Bet nyied cibngux youh daengz lo.

Lungzanh Yen Yen’gyangh Cin Mbanjhungzcau, daengx mbanj cien geij vunz, dwg “mbanj canghdajdiet Gvangjsih”, caeuq gak dieg Mbanjcuengh ityiengh bet nyied cibngux caemh guh bingj, gij sibgvenq neix riuzcienz gyaeraez lo, cigdaengz ngoenzneix, vunzmbanj lij gig yawjnaek.

Ngamq haeuj bet nyied lij mbouj daengz cib ngoenz, vunzlai couh hainduj nyaengq hwnjdaeuj lo, boux neix cawx dangzlwgfaeg、dangzsa, boux haenx raeng lwgraz、aeuq dousah, boux haenx naengj haeuxnaengj、cauj duhdoem、 cien cahcauh dem, ranzranz cungj nyaengq dangqmaz.

Gij bingj mbanjranz dou mizmingz, dingqnaeuz senq youq seiz laeb guek couh gai daengz Nanzningz、Vuzcouh daengj dieg, bauqceij、 densi、 gwnzmuengx daengj meizdij riuz bae riuz dauq, moix ranz guh ok gij bingj haenx cungj ndaej bouxgwn haenhndei.

“Yen’gyangh Baizdangz nyiedbingj” dwg Liengz daihcej daengx ranz vunz caemh guh. Gig nanz gaxgonq, couh lai baez youq gak cungj doxdax ndawde ndaej ciengj, lij hwnj gvaq bauqceij、 densi dem.

Vihliux ganj hong, caengz haeuj bet nyied, Liengz daihcej couh hainduj nyaengq lo. Gvanbaz song boux caeuq geij boux vunz gwnz ranz ganq mbouj gvaqdaeuj, lij goq cib boux bet boux vunzhong dem. Yaek daengz cocib, gij vunzhek dawz yienzliuh daeuj gyagoeng yied daeuj yied lai, ndaw ranzbingj Liengz daihcej caemh yied daeuj yied nyaengq lo, daengxngoenz cungjdwg haetromh haihong, daengz haemh lij aeu gyaban baenz geij diemj cung dem.

Liengz daihcej dinfwngz raehrwd, guh ok gij bingj de dwk hamh habngamj, feihdauh habbak, gyaqcienz caemh habdangq. Cawzliux ndaw mbanj ranznden, mbanj wnq caemh miz haujlai heksug、 hekgaeuq caeuq haujlai vunz yanghcin daeuj caeuq de aeu bingj.

Ndaejgeiq lwgnyez seizde, baez gvaq bet nyied cibngux, ranz gou couh bae haw cawx geij aen bingj daeuj gvaq ciet, naemj lai gwn bingj hix gwn mbouj ndaej.

Seizneix vunzmbanj boux guh bingj lai gvaq gaxgonq haujlai boix. Bineix, ranz gou caemh bae ranz Liengz daihcej guh baenz geij bak aen bingj, cawzliux cuengq ranz gag gwn, lij hawj dahnuengx haq daengz Hangzcouh haenx、 hawj boux baengzyoux youq Dwzbauj guhhong haenx、 hawj boux lauxdoengz youq Denzdungh guh seng’eiq haenx boux geij aen dem.

Bingj gwn mbouj liux, dou couh dwk ndaw binghsiengh ce, caj daengz gij bingj ndaw binghsiengh cungj gwn liux le, bet nyied cibngux senqsi gvaqbae lo, hoeng, gij heiqfaenh cietheiq, gij feih rang bingj lij laebdaeb louz youq ndaw sim vunzlai.