Seizhah, gou hai cueng, ndwn dinghdingh hawj rumz ci haeujdaeuj. Gij rumz cix manzgyaengq youh maij bienq yiengh, hawj vunz mbouj rox baenzlawz gaemdawz gyoengqde.

Banhaet, de lumj dahniq launyaenq ndeu. Mwh va’ngaeux haiywdywd rangfwtfwt, cungj ndaej youq ndaw najriu habhoz gyoengqvunz yawjraen de, de lumj riuj gij dinvunj de nei.

Hoeng baez daengz banringz, dahniq launyaenq haenx couh mbouj raen ngaeuz lo, vuenh baenz duz saeceij iq hozgaek ndeu, de ajbak ngabngab, coemj daeuj coh dou, daiq raq heiqndat fwdfwd ndeu daeuj. Yawj！ Mbawfaex raen le, ngaem gyaeuj roengz, gag got ndang maenh. Duzbid geh mbaw deng hwngq dwk swenjngeungeu. Gyoengqvunz gwnz haw hix ndoj dauq ranz, cungj mbouj ok dou lo.

Menhmenh ne, mbwn yaek laep lo, de cix laeglemx rub gyangdoengh, hamj gvaq diegnywj heuseuseu, ci gvaq aen gyaq makit yahdaiq, couh lumj lwgnyez nei geizheih dwk yawj neix yawj de, yaep ndeu yawj bouxlaux dwkgeiz, yaep ndeu yawj gyoengqnyez dwkgiuz， lij bekfwngz loebloeb dem…… Giz de buet daengz haenx cungj bienq liengzsangj lo.

Neix couhdwg gij rumz seizhah daegbied miz haenx, de youq ndaw rim gou gig gyaeundei.

(Lingz Hauyenj)