Seizgan lumj raemxdah lae mbouj dingz，dawz bae dwg ndwenngoenz，louz roengz dwg dauqsiengj. Youq ndaw uk gou, mwh lij iq gij saeh caeuq yahdaiq bae giz guh’angq haenx lumj dwg ngoenzlwenz nei, geiq ndaej cingcing cujcuj.

Baez yaek daengz seizcin，cuengqhag byaij gvaq aen siujgih youq gvaq haenx，gou cungj nyeux yawj giz guh’angq haenx. Mwh iq，gou ceiq maij mbouj dwg dung’vaben， dauqdwg caeuq yahdaiq bae giz lwgnyez guh’angq ndaw siujgih guhcaemz. Yahdaiq cungj daz fwngz gou，daiq gou bae gizhaenx guhcaemz.

Ndaejgeiq 6 bi seiz，gou benz hwnj aen gyaq hawj vunz benz guhcaemz ngamq cang moq ndaw siujgih，benz daengz giz ceiq sang seiz fwt ndangndum hwnjdaeuj. Lwgsai wnq laeqlaeq soengset benz gvaqbae，gou gyaengj youq dieggaeuq mbouj gamj sangj saek di. Yahdaiq mbouj lumj bohmeh wnq yienghhaenx heuh gou roengzdaeuj，dauqdwg yaeng’yaeng byaij daengz henz aen gyaq， naeuz：“Daeghuj， mwngz yawj makda yahdaiq. Bouxsai gaej lau hojnanz，baenz yamq baenz yamq gvaqdaeuj，yahdaiq couh youq gizneix deq mwngz. ” Miz de dazyinx，ndaw sim gou mbouj lau lo，doeklaeng caen ndaej benz gvaqbae lo. Mwh gou daj lingh gyaeuj ndeu nod roengzdaeuj，naj yahdaiq angj dwk miznaj gvaq gou bae. De lumhlumh gyaeuj gou naeuz：“Geiqmaenh cungj roxnyinh neix，mwh bungz hojnanz，aeu baenz yamq baenz yamq daeuj，cungj ndaej gvaqbae. ”

Gij son’gyauq yahdaiq mbouj hanh gij coenzgangj neix. Youq gwnz gep benj ndiengqdoih，de son gou baenzlawz rox aeu ndang doxha；youq gwnz aen nungxnengh，de hawj gou roxnyinh gij ndei vaiq menh；youq dangqnaj aen laenod，de lwnh gou gij mbeihung miz maz yungh.

Seizneix，gij goenggoq gou bienq ndaej ngoenz beij ngoenz lai. Mwh daengz ngoenzsinghgiz，gou ceiq ngah lijdwg buenx yahdaiq bae giz guh- angq ndaw siujgih byaijbyaij. Gij doxgaiq giz guh’angq doiq gou daeuj gangj gaenq yienhndaej hozoiq lai，hoeng najriu yahdaiq lij lumj gaxgonq. Cij dwg seizneix，gou byaij youq henz ndang yahdaiq， mizseiz lij rex de baez he，daegbied dwg youq gwnz diuz roenrin gumxgamx siujgih haenx.

Singhgiz gonq ngoenzsinghgiz haenx，gou daiq yahdaiq bae giz aen eijraez de ceiq maij haenx. Rumzcin ci gvaq gij byoemhau de，gou naengh youq henz ndang de，yawj gyoengq lwgnyez ndaw siujgih guhcaemz. Gou daj ndaw daehsaw dawz mbaw sawcingq suyoz doxdax ndaejciengj ngamq fat roengzdaeuj haenx okdaeuj：“Daiq，gou ndaej ngeih daengjciengj，cungjdwg mwngz itcig gujli gou mbouj lau nanzdaez，cij ndaej faenh ciengj neix.” Makda yahdaiq yaepyet ronghsagsag，gij nyaeuq gakda venj rim angqriu：“Gou couh roxndeq Daeghuz ranz dou ceiq ak！”

Seizhaenx，gou roxyiuj，daj bi ngamq doegsaw daengz mwhneix，gou roxsoq majhung cungj liz mbouj ndaej yahdaiq dazyinx. De mboujdanh hawj gou angq gvaq mwh nyez，lij son hawj gou mizrengz bae najdoiq hagsib caeuq ndwenngoenz.

Byaij youq gwnz roen ma ranz，ndithaemh dawz duzngaeuz dou beng ndaej raezrangrang. Gaem fajfwngz yahdaiq，dou yaeng’yaeng byaij dwk. Seizneix aen ndang gou gaenq sang gvaq daiq，hoeng youq dangqnaj de，gou lijdwg laeq lan sai aeu de guenjhoh haenx.

Daiq，gyo’mbaiq ciuhneix miz mwngz daeuj buenx gou. Youq gwnz diuzroen majhung gou，dwg mwngz buenxriengz caeuq haeujcoengh，hawj gou bienq ndaej engqgya mbeilaux caeuq maenh’ak. Miz mwngz youq henz ndang gou, gou couh rox guh ndaej engq ndei！

(Cinz Yicungh raiz

Vangz Funghgwz hoiz)