Youq gizdieg caj hojceh haenx, vunz geujfoedfoed, gyoengqvunz boux caenx boux baebae dauqdauq. Gou aemq aen daehsaw bongzbuetbuet ndeu ndwn youq mwnqde caj ci, ndaw fwngz gou gaem mbaw biuqci soengq gou bae hagdangz de ndaet dangqmaz, yienghneix gou cij miz mbei gag bae gyae. Daxmeh ndwn youq henz ndang gou, fwngz de coengh gou leix iubuh, lumjnaeuz yienghneix guh couh ndaej hawj gou youq baihrog lai noix di dwgrengz ndeu.

“Bae daengz hagdangz ndaejgeiq daj denva hawj ndaw ranz bw.” Daxmeh youh caiq daengq gou, sing de miz di hep. Gou ngoem gyaeuj ngonz gwnz namh, “w a” han daxmeh, caengz caj daxmeh gangj liux, gou cix doq baenq ndang gvaq lingh mbiengj, gaenlaeng “w” le coenz ndeu han de. Cungqgyang gou caeuq daxmeh lumj daengj miz faq ciengz yawj mbouj raen ndeu, gekliz gou caeuq de.

Ndaejgeiq mwh gou baez iq, gou ceiq haengj daxmeh umj gou youq ndaw rungj de, gaenlaeng gou dingq daxmeh menhmenh gangj gij gojgaeq doenghbaez de lij iq. Daxmeh ok sing seiz henz aek de cix miz di saenq he, gou gyaez youq ndaw rungj daxmeh ngiengx gyaeuj dingq gij sing gangjvah de, hix gyaez mup cungj heiqrang gwnz ndang daxmeh. Bande, ndaw rungj daxmeh doiq gou ma gangj dwg gizdieg ceiq raeuj ceiq onj he. Hoeng mbouj rox daj seiz lawz hwnj, daxmeh siengj umj gou seiz, gou cix faenmingz ndoj deuz mbouj hawj de umj, mwh de siengj lai cam lai rox gou youq baihrog baenzlawz yiengh, gou cix cungj aeu coenz “gou cungj baenzlai hung lo” daeuj han de. Gou cug bi cug majhung, hainduj rox nyaenq le, cix menhmenh mbouj haengj bae ndaw rungj daxmeh goed youq, hoeng daxmeh doiq gou cungj lij dwg lumj baez iq neix, siengj gyaez gou umj gou, boux ndeu siengj umj, boux ndeu lau- nyaenq, couh yienghneix hawj dou song meh lwg yied daeuj yied mbouj caenmaed.

“Raeuz doxgot mbat ndeu ba.” Daxmeh sawqmwh yienghneix naeuz. Gou dingq sat coenz vah neix, dingh youq gizhaenx, cehda gyaep raen doenghboux doengzhag bangxhenz de, naj gou doq youh ndat youh hoengz. “Baenzlai vunz cungj youq neix yawj ne……” Gou sing iq damznaeuz, nyaenq dwk aeu lwgfwngz bae geuj diuz cag daehsaw. Gen daxmeh yaengx hwnjdaeuj daengz buenqbyongh gvaq, gen de dingh youq buenqbyongh yaep he, gaenlaeng caiq lumj mbouj miz gvaq gijmaz saeh nei cuengq roengzdaeuj, daxmeh dauq bae coengh gou leix iubuh, hoeng iubuh gou caengz luenh saekdi. Daxmeh roengz fwngz mbaeu dangqmaz, lumj lau cauz daengz gou nei. Gou raen ndaw da daxmeh lumj miz di saetmuengh, hoeng cungj saetmuengh neix yaep he cix law lo, de dauq riunyumnyum yawj gou.

