Rumzcou liengzliengz soengq roegenq,

Gyangdoengh haeux henj mak van diemz;

Gozging cibhaj ciet doxriengz,

Guekcoj fouqgiengz lwgminz haenh.

Yamq haeuj seizcou daengz ndwenbet,

Raihraih haeuxnaz iet rieng raez;

Dah iq raemxsaw yaeng’yaeng lae,

Bae coh baihdoeng coux ronghndwen.

Bet nyied mbwn sang mangx ronghcingx,

Beixnuengx rap bingj ma doxcomz;

Daengloengz ronghyab va’gviq hom,

Seiq com(gungx) bet baih sing riu langh.

Lwgmbauq soengq bingj daengz gwnz daiz,

Lwgsau haizbaengz daeuj hoizlaex;

Bingj gwn roengz dungx diemz daengz saej,

Haiz demh daejdin raeuj simdaeuz.

Cibhaj daeuj daengz gwn makbug,

Bouxgeq lwgnyez cungj simvuen;

Ngeixniemh Cangzngoz gwnz ronghndwen,

Dwen daengz bouxboux daeuj baiq buenx.

Daeuj buenx Cangzngoz baiq ronghndwen,

Gofwen rwenzrwenz gyonglaz roq;

Gozging cibhaj comz doxcoh,

Angqhoh guekcoj bibi hwng.

Suenmak hwnghoengh vunz cungj haenh,

Guekgya maenh’ak raeuz cix ndei;

Cibhaj daeng’va ingj hoengzgeiz,

Sevei yungzhab ronghsagsag.

Hah bae cou daengz daihdieg gyaeu,

Gwnz bo mbawraeu daenj buh moq;

Yienghyiengh fungsou vunz angqhoh,

Caez daeuj doq fwen danq vuenyungz.