu Minzcuz Gujciz Baujhoh Yenzgiu Cunghsinh caeuq Denzyangz Baeuqroxdoh Vwnzva Yenzgiuvei doxcaez bienraiz, Vangz Mingzbyauh cawjbien.

Cek saw neix 2023 nienz 12 nyied hawj Gvangjsih Gyauyuz Cuzbanjse okbanj, dwg gij hanghmoeg youqgaenj aen gviveh “cibseiq haj” hong sawgeq saujsu minzcuz daengx guek, ndaej senjhaeuj aen hanghmoeg cienmonz bued cienz okbanj gij sawcih minzcuz, dwg bouh saw okbanj “baenzroix saw ginghdenj couqmaenh gij eiqsik Cunghvaz Minzcuz ranz vunz ndeu” ndawde bouh ndeu. 《Ciengq Dangzvangz Ingjyaenq Hoizgej》 dwg gij saw ciengjgouq cingjleix okbanj 《Dangzvangz》 sawgeq dijbauj Bouxcuengh. 《Dangzvangz》 youq ranghdieg singz mbanj Yougyangh Gvangjsih riuzcienz, cujyau ciengqlwnh gij saeh lizsij boekbienq gaij Dangz laeb Cou、feiq Cou fuk Dangz daengj, couhdwg doenghgij saeh Dangzcauz geizgonq daj Lij Yenh daengz Lij Dan aen lizsij seizgeiz neix ginggvaq haenx, dwg gij fwen raez lwnh saeh Bouxcuengh baengh gij daezcaiz gojgaeq Cunghvaz lizsij gaijbien baenz, gij fwen neix miz daegsaek ronghsien, dwg gij guhbaenz dijbauj gwnz lizsij gak minzcuz doxbyaij doxgyau doxyungz.《Ciengq Dangzvangz Ingjyaenq Hoizgej》 yungh sawgeq saujsu minzcuz “haj doiqciuq” cingjleix fuengfap, miz hangz Sawndip、cienjraiz Sawcuengh gyaebyaem、geiqyaem gozci yaembiu、Gun cighoiz、Gun eiqhoiz, bienbaiz daejlaeh dwg ingjyaenq hoizgej, mboujdan baujlouz yienghgaeuq sawgeq, youh doenggvaq haeddoiq、hoizgej、bae doengh diucaz doengh gij neix haeujlaeg vatcimh caeuq langhbaij gij lizsij caeuq yozsuz gyaciz sawgeq.

(Lij Daucih)