Gwnz dieg caj hojceh haenx gvangjbo coi bouxhek hwnj ci, gou lumj ndaej gaijfang nei, riuj gij doxgaiq gou, doiq daxmeh naeuz: “Gou hwnj ci lonw.” Daxmeh ngaek gyaeuj han gou, gaenlaeng de daj aen daehriuj duh de mbon okdaeuj aen habhaeux baujraeuj ndeu hawj gou, naeuz: “Gou cawj le gyaujswj hawj mwngz, mwngz youq gwnz ci gwn.” Mwh gou ciep gvaq aen habhaeux de, laxdawz fajfwngz daxmeh gyoetgyat genggat, ndaeng gou doq roxnyinh soemjsat. Gou ndaejgeiq doenghbaez gou iq seiz, fajfwngz daxmeh lij dwg youh unq youh raeuj, banneix fajfwngz de cix bienqdwk yienghneix cocadcad lo. Fajfwngz co neix gangjok le baenzlai bi daeuj daxmeh dwg baenzlawz dwgrengz, baenzlawz mbouj sing mbouj ndwet daeuj gyaez gou. Bande, gou raen aen habhaeux haenx naeknupnup, ndawde mboujdan dwg cang miz gyaujswj, lij cang rim le gij gyaez daxmeh.

Hojceh menhmenh hai bae, gou youq henz cuengci yawjraen daxmeh youq ndaw vunzlai haenx yungh rengz ndiengq din hwnjdaeuj, de ndiengq sang dwk ndwn mbouj maenh, lumj couh yaek laemx nei, hoeng de dingj yiengq baih gou vadfwngz, lumjnaeuz yienghneix guh cix ndaej hawj gou louz roengzdaeuj nei. Ci yied byaij yied gyae, gij ngaeuz daxmeh bienq yied daeuj yied iq, gaenlaeng gou cungj yawj mbouj ok ndaw vunzlai haenx bouxlawz dwg de. Gou biengj aen fa habhaeux de, gij heiq gyaujswj rangfwtfwt, daxmeh guh le cungj gyaujswj dwk coenggep caeuq gyaeq, de rox gou ceiq haengj gwn cungj gyaujswj neix. Gij fwindat gyaujswj hawj fouq nganxgingq gou mong liux, youq ndaw fwindat hauswdswd neix, gou ngeix daengz le doenghbaez gou iq seiz, daxmeh baenzlawz son gou guh gyaujswj, bande dou song meh lwg sing riu mbouj duenh, yienznaeuz gou doeng guh sae guh, mbamienh banjdoh daengx ranz, hoeng de cix lij doiq gou riu naeuz: “Menhmenh guh, daxmeh son mwngz.”

Gij gyaujswj ndaw habhaeux lij raeujrubrub, raeuj lumj ndaw rungj daxmeh nei. Gou daj ndaw daeh aeu soujgih okdaeuj, fat le diuz saenqsik ndeu hawj daxmeh naeuz: “Meh a, gij gyaujswj neix feih dangqmaz.” Riengzlaeng gou ngvanh le yaep he, caiq menhmenh youq ndaw soujgih naenx ok gawq vah: “Mbat laeng gou ma seiz, gou guh gyaujswj hawj mwngz gwn.” Gou ngamq fat okbae hawj daxmeh, de hix doq aeu saenqsik han gou naeuz: “W, daxmeh caj mwngz dauq ranz.” Diuz saenqsik neix baihlaeng lij riengz miz aen doz riunyangnyang he.

Gou ing youq henz cueng hojceh haenx, gamjsouh daengz hojceh doegdaenh youq gwnz dietloh. Gou yawj gij gingjsaek rogcueng doiq laeng fwdfwd, couh ngeix daengz le doenghbaez gou youq ndaw rungj daxmeh seiz, gij saeh vuenyungz de. Doengh gij gyaujswj ndaw habhaeux neix lij raeujruprup, aen doz riu daxmeh fat daeuj hix lij youq ndaw soujgih gou riunyangnyang. Daxmeh doiq gou doengh gij gvansim caengz gangj ok bak gvaq de, gou roxnaeuz miz ngoenz ndeu, gou caeuq daxmeh dauq doxraen seiz, cix bienqbaenz le mbat doxgot raeujrub ndeu.

(Cinz Hihyez raiz

Veiz Munglingz hoiz)