Doegsaw, dwg cungj sibgvenq ndeu, dwg cungj fuengsik ndeu, caemh dwg cungj daidu gvaq saedceij ndeu. De ndaej hawj mwngz roxnaj aen seiqgyaiq neix engq lai, hawj mwngz yawjraen engq gvangq, hawj cihsiz oetrim aen’uk mwngz. Doengzyiengh, de caemh ndaej gaijbienq heiqsingq、yienghsiengq mwngz, lienzdaengz saedceij mwngz.

Mwh gou lij iq, dwg youq lajmbanj gvaq. Seizhaenx, gou baenzngoenz cawzliux yawj densi, couhdwg okbae guhcaemz. Baenzneix youq ranz guhcaemz roek bi le, gou deng daxmeh soengq haeuj hagdangz doegsaw lo.

Caeuq sojmiz lwgnyez ngamq doeg it nienzgaep ityiengh, gou hwnjdangz rox laeglemx gangjvah, roengzdangz couh ok rog buetfaengfaeng，cagaenj guhcaemz, gingciengz dwg aenlingz hwnjdangz yiengj le lijcaengz haeuj gyausiz. Aenvih yienghneix, gou youq it nienzgaep baez yijvwnz gaujsi nduj, gij daezmoeg yawjdoeg gou mbouj ndaej saek faen. Baenzneix, daxmeh cawx haujlai saw rogdangz hawj gou, muengh gou ndaej daezsang gij cingzcik daezyawjdoeg. Hoeng, gou gaenbonj mbouj yawj gvaq, ndigah gij saw haenx bonjbonj lij moqyat.

Cigdaengz ngoenzhaenx, daxmeh cawx bonj 《Hahli· Bohdwz Caeuq Ndikrinfap》 hawj gou, lij naengh youq henz cim gou yawjsaw. Gou mbouj cingznyienh dwk fanhai bonj saw neix. Ngamq yawj geij cieng, gou couh cibcukcib deng aen seiqgyaiq geizheih neix ciuyinx liux lo. Youq ndaw aen seiqgyaiq neix, mwngz ndaej raen bouxmo boux dem boux, gingz dwngxfangz, cuengq fapswd; mwngz ndaej raen gij cungjcuz gak cungj gak yiengh, caeuq bouxmo caemhdoih youq; mwngz ndaej raen boux youh boux lwgmo hag fapswd, lumj gyoengqraeuz nei baenz ngoenz naemj bae naemj dauq naemj baenzlawz wngqdoiq gaujsi…… Mbouj rox mbouj nyinh ndawde, gou doeg bonj saw neix sat lo, danhseih, ndawsim lijcaengz raen gvaqyinx. Baenzneix, gou youh dawz gij “sawgaeuq” moqyat gwnz gyaqsaw haenx, caiq nyinhnyinh caencaen doeg baez moq.

Daj baezhaenx hwnj, gou ciemhciemh gyaez doegsaw lo. Doengzseiz, naengzlig lijgaij doegsaw gou hix ndaej daihfuk daezsang, yijvwnz gaujsi caiq hix mbouj lau gij daezmoeg lijgaij yawjdoeg lo. Doegsaw, sawj cingzcik gou ndaej daezsang, hix bang gou gveng gij simfouz bae, sawj gou simdingh lo.

(Bizcwngh Yinghgez raiz

Luz Sanh hoiz)