Sujgyaj, gou daeuj daengz lajmbanj, youq gizhaenx youq geij ngoenz.

Seizhah lajmbanj daeuj dinghrwgrwg. Caj mwngz louzsim daengz de, couh fatyienh ndit engq haenq lo, nyod mbawngaeux daengjhwnj soemsetset, va’ngaeux daj ndaw raemx ndonj aen gyaeuj okdaeuj, duzbid gaenq benz hwnj byai faex bae lo, youq gwnzde ciengqgo. Mbouj geij nanz, gij feihdauh seizhah couh cienz doh daengx aen lajmbanj.

Haetromh, gou daeuj daengz diegnywj. Gij ndit henjrwgrwg daj ndaw fwj bongh roengzdaeuj, daj mbaw neix sinz daengz mbaw haenx, daj duj va neix diuq daengz duj va haenx. Daengngoenz lumj dwg boux canghdajveh ndeu, dawz gij saek doenghgo daengz gwnzmbwn, daemj ok baenz benq baenz benq fwj hau lamz aeuj hoengz, gyaeundei raixcaix; ndit lumjnaeuz dwg boux canghdajcang ndeu, dawz gaiq gienjbyoem, hawj gyoengq doenghgo cungj gut aen yienghbyoem moq ndeu; ndit lumj dwg boux canghdajnyib ndeu, gaem mae, dawz cim, vih moix duj va cungj daemj geu buhsa ndeu……

Banringz, ndit ciuq gwnzraemx, heuh singj gij va’ngaeux ndaw daemz. Duj lup menhmenh con hwnj gwnz raemx, caemdingh dwk, muenghyawj gij biengzbeih gyangmbwn, cimyawj duzroeg gwnzmbwn riengjret. Miz di va’ngaeux gaenq hai lo, va mbe hai, loh ok aen buenzva henjoiq. Daengx daemz va’ngaeux, dangq duj dangq miz gij yienghsiengq de, lumj fuk veh gyaeundei dwggyaez ndeu.

Banhaemh, gou ceiq maij youq laj gofaex henz dah iq, itmienh ci rumz, itmienh dingq doenghduz ciengqgo. Duzbid caeuq daekgaeuj dwg boux yinhyozgyah dienseng ndeu, gyoengqde daenj “buhlaex” youq laj faex ciengqgo. Duzgoep sienseng “gva gva” boiqyaem, aen mbanj iq cungj dingq ndaej nyi gij yinhyoz ndeidingq haenx.

Seizhah lajmbanj, dwg aen daengngoenz luenz haj saek; seizhah lajmbanj, dwg daemz va’ngaeux ronghsagsag ndeu; seizhah lajmbanj, dwg ciengz yinhyozvei nauhyied ndeu. Daengz lajmbanj le, gou dingq seizhah、yawj seizhah、nyouq seizhah, baez daih’it doeg rox gij gyaeundei seizhah. (Daiz Ginjcin raiz Veiz Cwngzgij hoiz)